«سامۇرىق-قازىنا» قىزمەتكەرلەرى قانشا جالاقى الادى

جالاقى ماسەلەسى تولىعىمەن قوردىڭ ديرەكتورلار كەڭەسىنىڭ قۇزىرەتىنە جاتادى

«سامۇرىق-قازىنا» قورىندا باسقارۋشى پەرسونالدار ءۇشىن تولەنەتىن جالاقى كولەمى ايتىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«كۆازيمەملەكەتتىك سەكتور سۋبەكتىسى رەتىندە قور قىزمەتكەرلەرىنىڭ جالاقىسىن مەملەكەتتىك قىزمەتشىلەردىڭ جالاقىسىمەن سالىستىرۋعا كەلەدى. ءۇش دەڭگەيلى جالاقى دەگەن تۇسىنىك جوق. سونىمەن قاتار «سامۇرىق-قازىنا» قورىندا ءادىل ەڭبەكاقى تولەۋ جۇيەسى بويىنشا ناقتى ەرەجەلەر ازىرلەندى. ونىڭ ىشىندە نەگىزگى جانە جىل قورىتىندىسى بويىنشا بەرىلەتىن سىياقى تولەۋ دە بار. جالاقى مەن سىياقى تاعايىنداۋدا جۇمىسشىنىڭ جەكە جانە كورپوراتيۆتىك قىزمەت كورسەتكىشتەرى ەرەكشە ەسكەرىلەدى»، - دەدى «سامۇرىق-قازىنا» اق باسقارما ءتوراعاسى الماسادام ساتقالييەۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، جالاقى ماسەلەسى تولىعىمەن قوردىڭ ديرەكتورلار كەڭەسىنىڭ قۇزىرەتىنە جاتادى.

«بىزدە باسقارۋشى پەرسونال ورتا ەسەپپەن 950 مىڭ تەڭگە، ال مەنەدجەرلەر شامامەن 400 مىڭ تەڭگە جالاقى الادى»، - دەيدى ول.

سونداي-اق، «سامۇرىق-قازىنا» باسشىسى قوردى رەفورمالاۋدان كەيىن قىزمەتكەرلەر سانى 248-دەن 124-كە دەيىن قىسقارعانىن ايتتى. ونىڭ ىشىندە باسشىلار سانى ەكى ەسە، ياعني 10-نان 5-كە دەيىن ازايعان.
بۇعان دەيىن «سامۇرىق - قازىنا» قورىنىڭ حالىق ءومىرىن جاقسارتۋعا باعىتتالعان جوبالاردىڭ ەكىنشى پاكەتىن جاريالاعانى تۋرالى حابارلاعان ەدىك.

ودان بولەك، بريفينگ بارىسىندا اتالعان قوردىڭ شامامەن 10 تريلليون تەڭگە قارىزى بارى ايتىلدى.