الماتىدا كەڭەس وداعىنىڭ باتىرى، گۆارديا پولكوۆنيگى باۋىرجان مومىش ۇلى اتىنداعى 5571 اسكەري بولىمىندە 600-دەن اسا جاس سارباز سالتاناتتى تۇردە انت بەردى.
بۇل ءراسىم وتان الدىنداعى بورىشىن وتەۋگە بەل بۋعان ءار ازاماتتىڭ ومىرىندە ماڭىزدى ورىن الادى.
الىپ مەگاپوليس — الماتى قالاسىنىڭ تىنىشتىعىن قامتاماسىز ەتەتىن جەدەل بريگاداعا ءار وڭىردەن جىلىنا ەكى رەت جاس تولىقتىرىلىم كەلەدى.
ءىس-شاراعا جاۋىنگەرلەردى قولداۋعا ولاردىڭ اتا-انا، باۋىرلارى، دوستارى، ءبولىمنىڭ ارداگەرلەرى جانە «وڭتۇستىك» وڭىرلىك قولباسشىلىعى مەن قۇرامانىڭ اسكەري قىزمەتشىلەرى قاتىستى.
الماتى وبلىسىنان شاقىرىلعان قاتارداعى راۆيل ماگامەد اسكەرگە دەيىن چايكوۆسكيي اتىنداعى مۋزىكالىق كوللەدجدە ءبىلىم الىپ، ۇرمەلى اسپاپتاردا وينايتىن مۋزىكا مامانى بولعان. ۇلتتىق ۇلانعا كەلىپ اسكەري وركەستردى كورگەن ول بىردەن ءوزىنىڭ بولاشاقتا كىم بولاتىنىن ناقتى شەشتى. مەرزىمدىك قىزمەتتى اياقتاعان سوڭ، اسكەري وركەستردە قىزمەت ەتەمىن دەيدى جاس جاۋىنگەر. سالتاناتتى شاراعا ءراۆيلدىڭ قوس اجەسى — ايشا اپا جانە شولپان اپا، ناعاشى اتاسى مالىك اقساقال جانە اتا-اناسى رەنات ماگامەد ۇلى مەن قاناش مالىك قىزى كەلىپتى.
— وتان الدىنداعى بورىشتارىڭدى ابىرويمەن وتەڭدەر. ەر-ازامات دەگەن اتقا لايىق بولىڭدار. قىزمەتتەرىڭە ادال بولىڭدار. جولدارىڭ اشىق بولسىن. ءارقاشان جاقسى سوزگە لايىق بولىڭدار، ەلدىڭ ريزاشىلىعىنا بولەنىڭدەر. كومانديرلەرىڭدى تىڭداڭدار، تارتىپكە باعىنىڭدار! - دەپ مالىك اتا نەمەرەسى مەن ونىڭ قارۋلاستارىنا باتاسىن بەردى.
سالتاناتتى شارادا ەرەكشە وقيعا بولدى. 1 وقۋ روتاسىنىڭ ساربازى، پاۆلودار قالاسىنان شاقىرىلعان قاتارداعى جانتورە ەرزال ەكى مىڭعا جۋىق ءدۇيىم جۇرتتىڭ الدىندا سۇيگەن قىزىنا ءسوز سالدى. جولداستارىمەن الدىن الا جوسپارلاپ، كومانديرلەرىنەن رۇقسات العان جانتورە كوپشىلىك ىشىنەن دانا ەسىمدى ارۋدى داۋىستاپ ىزدەدى. مۇندايدى كۇتپەگەن بويجەتكەن باسىندا اڭتارىلىپ قالدى. الاڭعا اياعىن يمەنە باسىپ شىققان داناعا جينالعان جۇرت قول سوعىپ، قولداۋ ءبىلدىردى. جاس ساربازدىڭ ۇسىنىسىنا بويجەتكەن قىز “ءيا!” دەپ جاۋاپ بەردى.
جانتورە مەن دانا ءبىر مەكتەپتە وقىعان سىنىپتاستار ەكەن. دانا بۇگىندە — مەكتەپ ءمۇعالىمى. جانتورە وعان ۇيلەنۋگە ۇسىنىس ءبىلدىرۋدى اسكەرگە دەيىن شەشكەن ەكەن. ءبىراق ءسوز سالىپ ۇلگەرمەگەندىكتەن، وسىنداي ايتۋلى كۇنگە نيەتتەنگەن ەكەن. ەكى جاستىڭ سۇيىسپەنشىلىگى ماڭگىلىك بولعاي!