ءبىلىمدى ۇرپاق تاربەيەلەۋ ءۇشىن بارىنشا جاعداي بار.
جىل سايىن الماتى حالقى 70 مىڭ ادامعا وسەدى، بۇل الەۋمەتتىك سالاداعى ساپالى قىزمەتتەرگە سۇرانىستى كۇشەيتەدى. جاڭا وقۋ جىلىندا مەملەكەتتىك جانە جەكەمەنشىك مەكتەپتەرگە 34 300-دەن استام بالا قابىلداندى. ناتيجەسىندە قالاداعى ءبىرىنشى سىنىپتارعا بالالاردىڭ تازا اعىنى 12 مىڭ وقۋشىنى قۇرادى. مۇنداي مالىمەتتەردى مەگاپوليس اكىمى ەربولات دوسايەۆ ءبىلىم بەرۋ قىزمەتكەرلەرىنىڭ تامىز كەڭەسىندە ايتقان بولاتىن، دەپ حابارلايدى Almaty-akshamy.kz.
«مەكتەپ تاپشىلىعى پروبلەماسىن تۇبەگەيلى شەشۋ «جايلى مەكتەپ» ۇلتتىق جوباسىن ءتيىمدى ىسكە اسىرۋ بولىپ تابىلادى، ونىڭ اياسىندا 2025 جىلعا دەيىن الماتى قالاسىندا 37،1 مىڭ ورىندىق 22 مەكتەپ ىسكە قوسىلادى. ينفراقۇرىلىم سالۋ جانە جەر ۋچاسكەلەرىن كەڭەيتۋ ءۇشىن جەرگىلىكتى بيۋدجەتتە 19 ملرد تەڭگە قاراستىرىلعان»، - دەدى الماتى اكىمى تامىزداعى جيىندا.
بۇعان دەيىن الماتى اكىمدىگىنىڭ جوبالىق كەڭسەسى حابارلاعانداي، جاڭا فورماتتاعى مەكتەپتەردىڭ باسىم بولىگى الاتاۋ جانە ناۋرىزباي اۋداندارىندا سالىنادى -5 وقۋ ورنى. بوستاندىق اۋدانىندا – 4 مەكتەپ، تۇركسىب اۋدانىندا – 3، اۋەزوۆ اۋدانىندا – 2 مەكتەپ، قالعان اۋدانداردا- ءبىر مەكتەپتەن سالۋ جوسپارلانۋدا. مەكتەپتەر ءبىلىم ۇيالارىنىڭ تاپشىلىعى بايقالاتىن جەرلەردە سالىنۋدا.
بيىلعى تامىز كونفەرەنسياسىندا مەملەكەت باسشىسى ۇلت ۇستازى احمەت بايتۇرسىن ۇلىنىڭ «مەكتەپتىڭ جانى ءمۇعالىم، ءمۇعالىم قانداي بولسا، مەكتەبى ءھام سونداي بولماقشى»، دەگەن ءسوزىن كەلتىرە وتىرىپ، «ەلىمىزدىڭ ەرتەڭى جاس ۇرپاقتىڭ ءبىلىمدى، ەڭبەكقور ءارى وتانشىل بولۋىنا بايلانىستى» دەگەن بولاتىن.
وسى ورايدا ءبىلىم سالاسىندا ەڭبەك ەتكەن ارداگەر ۇستازدار مەن قازىرگى كۇنى وقۋشىلاردى ءبىلىم نارىمەن سۋسىنداتىپ جۇرگەن مۇعالىمدەردىڭ پىكىرىن بەرۋدى ءجون سانادىق.
«مەن جانە مەنىڭ زامانداستارىم مەكتەپ ەسىگىن ۇلى وتان سوعىسىنان كەيىنگى جىلدارى اشقان ەدىك. ول كەزدە وقۋ قۇرالدارىنىڭ تاپشىلىعى، قاعاز-قالامنىڭ جەتىپەۋشىلىگىنە قاراماستان، بىزگە ساباق بەرگەن قاسيەتتى ۇستازدارىمىز 1،2 جىلدىق ۋچيليششەلەردە ءوقىپ-بىلىم العاندار ەدى. سوعان قاراماستان، وقىعان-توقىعانى ولارعا قايرات بەرىپ، جانىن سالا ساباق بەرەتىن. بۇل كۇندەرى بارشامىزعا بەلگىلى جاعداي، وقۋ-اعارتۋ سالاسىنا دەگەن كوزقاراس مۇلدە وزگەشە. ونىڭ ءوزى وسكەلەڭ ۇرپاققا تەرەڭ ءبىلىم مەن تاربيە بەرۋدىڭ جاڭا ساتىعا كوتەرىلگەنىن كورسەتسە، ۇستازعا دەگەن قامقورلىقتىڭ كۇن ساناپ ارتا تۇسكەنىن كورەمىز»، - دەيدى بار عۇمىرىن ۇستازدىق ەتۋگە ارناعان تاريحشى ۇستاز، ق ر ءبىلىم ۇزدىگى سادىقبەك دۋلاتبەك ۇلى.
سوڭعى جىلدارى مۇعالىمدەرگە مەملەكەت تاراپىنان بارىنشا جايلى جاعداي جاسالىپ كەلەدى. ۇستازداردىڭ الەۋمەتتىك جاعدايلارى دا تۇزەلىپ، ەڭبەكاقىلارى 4 جىلدا ەكى ەسەگە دەيىن كوتەرىلگەن. پەداگوگتار مارتەبەسى دە زاڭمەن قورعالاتىن بولدى. ۇستازدار دا ساپالى ءبىلىم بەرۋ جولىندا جاسالىپ جاتقان مەملەكەت قامقورلىعى سەزىلەتىنىن ايتۋدا.
«پەداگوگ مارتەبەسى تۋرالى» زاڭ شىققالى بەرى مۇعالىمدەر ءبىرىڭعاي مارتەبەگە يە بولدى. ۇستازداردىڭ قۇقىعى، بەدەلى، الەۋمەتتىك جاعدايلارى دا كوتەرىلىپ كەلەدى.كەيىنگى جىلدارى مۇعالىمدەرگە وتە جاقسى جاعداي جاسالىپ جاتىر. مەملەكەت تاراپىنان باسپانامەن قامتاماسىز ەتىلۋدە. جالاقىلارى ەڭبەك وتىلىنە بايلانىستى ەداۋىر ءوسىپ وتىرادى. پەدوگوگيكالىق قىزمەتتەگى ەڭبەگى ءۇشىن «قازاقستاننىڭ ەڭبەك سىڭىرگەن ۇستازى» قر- سىنىڭ مەملەكەتتىك ناگرادالارى بەرىلەدى. دەمالىستا دەنساۋلىقتارىن جاقسارتۋ ماقساتىندا ساۋىقتىرۋ ورىندارىنا جىبەرىلەدى.الاش قايراتكەرى ماعجان جۇمابايەۆتىڭ «التى الاشتىڭ بالاسى قوسىلسا، ءتور مۇعالىمدىكى» دەپ ايتىپ كەتكەنىندەي مۇعالىمدەرگە دەگەن سىي-قۇرمەت بارى قۋانتادى»، - دەيدى №11 جبب مەكتەپتىڭ قازاق ءتىلى جانە ادەبيەتى ءپانىنىڭ ءمۇعالىمى زياش ەرمەكبايەۆا.
ساپالى ءبىلىم بەرۋ جولىندا بالالار ءۇشىن دە، ۇستازدار ءۇشىن مەملەكەت دەڭگەيىندە جاسالىپ جاتقان جاعدايدى مۇعالىمدەر دە جاقسى بىلەدى. سول جولدا ايانباي تەر توگۋدە.
«بۇگىنگى تاڭدا ۇستاز مارتەبەسى بيىك مىنبەلەردەن ايتىلىپ، ەرەكشە كوڭىل ءبولىنىپ كەلەدى. سانانانى تۇرمىس بيلەگەن زاماندا ۇستازدىڭ تۇرمىس تاۋقىمەتى جادىندا تۇرماۋ كەرەك. ءيا، ءبىز قازىرگى قولداۋلاردى سەزىنەمىز، تۇسىنەمىز. بۇل ۇستازعا قۇرمەتپەن بىرگە، ۇلتقا دەگەن جاناشىرلىقتىڭ كورىنىسى دەپ بىلەمىن. ايتۋلى كۇندە بارشا ۇستازدار قاۋىمىنا، ارداگەر ۇستازدارىمىزعا ەڭبەكتەرىنىڭ جەمىسىن كورۋدى تىلەيمىن. ءاليحان بوكەيحان اتامىزشا ايتقاندا ۇلتقا قىزمەت ەتۋ بىلىمنەن ەمەس مىنەزدەن. ءبىزدىڭ مىنەز تۇزەلسە، ۇلتتىڭ مىنەزى تۇزەلەدى»، - دەيدى №152 مەكتەپ-گيمنازياسىنىڭ ءمۇعالىمى ا.دۋلاتبەك.
بۇگىن ءقادىرلى دە قاسيەتتى، بارشا قۇرمەتكە لايىق ۇستازدار مەرەكەسى. ءبىلىمدى ۇرپاق – ۇلت بولاشاعى. ەندەشە وسى جولدا ەڭبەك ەتىپ جۇرگەن ۇستازدار جايلى ايتۋ ارتىق ەمەس.