الماتى وبلىسىندا 14 جاسىندا 22 اۆتوكولىكتىڭ يەسى اتانعان ءجاسوسپىرىم تۇرادى. بۇل - ەشقانداي دا اڭىز ەمەس، اۋىلدان شىققان العىر بالانىڭ جەتىستىگى. 6 جاسىنان اتقا قونىپ، بايگە ونەرىنىڭ قىر-سىرىن مەڭگەرگەن ابزال تۇرعانبەك بۇگىندە رەسپۋبليكالىق دەڭگەيدەگى تالاي دودادا توپ جارىپ ءجۇر. Aqshamnews.kz ءتىلشىسى جاس شاباندوزبەن تىلدەسىپ، ونىڭ جەڭىسكە تولى جولى، كوماندا ەڭبەگى جانە بولاشاق ارمانى تۋرالى سۇراپ ءبىلدى.
"جىلقىعا اكەم ۇيرەتتى": التى جاسىنان اتقا قونعان ابزال
ابزال تۇرعانبەك - الماتى وبلىسى، جامبىل اۋدانى، اقتەرەك اۋىلىنىڭ تۋماسى. ءقازىر ول تۋعان اۋىلىنداعى ورتا مەكتەپتە 9-سىنىپتا وقيدى. بۇگىندە ول باس-اياعى 500 بايگەگە قاتىسقان. سونىڭ ىشىندە "جەتىسۋ جۇيرىگى"، "ەلوردا كۋبوگى"، كەمەل توقايەۆتىڭ 100 جىلدىعىنا ارنالعان بايگە، قازاقستان چەمپيوناتىنىڭ Olympbet توپ بايگە فينالى، اباي قۇنانباي ۇلىنىڭ 180 جىلدىعىنا ارنالعان الامان بايگەلەردىڭ جەڭىمپازى اتاندى.
"مەنى جىلقىعا مىنۋگە اكەم ۇيرەتتى. ال بايگەنى كاسىبي دەڭگەيدە ءتۇسىندىرىپ، ۇلكەن جارىستارعا الىپ شىققان باپكەرىم - مۇرات ارىقبايەۆ. اۋىلدا تايعا ءمىنىپ، شاعىن بايگەلەردە شاۋىپ جۇرگەن كەزىمدە مۇرات اعا بايقاپ، ۇلكەن دوداعا دايىنداپ، شىڭداعان بولاتىن"، - دەيدى ول.
22 اۆتوكولىك ءقازىر قايدا؟ جەڭىس ارتىنداعى كوماندا ەڭبەگى
ابزال قازىرگە دەيىنگى دودالاردان 22 اۆتوكولىك جەڭىپ الدى. ءبىراق ول بۇل جەتىستىكتەردى جالعىز ءوزىنىڭ ۇلەسى دەپ سانامايتىنىن ايتتى.
"بايگە – ءبىر ادامنىڭ ەمەس، ءبۇتىن ءبىر جۇيەلى كوماندانىڭ جۇمىسى. ءار ناتيجەنىڭ ارتىندا باپكەردىڭ، اتقوسشىلاردىڭ ۇلەسى بولادى. ويتكەنى ول جارىستارعا دايىنداپ، اتتى قىسقا دا، ۇزىن قاشىقتىققا دا باپتايدى. ال اتقوسشىلار تۇلپاردىڭ جەم-شوبىن بەرىپ، كۇتىمىن جاساپ، استىن تازالاپ، كۇيىن باقىلاپ وتىرادى، باپكەردىڭ تاپسىرماسىن بۇلجىتپاي ورىندايدى. ولاردىڭ دا ەڭبەگى وراسان زور"، – دەيدى شاباندوز.
ول جەڭىپ العان كولىكتەردىڭ ءبىر بولىگى ساتىلعانىن، ال كەيبىرىن بايگەگە قوسىلعان تۇلپاردىڭ يەلەرى الىپ قالاتىنىن ايتتى.
ەڭ قىمبات جۇلدە مەن ەڭ قىزىق ەستەلىك
ابزال ۇتقان كولىكتەردىڭ ىشىندەگى ەڭ قىمباتى 23 ملن تەڭگە تۇرادى. ال ەڭ قىزىق ەستەلىك قالدىرعانى – 2023 جىلى سىر وڭىرىندە وتكەن مىحان ەرنياز ۇلىنىڭ 130 جىلدىعىنا ارنالعان قۇنان بايگەدەگى باس جۇلدە. سول جارىستا ول Hyundai i30 كولىگىن جەڭىپ العان.
ەڭ قىزىق ءساتتى دە ابزال ءدال وسى بايگەمەن بايلانىستىرادى. بۇل بايگەدە ول ءوزىنىڭ ۇتىمدى ءادىسىنىڭ ارقاسىندا وزا شاپقانىن جەتكىزدى:
"12 شاقىرىمدىق باسەكەگە 46 قۇنان شىعىپ، جارىس 6 اينالىمعا سوزىلدى. مەن العاشقى ءتورت اينالىمدا قۇنانىمدى "اشىتپاي"، الدىعا بىردەن ۇمسىنباي، قارقىنىن ساقتاپ وتىردىم. ال سوڭعى ەكى اينالىمدا تاكتيكانى وزگەرتىپ، توپقا جەتىپ، سوڭعى 500 مەتردە قۇناندى بار كۇشىنە سالدىم. ناتيجەسىندە باس جۇلدە بۇيىردى"، - دەيدى ابزال.
ابزالدىڭ اق ادال ارمانى نە؟
شاباندوزدىڭ كۇن ءتارتىبى ماۋسىمعا قاراي وزگەرەدى. جازدا ول تۇلپار دايىندايتىن جەرگە كەتىپ، تاڭعى 5–6-دا اتقا قونادى. سەبەبى تاڭعى سالقىن – ءارى شاباندوزعا، ءارى تۇلپارعا قولايلى ۋاقىت.
«اتتاردىڭ كۇنگە كۇيىپ، ءجۇنى سارعايىپ كەتپەۋى ءۇشىن ەرتەرەك مىنەمىز. دايىندىق ۇزدىكسىز جۇرەدى: قىس، كوكتەم، جاز بويى ات ءمىنۋ توقتامايدى. ىستىق-سۋىققا قاراماي سۋىتۋ، «اششى تەرىن الۋ»، قالىپقا ءتۇسىرۋ – كۇندەلىكتى جۇمىس. قاي بايگەدە قاي اتقا شاباتىنىمدى باپكەر شەشەدى: "بايگەگە جاقىن قالعاندا سەن وسى اتقا شاباسىڭ" دەپ ناقتى بەكىتەدى"، - دەيدى ابزال دايىندىعى جايلى.
جاس شاباندوزدىڭ تىرەگى – وتباسى، باپكەرى، باۋىرلارى مەن سىنىپتاستارى. ونىڭ اعاسى، اپكەسى جانە 5 قارىنداسى بار. ال ابزالدىڭ ەندىگى ەڭ ۇلكەن ماقساتى – سالماعى ارتقان سوڭ كلاسسيكالىق ات شابىسىنا اۋىسىپ، كاسىبي دەڭگەيدە حالىقارالىق ارەنالاردا شاۋىپ كورۋ.
"فرانسيا، گەرمانيا، دۋبايدا كلاسسيكالىق ات شابىسقا شاپقىم كەلەدى. سول جاقتا ءجۇرىپ ات سپورتىنىڭ دامۋىنا ۇلەس قوسىپ، بيىك بەلەستەردى باعىندىرعىم كەلەدى"، – دەيدى ول.
ابزالدىڭ سۇيىكتى جىلقىسى - لازەر
جاس سپورتشىنىڭ ءوز قاتارلاستارىنا ايتاتىن كەڭەسى دە مول. ول جاسوسپىرىمدەرگە بوس ۋاقىتتى الەۋمەتتىك جەلىگە جۇمساماي، اتقا ءمىنىپ، بايگەگە، كوكپارعا بارىپ، جىگىتتىك مىنەز قالىپتاستىرۋعا كەڭەس بەرەدى.