الماتى قالالىق ءماسليحاتىنىڭ دەپۋتاتتارى ۇزىناعاش اۋىلىنداعى «ارمان دالا» لاگەرىنە بارىپ، جاعدايىمەن تانىستى.
بۇل جايىندا دەپۋتات نۇرگۇل تاۋ الەۋمەتتىك جەلىدە جازدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جازعى لاگەردە بالانىڭ دەمالۋىنا جاعداي جاسالماعان، ورەسكەل بۇزۋشىلىقتار ورىن العانىنا كۋا بولدىم. لاگەر بۇرىنعى ساۋنا عيماراتىندا ورنالاسقان. قىزمەت كورسەتۋشى - «بەلريچي» ج ش س. مەملەكەتتىك ساتىپ الۋ شارتىنا سايكەس قىزمەت كورسەتۋ قۇنى - 107،8 ملن. تەڭگە. جوسپار بويىنشا 1150 بالا دەمالىسپەن قامتىلۋى ءتيىس. مەملەكەتتىك ساتىپ الۋ پروسەدۋراسى قالاي جۇرگىزىلگەنى توڭىرەگىندە ماسەلە تۋىنداۋىنا بايلانىستى ءوز تاراپىمنان ق ر باس پروكۋراتۋراسىنا، سىبايلاس جەمقورلىققا قارسى ءىس-قيمىل اگەنتتىگىنە، قارجى مينيسترلىگىنىڭ ىشكى مەملەكەتتىك اۋديت كوميتەتىنە تەكسەرۋ جۇرگىزۋ جونىندە ساۋال جولداندى. بۇل ماسەلەنى ءوز باقىلاۋىما الدىم»، -دەپ جازادى دەپۋتات.
وقۋ-اعارتۋ مينيسترلىگىنىڭ اقپاراتى بويىنشا جاقىن ارادا بالالار باسقا دەمالىس لاگەرلەرىنە جىبەرىلەدى.