بۇرىنعى گەنەرال-لەيتەنانت سامات ءابىش شارتتى تۇردە سەگىز جىلعا سوتتالدى
نۇرسۇلتان نازاربايەۆتىڭ نەمەرە ءىنىسى، ۇلتتىق قاۋىپسىزدىك كوميتەتى ءتوراعاسىنىڭ ەكس-بىرىنشى ورىنباسارى سامات ءابىش «قاڭتار وقيعاسى» بويىنشا كىنالى دەپ تانىلدى. بۇل تۋرالى ءماجىلىس دەپۋتاتى ەرمۇرات ءباپي Facebook-اككاۋنتىندا «دات» گازەتىنە شىققان ماقالادان ءۇزىندى كەلتىرىپ جاريالادى، دەپ حابارلايدى اlmaty-akshamy.kz.
«26 اقپان كۇنى نۇرسۇلتان نازاربايەۆتىڭ نەمەرە ءىنىسى، قازاقستان رەسپۋبليكاسى ۇلتتىق قاۋىپسىزدىك كوميتەتى ءتوراعاسىنىڭ ەكس-بىرىنشى ورىنباسارى سامات ءابىش جابىق سوتتىڭ شەشىمىمەن سەگىز جىلعا شارتتى تۇردە سوتتالدى. ونىڭ گەنەرال اتاعى مەن مەملەكەتتىك ماراپاتتارى الىندى. ءبىراق مەنشىك-مۇلكىنە كونفيسكاسيا جاسالمادى»، – دەلىنگەن جازبادا.
ونىڭ جازۋىنشا، بۇعان دەيىن قازاقستاندا ەشكىم سەگىز جىلعا شارتتى تۇردە سوتتالماعان.
باس پروكۋروردىڭ ورىنباسارى اسەت شىندالييەۆ سامات ءابىش ىسىنە قاتىستى قوسىمشا اقپارات بەرگەن بولاتىن.
«مەن تەك ءىستىڭ سوتتا قارالىپ جاتقانىن بىلەمىن. ول – قازاقستاندا. بۇعان دەيىن ودان ەشقايدا كەتپەۋ تۋرالى قولحات الىنعان. قالعانىن ايتا المايمىن. ءىس سوتتا قارالىپ جاتقاندىقتان، ونىڭ مارتەبەسى سوتتالۋشى»، – دەدى اسەت شىندالييەۆ.
سونداي-اق قىلمىستىق ىستە مەملەكەتتىك قۇپيا بارىن اتاپ ءوتتى.
بىلتىر قازان ايىندا باس پروكۋروردىڭ ورىنباسارى اسەت شىندالييەۆ نازاربايەۆتىڭ نەمەرە ءىنىسى ەشقايدا كەتپەۋ تۋرالى قولحاتپەن جۇرگەنىن ايتتى. ونىڭ پىكىرىنشە، تەرگەۋشىلەر ونىڭ قاشىپ كەتپەيتىنىنە سەنىمدى بولۋى مۇمكىن.
«تەرگەۋ ورگاندارى تەرگەۋ جۇمىستارىنا سۇيەنەدى. ولار ونىڭ ەشقايدا قاشپايتىنىنا سەنىمدى بولسا كەرەك. ول قىلمىستىق قۋدالاۋ ورگاندارى الدىنداعى زاڭ بويىنشا وزىنە جۇكتەلگەن مىندەتتەرىنىڭ ەشقايسىن بۇزباعان بولۋى مۇمكىن. سوندىقتان وعان باسقا بۇلتارتپاۋ شاراسىن قولدانۋ تۋرالى ماسەلە تۋىنداماعان»، – دەدى ول.
ونىڭ ايتۋىنشا، تەرگەۋ امالدارى ءجۇرىپ جاتىر. باسقا تەرگەۋ دەرەكتەرى جاريالانبايدى.
2023 جىلعى قىركۇيەكتە باس پروكۋراتۋرا سامات ابىشكە قاتىستى تەرگەۋدى باستادى. ول قاڭتار وقيعاسى كەزىندە لاۋازىمدى وكىلەتىن اسىرا پايدالاندى دەگەن كۇدىككە ىلىنگەن. اقپاراتقا سايكەس، تەرگەۋ بارىسىندا قۇپيا قۇجاتتار زەردەلەنىپ جاتىر. باس پروكۋراتۋرا كونستيتۋسياعا زاڭ مەن سوت الدىندا بارلىق ازامات تەڭ ەكەنىن ەسكە سالعان.
ۇقك ءتوراعاسىنىڭ ەكس-ورىنباسارى سامات ءابىش 2022 جىلى 17 قاڭتاردا قىزمەتىنەن بوساتىلعان ەدى. ال 2022 جىلعى 22 ماۋسىمدا ۇقك ءتوراعاسىنىڭ ورىنباسارى اسقار امەرحانوۆ سامات ابىشتەن جاۋاپ الىنىپ جاتقانىن حابارلاعان.
«سامات ءابىش تە تەرگەۋ وربيتاسىندا. ول كۋالىك بەرىپ جاتىر، ءبىراق مەن ونىڭ ستاتۋسىن بىلمەيمىن»، – دەگەن ەدى ول.
سامات ءابىش – قازاقستاننىڭ ەكس-پرەزيدەنتى نۇرسۇلتان نازاربايەۆتىڭ نەمەرە ءىنىسى. ونىڭ اعاسى قايرات ساتىبالدى 2022 جىلعى قىركۇيەكتە التى جىلعا سوتتالعان بولاتىن.