سايلاۋ سولتانقۇلوۆ، كوكتال اۋىلى اقساقالدار القاسىنىڭ ءتوراعاسى:
جاڭا قازاقستاننان كۇتەرىم كوپ
قازاقستان ءوز دامۋىنىڭ جاڭا كەزەڭىنە قادام باسقالى تۇر. تاۋەلسىزدىكتىڭ ءتورتىنشى ونجىلدىعىندا تەپە-تەڭدىكتى كۇشەيتۋ ارقىلى مەملەكەتتىك باسقارۋ جۇيەسىن جەتىلدىرۋ، ەلدى ودان ءارى دەموكراتيالاندىرۋ ارقىلى اشىق ءارى ادىلەتتى قوعام ورناتۋ، ەكونوميكانى دامىتۋ جانە ۇلتتىق بايلىقتىڭ يگىلىگىن بارلىق ازاماتتار پايدالاناتىنداي جەتىلگەن الەۋمەتتىك-ەكونوميكالىق جۇيە قالىپتاستىرۋ، ال ەڭ باستىسى، كەلەر ۇرپاققا وركەنيەتتى، ىرگەسى بەرىك، زاماناۋي ءارى وزىق مەملەكەتتى مۇرا ەتىپ قالدىرۋ سىندى اۋقىمدى مىندەتتەر تۇر. مىنە، ساياسي جۇيەدە جۇرگىزىلەتىن سول رەفورمالارعا بەرىك قۇقىقتىق نەگىز جاساۋ ءۇشىن قازاقستان رەسپۋبليكاسىنىڭ كونستيتۋسياسىنىڭ 33 بابىنا 56 وزگەرىس ەنگىزىلگەلى وتىر. كونستيتۋسياعا وزگەرىستەر مەن تولىقتىرۋلار ەنگىزۋ جونىندەگى رەسپۋبليكالىق رەفەرەندۋم – ەلىمىزدىڭ كەلەشەگىن ايقىندايتىن ماڭىزدى شارا. وندا قابىلداناتىن شەشىم ءاربىر ازاماتتىڭ ومىرىنە، تۇرمىس ساپاسىنا جانە ءوزى مەن ۇرپاعىنىڭ كەلەشەگىنە ىقپال ەتەرى ءسوزسىز. سوندىقتان رەفەرەندۋمنان كۇتەرىم كوپ.
اسەل رۋزيباي قىزى، ستۋدەنت:
ءىس جۇزىندە ورىندالسا ەكەن
رەفەرەندۋم تۋرالى شەشىم ءوز ۋاقىتىندا قابىلداندى. حالىق قۋانا قولداۋدا. مەملەكەتتىك تىلگە باستى باسىمدىلىق، ۇلتتىق قاۋىپسىزدىكتىڭ قورعالۋىنا نازار اۋدارىپ، ۇلتتىق وركەنيەتتىڭ جاڭا قازاقستاننىڭ ەل سەنىمىنەن شىعاتىن زاڭ بولادى دەپ سەنىم ارتامىز. ەستەرىڭىزدە بولسا، 1995 جىلى قاراشا ايىندا قازاقستاندا «رەسپۋبليكالىق رەفەرەندۋم تۋرالى» كونستيتۋسيالىق زاڭ قابىلدانعان بولاتىن. سودان بەرى ەلدە كونستيتۋسيالىق تۇزەتۋلەرگە قاتىستى حالىقتىق رەفەرەندۋم ۇيىمداستىرىلعان جوق. ال رەفەرەندۋم دەموكراتيانىڭ ماڭىزدى ينستيتۋتى بولىپ تابىلاتىنى ءاۋ باستان-اق بەلگىلى. سەبەبى، ونداي شارا كەزىندە، مەملەكەتتىك ماڭىزى بار ماسەلەلەرگە قاتىستى تىكەلەي بۇقارا حالىقتىڭ پىكىرى مىندەتتى تۇردە ەسكەرىلەدى. جاڭا قازاقستان زاڭدارىنا دا وزگەرىستەر جاڭاشا تولىقتىرىلۋى كەرەك. مەن وسى وزگەرىستەردىڭ ءىس جۇزىندە ورىندالعانىن قالايمىن.
ايگەرىم بەكجانوۆا، كاسىپكەر:
ءاربىر ازاماتتىڭ بورىشى
سوڭعى جىلدارى قوعام اراسىندا كۇرمەۋى شەشىلمەي جاتقان كۇردەلى ماسەلەلەر كوبەيىپ كەتتى. سول سەبەپتى، پرەزيدەنت «حالىق ۇنىنە قۇلاق اساتىن مەملەكەت» تۇجىرىمداماسىن العا قويا وتىرىپ، وسىنداي ماڭىزدى شەشىم قابىلداپ وتىرعانى انىق.
بۇل وسى ەلدىڭ ازاماتى رەتىندە ءبارىمىزدى قۋانتقانى راس. بۇگىنگى تاڭدا ەلىمىز ۇلكەن وزگەرىستەر الدىندا تۇر. سوندىقتان 5 ماۋسىم كۇنى ءار قازاقستاندىق ءوزىنىڭ جەكە ازاماتتىق بورىشىن ورىنداۋعا ءتيىس. سەبەبى، ەلىمىزدىڭ بولاشاعىنىڭ دامۋى تىكەلەي وسى رەفەرەندۋمعا بايلانىستى بولىپ وتىر.
پرەزيدەنت حالىققا بارىنشا ەركىندىك بەرۋدى ماقسات ەتىپ وتىر. وزگەرىستەر ساياسي جۇيەنىڭ كوپتەگەن سالاسىن قامتيتىن بولادى. سوندىقتان ەلىمىزدەگى ەلەۋلى وقيعاعا بەيجاي قاراماي بەلسەندى قاتىسۋ – ءاربىر ازاماتتىڭ بورىشى. وسى بورىش ورىندالعاننان كەيىن ءبىر كۇندە بولماسا دا، ءبىراز ۋاقىت وتكەن سوڭ ادىلەتتى قازاقستاندا ءومىر سۇرەتىنىمە سەنەمىن!
ەرداۋلەت ەراسىلوۆ، مەحانيك:
جاڭاشىلدىق ءار كەزدە دە كەرەك
اتا زاڭىمىزدىڭ ءبىر ەمەس، 33 بابىنا وزگەرىس ەنگىزىلمەك. ول - كونستيتۋسيانىڭ ۇشتەن ءبىر بولىگى. وسىنداي ماڭىزدى شەشىمدى قابىلداۋ قۇزىرەتى تەك پارلامەنت قابىرعاسىندا قالماي، حالىقتىڭ قاتىسا الۋى مەملەكەتىمىز ءۇشىن وتە مارتەبەلى قادام. وسى ۋاقىتقا دەيىن مەملەكەت باسشىسى حالىق پەن بيلىكتىڭ بىرىگە جۇمىس ىستەۋىنىڭ ماڭىزى تۋرالى ايتىپ كەلدى. الداعى رەفەرەندۋم - وسى سوزدەردىڭ ورىندالۋىنىڭ جارقىن كورىنىسى. سونىمەن قاتار، كونستيتۋسيانىڭ 6-بابىندا حالىق جەر مەن تابيعي رەسۋرستاردىڭ يەسى دەگەن نورمانى بەكىتۋ كوزدەلۋدە. ايتىلعان زاڭناما قابىلداناتىن بولسا، بۇل حالقىمىز ءۇشىن يگى جاڭالىق بولماق. جاڭاشىلدىق ءار كەزدە دە كەرەك. كونستيتۋسياعا دا زامان تالاپتارىنا ساي وزگەرىس ەنگىزۋىمىز دۇرىس دەپ ەسەپتەيمىن. مەملەكەت باسشىسى ۇسىنعان تۇزەتۋلەر ەل ەكونوميكاسىن جانە باسقا دا سالالارىن دامىتۋعا ۇلەس قوسادى دەگەن ءۇمىت بار.