قازاقستاندىق قاجىلارعا بارىنشا قولداۋ كورسەتىلەدى.
بيىل قازاقستاننان قاجىلىق پارىزدى وتەۋگە 3 مىڭ ادامعا رۇقسات بەرىلدى. وسىنداي كەلىسىم ساۋد ارابياسى كورولدىگىندە (ساك) قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلىنىڭ قاجىلىق جانە ۇمرا ءمينيسترى تاۋفيك يبن فاۋزان ار-رابيامەن كەزدەسۋىندە جاسالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
كەزدەسۋدە بيىلعى قاجىلىقتى ۇيىمداستىرۋ ماسەلەلەرى ءسوز بولدى.
ناۋرىزباي قاجى قازاقستاندىق قاجىلارعا بارىنشا قولايلى جاعداي جاساۋ بويىنشا ءوز ۇسىنىسىن جەتكىزدى. ونىڭ ىشىندە ەڭ ماڭىزدىسى قاجىلاردى جەتكىزەتىن اۋە تاسىمالىنىڭ ءتيىمدى باعادا بولۋى تۋراسىندا كەلىسسوزدەر جۇرگىزىلدى. ويتكەنى چارتەرلىك اۋە رەيستەرىنىڭ باعاسى قازاقستاندىقتار ءۇشىن قىمباتقا سوعۋدا.
ءوز كەزەگىندە تاۋفيك يبن فاۋزان ار-رابيا قازاقستاندىق قاجىلارعا بارىنشا قولداۋ كورسەتەتىنىن ايتتى.
ەكىجاقتى كەزدەسۋ بارىسىندا بيىل قازاقستاننان 3 مىڭ ادام قاجىلىق پارىزىن وتەيتىنى تۋرالى كەلىسىلدى.
ساۋد ارابياسى تاراپى قازاقستانعا بەرىلگەن رەسمي 3 مىڭ ورىننان تىس، قاجىلىق ماۋسىمدا ەلگە كىرۋگە ەشكىمگە جول بەرىلمەيتىنىن اشىپ ايتتى.
بۇدان بولەك، قازاقستاننىڭ باس ءمۇفتيى دۇنيەجۇزىلىك يسلام ليگاسىنىڭ باس حاتشىسى شەيح، دوكتور مۇحاممەد يبن ابدۋلكاريم ال-يسسامەن كەزدەسكەن.
ن.تاعان ۇلى دۇنيەجۇزىلىك يسلام ليگاسىنىڭ باس حاتشىسىن قازاقستانعا ساپارمەن شاقىردى.
«دۇنيەجۇزىلىك يسلام ليگاسى قازاقستاندا وتەتىن الەمدىك جانە ءداستۇرلى دىندەر ليدەرلەرىنىڭ سەزىن، ءبىزدىڭ ورتاق باستامالارىمىزدى قولداپ كەلەدى. ءوزىڭىزدى قىركۇيەك ايىندا قازاقستان استاناسىندا وتەتىن الەمدىك جانە ءداستۇرلى دىندەر ليدەرلەرىنىڭ VII سەزىنە قاتىسۋ ءۇشىن ارنايى شاقىرامىز. ءبىزدىڭ ماقساتىمىز تاۋەلسىزدىك العان تۇستان بەرى بەيبىتشىلىكتى ۇستانۋ، الەمدە بولىپ جاتقان جانجال، ءدىنارالىق قاقتىعىستاردىڭ الدىن الۋ. وسى رەتتە ليگانىڭ اتقارىپ وتىرعان جۇمىسى وراسان زور»، - دەدى باس ءمۇفتي.
قمدب باسپا ءسوز قىزمەتىنىڭ مالىمەتىنشە، كەزدەسۋ سوڭىندا باس حاتشى قازاقستانعا شاقىرۋدى قابىل العانىن جانە بۇل شارا جوسپارىندا بار ەكەنىن جەتكىزدى.