بۇگىن ەلورداداعى ۇلتتىق مۋزەيدە قازاقستاندا تابىلعان 8ء-شى «التىن ادامنىڭ» جاڭعىرتىلعان ءتۇرىنىڭ (رەكونسترۋكسيا) تانىستىرىلىمى ءوتتى.
ەلىمىزدە سەگىزىنشى «التىن ادام» 2019 جىلى اقتوبە وبلىسى، تەمىر اۋدانى، تاسقوپا ەلدى مەكەنىنەن تابىلعان، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
سارمات داۋىرىنە جاتاتىن قۇندى جادىگەردى ماماندار 2 جىل بويى زەرتتەپ، قايتا جاڭعىرتىپ، بۇگىن ەلوردا تورىنە الىپ كەلدى.
«التىن ادام» — ءبىزدىڭ تاريحىمىزدىڭ اسىل قازىناسى. وتكەنىمىزدىڭ قانداي بولعانىن وسىدان بىلۋگە بولادى. بۇل — باعا جەتپەس ۇلتتىق قۇندىلىق. مىنە، تاۋەلسىزدىكتىڭ 30 جىلدىعى قارساڭىندا وسىنداي ايتۋلى وقيعاعا كۋا بولىپ وتىرمىز. ءبىر عانا «التىن ادام» ارقىلى ۇلى دالانىڭ ەرەكشەلىگىن تانىپ، بىلۋگە بولادى. ەلباسى نۇرسۇلتان نازاربايەۆتىڭ باستاماسىمەن قولعا الىنعان «رۋحاني جاڭعىرۋ» باعدارلاماسىنىڭ جەمىسى. اقتوبە وڭىرىنەن تابىلعان كەزەكتى «التىن ادام» بۇل جاي عانا دۇنيە ەمەس جانە كەزدەيسوقتىققا جاتپايدى. بۇل تۋعان جەر تاريحىنىڭ جاڭا پاراقشاسى، اتا-بابالارىمىزدىڭ ءىزى. وسى ورايدا قۇندى جادىگەردى تاۋىپ، ونى جاڭعىرتۋعا اتسالىسقان ارحەولوگ، رەستاۆراتورعا العىس بىلدىرەمىن»، - دەدى ق ر ۇلتتىق مۋزەيىنىڭ ديرەكتورى ارىستانبەك مۇحامەدي ۇلى سەگىزىنشى التىن ادامنىڭ اشىلۋ سالتاناتىندا.
سەگىزىنشى «التىن ادامنىڭ» سۇلباسىن قايتا جاڭعىرتۋعا وتاندىق ارحەولوگ، رەستاۆراتورمەن بىرگە كورشى رەسەيلىك ماماندار دا ۇلەسىن قوسقان.
«التىن ادام» 2019 جىلدىڭ قازان ايىندا تابىلدى. ال اقتوبەدە جۇرتشىلىققا بىلتىر كوكتەمدە ۇسىنىلدى. سودان بەرى ونىڭ سۇلباسىن قايتا جاڭعىرتۋ جۇمىسىمەن اينالىستىق. تابىلعان جادىگەردىڭ قۇندىلىعىن ساقتاپ، قاسيەتىن جوعالتپاۋ ءۇشىن ءتۇپنۇسقادان الشاقتاماۋعا تىرىستىق. بۇل ەر ادام، ونىڭ مۇردەسىنەن بولەك، جەكە زاتتارى دا تابىلدى. ونىڭ ىشىندە بەلبەۋ، قىلىشتىڭ شىرىگەن قالدىعى جانە تاعى باسقا زاتتار بار»، - دەدى ءا.مارعۇلان اتىنداعى ارحەولوگيا ينستيتۋتىنىڭ قىزمەتكەرى، ارحەولوگ-عالىم ارمان بەيسەمبايەۆ.
تاريحي جادىگەر ۇلتتىق مۋزەيدىڭ «التىن زالىنا» قويىلدى. ونىڭ اشىلۋ سالتاناتىنا قوعام قايراتكەرلەرى مەن تاريحشى، ارحەولوگ-عالىمدار قاتىستى.
«التىن ادامنىڭ» سۇلباسىن قايتا جاڭعىرتۋعا (رەكونسترۋكسيا) 2 جىلداي ۋاقىت جۇمسالدى. الدىمەن ءتۇپنۇسقا زەرتتەلەدى. ياعني شىعارماشىلىق ەمەس زەرتتەۋ جۇمىستارى جۇرگىزىلەدى. "تابىلعان التىن ادامنىڭ جىنىسى قانداي؟ جاسى نەشەدە؟ ومىردە كىم بولعان؟" تاعى سول سياقتى ساۋالدارعا جاۋاپ ىزدەيدى. ودان بولەك، تابىلعان زاتتار دا زەرتتەلەدى. زەرتتەۋ ناتيجەسى كورسەتكەندەي، سەگىزىنشى «التىن ادامنىڭ» جاسى شامامەن 50-دە جانە ول كوسەم بولعان»، - دەدى سۋرەتشى-رەستاۆراتور بولات اتىراۋبايەۆ.