اقمولا وبلىسىندا ەرتە تەمىر ءداۋىرى كەزەڭىندەگى ساق جاۋىنگەرى جەرلەنگەن قورىم، اشەكەي بۇيىمدار مەن قارۋ-جاراقتار تابىلدى، دەپ حابارلايدى Almaty-akshamy.kz Inform.kz-كە سىلتەمە جاساپ.
«وبلىستىق تاريحي-مادەني مۇرانى قورعاۋ جانە پايدالانۋ ورتالىعىنىڭ ماماندارى بۋراباي اۋدانىنداعى قۇمدىكول (زلاتوپولە) اۋىلىنىڭ اۋماعىندا «رەگيوندورستروي» جشس-عا بولىنگەن جەر ۋچاسكەلەرىنە زەرتتەۋ جۇمىستارىن جۇرگىزۋ بارىسىندا ەرتە تەمىر ءداۋىرى مەن ورتاعاسىرلىق كەزەڭدەرگە جاتاتىن «قۇمدىكول» (زلاتوپولە اۋىلى) جانە «جاڭاجول» ارحەولوگيالىق ەسكەرتكىشتەرىن تاپتى.
سونىمەن قاتار بارلاۋ جۇمىستارى بارىسىندا اۋىل تۇرعىندارى جاڭاجول اۋىلى ماڭىنداعى ورمان ىشىندە ورنالاسقان قورعاننىڭ ورنىن كورسەتتى. قورعاندى زەرتتەۋ بارىسىندا سۋىردىڭ ىنىنەن كونە جەبەنىڭ ۇشتارى تابىلدى»، - دەدى ۆەدومستۆودان.
مادەنيەت باسقارماسىنان اتاپ وتكەندەي، وسىنداي كونە ارحەولوگيالىق قورعاندار انىقتالعان كەزدە تاريحي-مادەني مۇرانى قورعاۋ جانە پايدالانۋ ورتالىعىنىڭ جارعىسىنا سايكەس ارحەولوگيالىق قورعاۋ-قۇتقارۋ جۇمىستارى جۇرگىزىلەدى. سەبەبى جەر استىنداعى وزگە دە قۇندى جادىگەرلەر تابيعي جانە انتروپوگەندىك فاكتورلاردىڭ اسەرىنەن جويىلىپ كەتۋى ىقتيمال. سوندىقتان «جاڭاجول» قورعانىنا ارحەولوگيالىق زەرتتەۋ جۇرگىزىلدى.
«زەرتتەۋ بارىسىندا قورعاننىڭ جەرلەۋ شۇڭقىرىنان ەرتە تەمىر داۋىرىنە قاتىستى – ساق جاۋىنگەرى انىقتالدى. اداممەن بىرگە جەرلەنگەن بىرنەشە جادىگەر تابىلدى، ولاردىڭ ىشىندە: جىلقى مالىنىڭ اۋىزدىعى مەن جۇگەننىڭ اشەكەي بۇيىمدارى (قۇستىڭ باسى مەن كۇن قۇدايىنىڭ بەلگىسى بار دوڭگەلەك جاپسىرمالار)، قانجار-پىشاق، تاسقايراق، 10 دانا ساق-سكيفتىك ۇلگىدەگى جەبەنىڭ ۇشتارى جانە قىسقا اكيناك-قىلىش تابىلدى»، - دەپ تولىقتىردى باسقارمادان.
تابىلعان جادىگەرلەر زەرتتەلىپ بولعان سوڭ اقمولا وبلىستىق تاريحي-ولكەتانۋ مۋزەيىنىڭ ەكسپوزيسيالارىنان ورىن تاۋىپ، مۋزەي قورىن تولىقتىراتىن بولادى.