بيىلدان باستاپ جاڭا سالىق كودەكسى كۇشىنە ەندى. وزگەرىستەر مەن تولىقتىرۋلار ەنگىزىلگەن كودەكسكە ساي، بۇرىنعى جەتى ارنايى سالىق رەجيمىنىڭ ورنىنا تەك ۇشەۋى عانا قالدى.
بۇل وزگەرىستەر شاعىن عانا كاسىبىن دوڭگەلەتىپ وتىرعان كاسىپكەرلەر ءۇشىن دە باسقا مىندەتتەر مەن جۇكتەمەلەر ارتتى. ءتىپتى ايىنا 2 ميلليون تەڭگەدەن از تابىسقا يە كاسىپكەرلەر دۇرىس شەشىم قابىلداماسا، ايىپپۇلعا نەمەسە قوسىمشا سالىققا ۇرىنۋى مۇمكىن.
وسى ورايدا شاعىن بيزنەس يەلەرى ءۇشىن قاي سالىق رەجيمى ءتيىمدى، ققس شەگى قانداي جانە حابارلاما بەرۋ ءتارتىبى قالاي؟ بۇل سۇراقتاردى Aqshamnews.kz ءتىلشىسى قارجى ساراپشىسى بەكسۇلتان ارىستانبەكتەن ءسۇراپ-بىلدى.
كاسىپكەرلەر ءۇشىن سالىق رەجيمىن دۇرىس تاڭداۋ - بيزنەستىڭ تۇراقتى دامۋىنا تىكەلەي اسەر ەتەتىن ماڭىزدى شەشىم. قارجى ساراپشىسى بەكسۇلتان ارىستانبەك شاعىن كاسىپ يەلەرىنە قولجەتىمدى رەجيمدەر، 2026 جىلدان باستاپ ەنگىزىلگەن وزگەرىستەر جانە ءجيى جىبەرىلەتىن قاتەلىكتەر تۋرالى ايتىپ بەردى.
ساراپشىنىڭ ايتۋىنشا، تابىسى 2 ميلليوننان اسپايتىن كاسىپكەرلەر ءۇشىن ءۇش نەگىزگى ارنايى سالىق رەجيمى بار.
ءبىرىنشىسى - ءوزىن-وزى جۇمىسپەن قامتۋعا ارنالعان ءموبيلدى رەجيم. ول ءموبيلدى قوسىمشا ارقىلى راسىمدەلەدى جانە ايلىق تابىس شەگى شامامەن - 1،24 ملن تەڭگە. بۇل رەجيمدە 4% ءبىرىڭعاي تولەم تولەنەدى، ەسەپتىلىك وتە جەڭىل. الايدا قىزمەت تۇرلەرى شەكتەۋلى جانە جۇمىسشى ۇستاۋعا تىيىم سالىنعان. سوندىقتان بۇل جەكە ءوزى قىزمەت كورسەتەتىن ماماندارعا قولايلى.
ەكىنشىسى - پاتەنت نەگىزىندەگى رەجيم. مۇندا جىلدىق تابىس شەگى 14،5 ملن تەڭگەگە دەيىن جەتەدى. سالىق الدىن الا تولەنەدى، ەسەپتىلىك بارىنشا جەڭىلدەتىلگەن. ءبىراق كاسىپكەر تابىسىن الدىن الا ناقتى جوسپارلاۋعا ءتيىس جانە قىزمەت تۇرلەرىنە شەكتەۋ بار. بۇل كوبىنە تۇراقتى، ماۋسىمدىق ەمەس شاعىن بيزنەسكە ىڭعايلى.
ءۇشىنشىسى - وڭايلاتىلعان دەكلاراسيا نەگىزىندەگى ارنايى سالىق رەجيمى. بۇل رەجيم ەڭ ىڭعايلى بولىپ سانالادى: جۇمىسشى سانىنا شەكتەۋ جوق، ستاۆكا - 4%، ال اينالىم ءليميتى وتە جوعارى. بيزنەستى كەڭەيتۋدى، سەرىكتەستەرمەن جۇمىس ىستەۋدى كوزدەگەن كاسىپكەرلەر ءۇشىن ءتيىمدى.
بەكسۇلتان ارىستانبەكتىڭ سوزىنشە، وسى دەڭگەيدەگى كاسىپكەرلەر ءۇشىن ەڭ جاعىمدى جايت - قوسىلعان قۇن سالىعى مەن الەۋمەتتىك سالىقتىڭ تولەنبەۋى. نەگىزگى سالىق - 4%. الايدا مىندەتتى الەۋمەتتىك تولەمدەر ساقتالادى: زەينەتاقى جارناسى، مەديسينالىق ساقتاندىرۋ جانە الەۋمەتتىك اۋدارىمدار.
2026 جىلدان باستاپ شاعىن بيزنەسكە قاتىستى ءبىرقاتار ماڭىزدى وزگەرىستەر كۇشىنە ەندى. وڭايلاتىلعان دەكلاراسيا رەجيمى ساقتالدى، الايدا جەرگىلىكتى ءماسليحاتتار سالىق مولشەرلەمەسىن 2–6% ارالىعىندا وزگەرتە الادى. سونىمەن قاتار، ققس بويىنشا تىركەۋ شەگى 10 000 اەك-كە دەيىن كوتەرىلدى. بۇل كوپتەگەن كاسىپكەرگە ققس-سىز جۇمىس ىستەۋگە مۇمكىندىك بەرەدى.
ساراپشى ەڭ ماڭىزدى تالاپقا ەرەكشە نازار اۋدارۋعا كەڭەس بەرەدى: ءار جىلدىڭ 1 ناۋرىزىنا دەيىن قولداناتىن سالىق رەجيمى تۋرالى مىندەتتى تۇردە حابارلاما بەرۋ قاجەت. بۇل تالاپ ورىندالماسا، كاسىپكەر اۆتوماتتى تۇردە جالپىعا بىردەي سالىق رەجيمىنە كوشەدى. ال بۇل - جوعارى سالىق جۇكتەمەسى مەن كۇردەلى ەسەپتىلىك دەگەن ءسوز.
تابىسى بەلگىلەنگەن ليميتتەن اسىپ كەتكەن جاعدايدا دا كاسىپكەر جەدەل ارەكەت ەتۋگە ءتيىس. ۋاقىتىندا رەجيمدى اۋىستىرماۋ ايىپپۇلدارعا، قايتا ەسەپتەۋگە جانە سالىقتىق تەكسەرۋلەرگە اكەلۋى مۇمكىن.
سونىمەن قاتار، وڭايلاتىلعان دەكلاراسيا رەجيمى كەي جاعدايدا كليەنت جوعالتۋ تاۋەكەلىن تۋدىرادى. اسىرەسە ءىرى كومپانيالارمەن جۇمىس ىستەيتىن كاسىپكەرلەر ءۇشىن ققس-تىڭ بولماۋى قيىندىق كەلتىرۋى مۇمكىن. ال جەكە تۇتىنۋشىلارمەن جۇمىس ىستەيتىندەر ءۇشىن بۇل ماسەلە اسا وزەكتى ەمەس.
قورىتىندىلاي كەلە، قارجى ساراپشىسى سالىق رەجيمىن تەك ەسەپ-قيساپ رەتىندە ەمەس، بيزنەس-مودەلدىڭ ءبىر بولىگى رەتىندە قاراستىرۋ قاجەت ەكەنىن ايتادى.
"الدىن الا جوسپارلاۋ مەن سانالى تاڭداۋ - كاسىپكەر ءۇشىن ەڭ ارزان ءارى ەڭ دۇرىس شەشىم"، – دەيدى بەكسۇلتان ارىستانبەك.