قازاقستان ۇكىمەتى سالىقتان جالتارۋعا قارسى كۇرەستى كۇشەيتۋدى كوزدەپ وتىر. بۇل تۋرالى ۇلتتىق ەكونوميكا مينيسترلىگىنىڭ سالىق جانە كەدەن ساياساتى دەپارتامەنتىنىڭ ديرەكتورى ەرلان ساعنايەۆ مالىمدەدى، دەپ حابارلايدى Aqshamnews.kz. ونىڭ ايتۋىنشا، اسىرەسە سالىقتى بولشەكتەۋ ارقىلى مىندەتتەمەلەردەن جالتارۋ – ەل بيۋدجەتىن ميللياردتاعان تەڭگەدەن ايىرىپ، الەۋمەتتىك ينفراقۇرىلىمنىڭ دامۋىنا كەدەرگى كەلتىرۋدە.
ەرلان ساعنايەۆ سالىق تولەۋدەن جالتارۋ ارەكەتتەرىن قوعام الدىنداعى جاۋاپكەرشىلىكتەن قاشۋ دەپ باعالايدى. ونىڭ ايتۋىنشا، مۇنداي قادامدار بيۋدجەتكە تۇسەتىن كىرىستى ازايتىپ، ونىڭ سالدارىنان جاڭا مەكتەپتەر، اۋرۋحانالار مەن جولدار سالۋعا قاجەتتى قاراجات جەتپەيدى.
«كولەڭكەلى سحەمالاردى قولدانعان كاسىپكەرلەر سالىقتان جالتارىپ، مەملەكەتتى ەمەس، ءوز قالتالارىن عانا ويلايدى. ولار شىن مانىندە قاراپايىم حالىقتىڭ مۇمكىندىگىن ۇرلاپ وتىر. بۇل – ساپالى ءبىلىم مەن مەديسينادان ايىرۋ دەگەن ءسوز»، – دەدى ساعنايەۆ.
قۇرىلىس سالاسىنداعى كولەڭكەلى ەكونوميكا – باستى نازاردا
ساعنايەۆتىڭ ايتۋىنشا، قۇرىلىس سالاسى – سالىقتان جالتارۋ ءجيى تىركەلەتىن باعىتتاردىڭ ءبىرى. بۇعان دەيىن سالاعا بەرىلگەن قوسىلعان قۇن سالىعىنان (ققس) بوساتۋ جەڭىلدىكتەرىنە قاراماستان، تۇرعىن ءۇي باعاسى 21 ەسەگە دەيىن قىمباتتاعان.
«سالىقتىق جەڭىلدىكتەر جويىلعان جاعدايدا، قۇرىلىس سالاسىنان بيۋدجەتكە كەمىندە 130 ملرد تەڭگە قوسىمشا ءتۇسىم تۇسەر ەدى. بۇل قارجىعا كەمى 40 جاڭا مەكتەپ سالۋعا بولادى»، – دەدى ول.
سالىق تولەۋ – الەۋمەتتىك جاۋاپكەرشىلىك
قازاقستاندا سالىق تولەۋ تەك زاڭ الدىنداعى مىندەت ەمەس، ازاماتتىق جاۋاپكەرشىلىك رەتىندە قاراستىرىلا باستادى. بۇل – دامىعان ەلدەردە قالىپتاسقان سالىق مادەنيەتىنىڭ نەگىزى.
مەملەكەت بيزنەس ءۇشىن اشىق ءارى زاڭدى جۇمىس ىستەۋگە بارلىق جاعداي جاساپ وتىر. ەندى كاسىپكەرلەردەن كولەڭكەلى سحەمالاردان باس تارتۋ تالاپ ەتىلەدى.
«مەملەكەت زاڭدى بيزنەس جۇرگىزۋگە مۇمكىندىك بەرەدى. ءبىراق رەسۋرستاردى ءادىل ءبولۋ مەن تۇراقتى ەكونوميكالىق ءوسىم ءۇشىن كولەڭكەلى ەكونوميكادان تولىق باس تارتۋ قاجەت»، – دەيدى ساعنايەۆ.
باقىلاۋ كۇشەيتىلەدى
الداعى ۋاقىتتا سالىقتان جالتارۋ فاكتىلەرىن انىقتاۋ مەن الدىن الۋ شارالارى كۇشەيتىلەدى. بۇل ءادىل باسەكەلەستىك ورناتىپ، بيۋدجەتتى الەۋمەتتىك سالاعا ءتيىمدى باعىتتاۋعا مۇمكىندىك بەرەدى.
سالىقتان جالتارۋ – ەلدىڭ الەۋمەتتىك دامۋىنا تىكەلەي كەدەرگى. بيۋدجەتكە تۇسپەگەن ءاربىر تەڭگە – سالىنباعان مەكتەپ، قۇرال-جابدىقسىز اۋرۋحانا نەمەسە جوندەلمەگەن جول. سوندىقتان اشىق ەكونوميكا قۇرۋ مەن سالىق مادەنيەتىن قالىپتاستىرۋ – مەملەكەت قانا ەمەس، ءاربىر ازامات پەن كاسىپكەر ءۇشىن ورتاق مىندەت.