ۇكىمەت بيۋدجەت تاپشىلىعىن ءۇش جىلدا تومەندەتۋگە ۋادە بەردى. مينيسترلەر كابينەتى كەلەسى جىلى كۇشىنە ەنەتىن سالىق كودەكسىنە يەك ارتىپ وتىر. بولجام بويىنشا جاڭا ماڭىزدى قۇجاتتىڭ ارقاسىندا بيۋدجەتكە قوسىمشا 3 ترلن تەڭگەدەن استام قاراجات تۇسەدى. پارلامەنتتىڭ بىرلەسكەن وتىرىسىندا ولجاس بەكتەنوۆ كەلگەن اقشانىڭ بارلىعى تەك دامۋعا جۇمسالادى دەپ وتىر.
«ياعني كەزەكتە ينفراقۇرىلىمدىق نىسانداردى ىسكە قوسۋ، ەلەكتر قۋاتى كوزدەرىن، اۆتوموبيل جانە تەمىرجول جەلىسىن دامىتۋ، ينجەنەرلىك جەلىلەردى جاڭعىرتۋ سياقتى وتە ماڭىزدى مىندەتتەرگە جولدانادى. بۇل سالالار ۇزاق مەرزىمدى، تۇراقتى ەكونوميكالىق ءوسىمدى قامتاماسىز ەتۋگە نەگىز قالايدى. ءقازىر ءبىز كەلەسى 3 جىلعا ارنالعان رەسپۋبليكالىق بيۋدجەت جوباسىن دايىنداپ جاتىرمىز. وتە قىزۋ جۇمىس ءجۇرىپ جاتىر. الدىن الا ايتاتىنىم، ءبىز 2026 جىلى بيۋدجەت تاپشىلىعىن قازىرگى 2،7 پايىزدان 2،5 پايىزعا دەيىن، 2027 جىلى 1،8 پايىزعا دەيىن، 2028 جىلى 1،4 پايىزعا دەيىن تومەندەتەمىز دەپ جوسپارلاپ جاتىرمىز»، دەدى بەكتەنوۆ.