Alatau Aqparat مەدياحولدينگىنە قاراستى «الماتى اقشامى» گازەتىنىڭ ءفوتوتىلشىسى سامات قۇسايىنوۆتىڭ انكارادا فوتوكورمەسى ءوتتى، دەپ حابارلايدى aqshamnews.kz
«ۇلى دالانىڭ ءسالت-داستۇرى» – Türk Yurtlarında Büyük Bozkırın Kültürü» اتتى فوتوكورمەنى Alatau Aqparat مەدياحولدينگى مەن تۇركسوي حالىقارالىق تۇركى مادەنيەتى ۇيىمى بىرلەسىپ ۇيىمداستىردى.
كورمەگە تۇركسوي باس حاتشىسى سۇلتان رايەۆ، «TÜRKTAV» تۇركى تاريحى مادەني قورىنىڭ اتقارۋشى ديرەكتورى اسەل لاحايەۆا، انادولى مادەنيەتتەرى مۋزەيىنىڭ ديرەكتورى يۋسۋف كىراچ جانە باسقا دا قوناقتار قاتىستى. ارىپتەسىمىز، بەلگىلى فوتومامان سامات قۇسايىنوۆقا تۇركسوي باس حاتشىسى سۇلتان رايەۆتىڭ العىس حاتىن كومەكشىسى مەليك ءوزسوز تابىستادى.
«ۇلى دالا مادەنيەتى» كورمەسى – قازاق دالاسىنىڭ تاريحى، مادەنيەتى جانە ءومىر سالتىن تانىستىرۋ ماقساتىنداعى ەرەكشە ءىس-شارا. كورمە قازاقستاننىڭ كەڭ بايتاق گەوگرافياسىن، ونىڭ تاريحي جانە مادەني مۇراسىن، دالا تۇرعىندارىنىڭ تابيعاتپەن ۇيلەسىمدى ءومىرىن بەينەلەيدى.
«ۇلى دالا مادەنيەتى» كورمەسىندە سامات سەرىكباي ۇلى قازاقستاننىڭ ءار ايماعىنداعى ادامداردىڭ كۇندەلىكتى ءومىرىن بەينەلەپ، ولاردىڭ قوناقجايلىلىعىن، داستۇرلەرىن جانە تابيعاتپەن بايلانىسىن كورەرمەنگە اسەرلى جەتكىزدى. ونىڭ شىعارمالارى ۇلتتىق مادەني مۇرا رەتىندە باعالانىپ، فوتوجۋرناليستيكا سالاسىنداعى جەتىستىكتەرىمەن حالىق اراسىندا تانىمال.
كورمەنىڭ باستى ماقساتى – قازاقستاننىڭ مادەني مۇراسىن تانىتىپ، ۇلى دالانىڭ باي تاريحىن كوركەم تىلمەن بايانداۋ.
– مەنىڭ ماقساتىم – قازاق مادەنيەتىن، ۇلتتىق ويىنداردى، ادەت-عۇرىپتى سۋرەت ونەرى ارقىلى دارىپتەۋ. تۇرىك، ءازىربايجان، تاجىك – ءبارىن ۇستاپ ۇيىتىپ تۇرعان ول – ۇلتتىق ءسالت-داستۇر. ءبىز انادولىدا، جالپى شەت مەملەكەتتەردە قازاقتىڭ دا رۋحاني دۇنيەسى باي ەكەندىگىن دالەلدەي تۇسكىمىز كەلەدى.
ءبىزدىڭ كورمە تۇركيانىڭ «انادولى وركەنيەتتەرى مۇراجايىندا» ۇيىمداستىرىلدى. مۇراجاي نەگىزى – 1921 جىلى قالانعان. مۋزەي تۇركيانىڭ تۇڭعىش پرەزيدەنتى مۇستافا كەمال اتاتۇرىكتىڭ باسشىلىعىمەن كەڭەيىپ، عيماراتى جاڭارعان. بۇگىندە مۇراجايدا نەوليت، قولا ءداۋىرى، اسسيريا مەن ۋرارتۋ، حەتيتتەر مەن فريگيالار، ەجەلگى گرەسيا مەن ەجەلگى ريم، ۆيزانتيا جانە وسمان يمپەرياسى وركەنيەتتەرىنەن جيناقتالعان كوللەكسيالار ساقتالعان. ءتىپتى، تاريحى 7500 جىلعا باراتىن جادىگەرلەر بار. بۇل اۋماق «ۇلى جىبەك جولىنىڭ» ۇيىتقىسى بولعان. وسىعان قاراپ تۋعان ولكەم تاراز بەن انادولى اراسىندا دا مادەني ساباقتاستىق بولعانىن سەزەمىن.
تۇركى فوتوتىلشىلەرىنەن اسا ايىرماشىلىق بار دەپ ايتا المايمىز. ايتسە دە، تۇرىك اعايىنداردا 1984 جىلى «تۇرىك فوتو وداعى» قۇرىلىپتى. بيىل 40 جىلدىق مەرەيتويى ەكەن. ءبىز دە سوندا قوناق بولدىق، پىكىر ءھام تاجىريبە الماسىپ قايتتىق. وزدەرىنىڭ ىرگەلى جۋرنالى شىعاتىن كورىنەدى. ءارتۇرلى تەماتيكاعا بايلانىستى اتىمتاي ازاماتتاردىڭ قولداۋىنىڭ ارقاسىندا فوتوونەردى دارىپتەپ وتىرادى.
انادولى مۋزەيىندە فوتوونەرىمدى كورسەتۋ – زور قۋانىش ءارى قۇبىلىس! تۇركى مەملەكەتتەرىنىڭ ىنتىماقتاستىق كۇنىنە وراي تۇركسوي جانە «Alatau Aqparat» مەدياحولدينگتىڭ باستاماسى ءارى قولداۋىمەن انكارا تورىندە جەكە فوتوسۋرەت كورمەم اشىلىپ جاتىر. مەن ءۇشىن بۇل ۇلكەن مارتەبە، قۋانىش. سۋرەتتەرىمدە تۇركى ەلدەردىڭ ورتاق قۇندىلىقتارىن، سالت-داستۇرلەرىن كورسەتكىم كەلدى، - دەيدى سامات سەرىكباي ۇلى
ايتا كەتەيىك، ايگىلى ءفوتوتىلشى ساماتتىڭ شىعارماشىلىق كەشى تۋعان جەرى كونە تاراز جەرىنەن باستاۋ الىپ، باۋىرلاس ءتىلى، ءدىلى، ءدىنى ءبىر تۇبىرلەس تۇركيا ەلىندە جالعاسىن تاپتى.
ەل اراسىندا «ەلۋدە – ەل اعاسى» دەگەن اتالى ءسوز بار. راسىندا، وسى ۇلاعاتتى ويدىڭ استارىندا تالاي ماعىنا جاتىر. اتاجۇرتتان انادولىعا بارىپ، قازاقتىڭ ۇلتتىق قۇندىلىقتارىن فوتوونەرىمەن تانىتىپ جۇرگەن اقجارقىن ءجۇزدى اردا ازامات سامات سەرىكبايۇلىنا الار اسۋىڭ الدا بولسىن دەپ ارىپتەستەر بولىپ تىلەك بىلدىرەمىز!