"سامۇرىق-قازىناداعى" اۋديت اياقتالدى: ناتيجەسى قانداي؟

تەكسەرىس بارىسىندا قوردىڭ كورپوراتيۆ ورتالىق رەتىندەگى قىزمەتى، سونداي-اق، "قازاتومونەركاسىپ"، Samruk-Kazyna Ondeu جانە باسقا دا ءبىرقاتار كومپانيا قامتىلعان. جالپى 18 زاڭدى تۇلعاعا اۋديت جۇرگىزىلگەن.

"2024 جىلدىڭ قورىتىندىسى بويىنشا قوردىڭ كومپانيالار توبىنىڭ كىرىسى 16،5 ترلن تەڭگە، ال حولدينگتىڭ كومپانيالار توبىنىڭ تازا پايداسى 2،4 ترلن تەڭگە بولدى. اۋديت قامتىعان كەزەڭدە حولدينگ مەملەكەتكە 2،37 ترلن تەڭگە تولەگەن، ونىڭ 779،9 ملرد تەڭگەسى ديۆيدەندتەر تۇرىندە، 1،6 ترلن تەڭگەسى اكتيۆتەردى باسەكەلەستىك ورتاعا بەرۋ ەسەبىنەن اۋدارىلدى. قور قوسىمشا تاعى 673 ملرد تەڭگەگە ق ر پرەزيدەنتى مەن ۇكىمەتىنىڭ تاپسىرمالارىن ىسكە اسىردى"، - دەپ جازىلعان حابارلامادا.

نە انىقتالدى؟

اۋديتورلار قوردىڭ كومپانيالار توبىنداعى ستراتەگيالىق جوسپارلاۋ مەن باسقارۋداعى كەمشىلىكتەرىن انىقتاعان.

"2018-2021 جىلدارعا ارنالعان قوردى ترانسفورماسيالاۋ باعدارلاماسىنىڭ 8 كومپانيانى شەتەلدىك انالوگتاردىڭ تيىمدىلىك دەڭگەيىنە شىعارۋ ماقساتى ورىندالماعان. باعدارلامادان تۇسكەن ناقتى پايدا كولەمى - 154،5 ملرد تەڭگە، ياعني جوسپارلانعان مولشەردەن ەكى ەسە تومەن. قورداعى كورپوراتيۆ باسقارۋ دەڭگەيىنىڭ جەتكىلىكسىزدىگى بايقالدى. ستراتەگيالىق قۇجاتتاردى تيىسىنشە ازىرلەمەۋ، جوسپارلى كورسەتكىشتەردى تومەندەتۋ تىركەلگەن، حولدينگتىڭ دامۋ جوسپارى ورىندالۋىنا باقىلاۋدى كۇشەيتۋ قاجەت. 7 اقپاراتتىق جۇيەنىڭ ىشىندە قور تەك 4 جۇيەنى پايدالانادى"، - دەپ جازىلعان حابارلامادا.

اۋديتورلار مالىمەتىنشە، باسقارۋشىلىق ەسەپ جۇيەسى (SAP BPC) دۇرىس جۇمىس ىستەمەيدى، ال ءبىرقاتار كومپانيا بويىنشا قارجىلىق ەسەپ قولمەن جۇرگىزىلەدى.

"سامۇرىق-قازىنادا" ىشكى نورماتيۆتىك قۇجاتتاردى جۇيەلەۋگە جەتكىلىكتى كوڭىل بولىنبەيدى. ولاردىڭ شامامەن 15%-ى قولدانىلمايدى، قايتا قاراۋدى نەمەسە كۇشىن جويۋدى تالاپ ەتەدى. "سامۇرىق-قازىنا" اق ديرەكتورلار كەڭەسى جانىنداعى 5 كوميتەتتىڭ 3-ەۋى (ستراتەگيا جونىندەگى، ترانسفورماسيا باعدارلاماسىنىڭ ورىندالۋىن باقىلاۋ جونىندەگى، مامانداندىرىلعان كوميتەت) جۇمىس ىستەمەيدى. ال قور باسقارماسى جانىنداعى 7 كوميتەتتىڭ 2024 جىلدان بەرى 2-ەۋى (جاڭعىرتۋ جانە تۇراقتى دامۋ جونىندەگى) جۇمىس ىستەمەيدى. ناتيجەسىندە حولدينگتىڭ قۇرىلىمى تىم كۇردەلى كۇيگە جەتكەن"، - دەپ جازىلعان حابارلامادا.

قور توبىنا 6 دەڭگەيگە بولىنگەن 326 كومپانيا كىرەدى.

"2020-2024 جىلدارى قور توبىندا 23 بەلسەندى ەمەس كومپانيا بولعان، ال 2024 جىلدىڭ قورىتىندىسى بويىنشا 41 كومپانيا جىلدى شىعىنمەن اياقتاعان. بۇل اكتيۆتەر قۇرىلىمىن وڭتايلاندىرۋدىڭ جانە ولاردى ءتيىمدى باسقارۋدىڭ ماڭىزدى الەۋەتىن كورسەتەدى. سونداي-اق، ينۆەستيسيالىق جوبالاردىڭ ىسكە اسىرىلۋىن باقىلاۋدى تۇبەگەيلى كۇشەيتۋ قاجەت، سەبەبى 2020 جىلدان 2024 جىلعى 30 قىركۇيەككە دەيىن قور توبىنىڭ 175 جوباسىنىڭ 49-ى عانا اياقتالعان"، - دەپ جازىلعان حابارلامادا.

جالپى اۋديت قورىتىندىسى بويىنشا:

• 351،8 ملن تەڭگە كولەمىندە قارجىلىق زاڭبۇزۋشىلىقتار؛
• 122،2 ملرد تەڭگە سوماسىندا ءتيىمسىز جوسپارلاۋ جانە قاراجاتتى پايدالانۋ دەرەگى انىقتالعان؛
• 119 جۇيەلىك كەمشىلىك تىركەلدى.

ءبىرقاتار ماتەريال اكىمشىلىك ءىس قوزعاۋ ءۇشىن جولداندى، ال انىقتالعان كەيبىر ىستەر بويىنشا ماتەريالدار قۇقىق قورعاۋ ورگاندارىنا جىبەرىلدى.