شىلدەنىڭ 24-نە دەيىن ۇمىتكەرلەر ۇگىت-ناسيحات جۇمىستارىن جۇرگىزەدى.
25 شىلدەدە قازاقستاننىڭ ءبىرقاتار وڭىرىندە اكىمدەردىڭ سايلاۋى باستالادى. سايلاۋدىڭ بۇل ءتۇرى ەلدى دەموكراتيالاندىرۋعا باعىتتالعان، حالىقتىڭ ەركىن ەسكەرىپ، تاڭداۋ جاساۋ قۇقىعىن بەرۋدى كوزدەيتىن ماڭىزدى بەتبۇرىس بولادى دەگەن ۇمىتپەن قولعا الىنىپ وتىر، دەپ حابارلايدى Almaty-akshamy.
پرەزيدەنتتىڭ ساياسي ماسەلەلەر جونىندەگى كومەكشىسى ەرلان قارين بۇل سايلاۋ مەملەكەت باسشىسى ۇسىنعان ساياسي رەفورمالاردىڭ ەكىنشى جانە ءۇشىنشى پاكەتتەرىنىڭ اياسىندا ىسكە اسىپ جاتقانىن ايتىپ ءجۇر.
ەستەرىڭىزگە سالا كەتسەك، پرەزيدەنت قاسىم-جومارت توقايەۆتىڭ «قازاقستان جاڭا ناقتى احۋالدا: ءىس-قيمىل ۋاقىتى» اتتى جولداۋىندا 2021 جىلدان باستاپ اۋىل اكىمدەرىنىڭ تىكەلەي سايلاۋىن وتكىزۋ تۋرالى تاپسىرما بەرىلگەن بولاتىن.
ۇكىمەت پرەزيدەنت جولداۋىن ىسكە اسىرۋ جونىندەگى جالپىۇلتتىق جوسپاردىڭ 139 جانە 140-تارماقتارى بويىنشا اۋداندىق ماڭىزى بار قالالاردىڭ، اۋىلداردىڭ، كەنتتەردىڭ، اۋىلدىق وكرۋگتەردىڭ اكىمدەرىن تىكەلەي سايلاۋدى ەنگىزۋ جونىندەگى زاڭ جوبالارىن ازىرلەپ شىقتى.
وسىلايشا 24 مامىردا مەملەكەت باسشىسى «قازاقستان رەسپۋبليكاسىنداعى سايلاۋ تۋرالى «قازاقستان رەسپۋبليكاسىنىڭ كونستيتۋسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» ق ر كونستيتۋسيالىق زاڭىنىڭ، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سايلاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ جاڭارتىلعان نۇسقالارىنا قول قويدى.
قۇجاتقا پرەزيەنتتىڭ تاپسىرماسى بويىنشا «قازاقستان رەسپۋبليكاسىنداعى سايلاۋ تۋرالى» كونستيتۋسيالىق زاڭعا پارلامەنت ءماجىلىسىن سايلاۋ كەزىندە ساياسي پارتيالاردىڭ ءوتۋ شەگىن 7% -دان 5%-عا دەيىن تومەندەتۋ، سونداي-اق بارلىق دەڭگەيدەگى سايلاۋ بيۋللەتەندەرىنىڭ نىساندارىنا «بارىنە قارسىمىن» دەگەن باعان ەنگىزۋ جونىندەگى ەرەجەلەر جاڭادان ەنگىزىلدى. «بارىنە قارسىمىن» دەگەن باعانى بار بيۋللەتەندەر ءبىز ايتىپ وتىرعان اكىمدەردىڭ تىكەلەي سايلاۋىندا العاش رەت قولدانىسقا ەنگەلى وتىر.
رەسمي ستاتيستيكا بويىنشا، قازاقستان حالقىنىڭ 40%-دان استامى اۋىلدىق ەلدى مەكەننىڭ تۇرعىنى رەتىندە تىركەلگەن. ياعني اۋىلدىق اۋماقتاردى باسقارۋدىڭ ءتيىمدى تەتىگىن قالىپتاستىرۋ ىسىنە قازاقستان ازاماتتارىنىڭ 40%-دان استامى اتسالىسپاق.
جوعارىدا اتالعان زاڭ بويىنشا اۋىلدىق اۋماقتاردىڭ 2 346 اكىمى بۇدان بىلاي تىكەلەي سايلاۋ ارقىلى انىقتالۋى ءتيىس. بيىل سونىڭ 775ء-ى ءوز تاعدىرىن ايقىندايدى.