1 ساۋىرگە دەيىن كولىك سالىعىن تولەۋ كەرەك.
مەملەكەتتىك كىرىستەر كوميتەتىنىڭ تۇسىندىرۋىنشە، 2023 جىل ىشىندە اۆتوكولىكتى ساتىپ الۋ نەمەسە ساتۋ جاعدايىندا جىلدىق سالىقتىڭ ەسەپتەلگەن سوماسى 12-گە بولىنەدى جانە ناقتى يەلىك ەتۋ ايلارىنىڭ سانىنا كوبەيتىلەدى، دەپ حابارلايدى Almaty-akshamy.kz
مىسالى، بيىل 5 ايعا كولىك العان بولساڭىز، سالىق تولەمى 5 ايعا تولەنەدى. ءوز كەزەگىندە ساتىپ الۋشى تاراپ سالىقتى كولىكتى ساتىپ العان ايدان باستاپ تولەيدى.
"ەگەر سىزگە 2023 جىلدىڭ باسىنا دەيىن ساتىلعان كولىك قۇرالى ءۇشىن سالىق سوماسى ۇسىنىلسا، مۇنداي كولىكتىڭ ۋاكىلەتتى ورگاندا ءىس جۇزىندە ەسەپتەن شىعارىلعانىنا كوز جەتكىزۋ كەرەك"، - دەپ ءتۇسىندىردى مەملەكەتتىك كىرىستەر كوميتەتى.
كوميتەت 2023 جىلعا ارنالعان كولىك قۇرالدارى سالىعى سوماسى تۋرالى اقپارات kgd.gov.kz ۆەب-پورتالىنداعى "جەكە تۇلعالار ءۇشىن الداعى تولەمدەر" قىزمەتىندە، سونداي-اق "e-Salyq Azamat" جانە ەكىنشى دەڭگەيلى ءموبيلدى قوسىمشالارىندا ورنالاستىرىلعانىن ەسكە سالدى. تولەم مەرزىمى - 2024 جىلدىڭ 1 ءساۋىرى.
بۇل رەتتە سالىق ورگاندارى ەسەپتى سالىق كەزەڭىنەن كەيىنگى جىلدىڭ 1 مامىرىنان كەشىكتىرمەي ءىىم اكىمشىلىك پوليسيا كوميتەتىنىڭ دەرەكتەرى بويىنشا سالىقتى ەسەپتەيدى.
2023 جىلعا ارنالعان سالىقتى ەسەپتەۋ كەزىندە كورسەتىلگەن كەزەڭدە قولدانىستا بولعان ايلىق ەسەپتىك كورسەتكىش – 3 450 تەڭگە سوماسىندا پايدالانىلدى.