سالماعى التى كەلىدەن اساتىن الىپ بالا دۇنيەگە كەلدى

قاراعاندىلىق انا الىپ بالانى ومىرگە اكەلدى.

وبلىستىق كلينيكالىق اۋرۋحانانىڭ №1 پەريناتالدىق ورتالىعىندا سالماعى 6200 گرامم ءسابي دۇنيەگە كەلدى. الىپ بالا اتا-اناسىنا دا، دارىگەرلەر ءۇشىن دە توسىن سىي بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

ايەل پەرزەنتحاناعا تولعاعى قارقىنداي تۇسكەندە جەتكىزىلگەن. دارىگەرلەر ءسابيدىڭ سالماقتى بولاتىنىن الدىن الا پايىمداعان. سەبەبى، وتباسىندا بۇعان دەيىن تۋعان بالانىڭ سالماعى 4600 گرامم بولاتىن. الايدا، جاس بوسانعان انانىڭ ءۇشىنشى ءسابيى اعا-اپالارىنان دا ءىرى – 6 200 گرامم.

«بوسانۋ اسقىنۋسىز بولعان جوق، ءبىراق بريگادا شۇعىل جۇمىس ىستەدى. ناتيجەسىندە، انا مەن بالا ءۇشىن بارلىعى ءساتتى اياقتالدى، دارىگەرلەر ەكەۋىنىڭ دە جاعدايىن قاناعاتتانارلىق دەپ باعالايدى»، - دەپ مالىمدەدى وبلىستىق كلينيكالىق اۋرۋحانا باسشىلىعى.

ايتا كەتسەك، جىل باسىنان باستاپ №1 پەريناتالدىق ورتالىقتا سالماعى 4 كەلىدەن اسقان 174 نارەستە، سونىمەن قاتار 5 كگ بولعان 9 الىپ ءسابي دۇنيەگە كەلدى.

دارىگەرلەر بارلىق جۇكتى ايەلدەرگە ءوزىنىڭ جانە بالانىڭ سالماعىن باقىلاپ، ايتىلعان ۇسىنىستاردى ورىنداۋ كەرەكتىگىن، قاجەت بولعان جاعدايدا ديەتا ۇستاۋ كەرەكتىگىن ەسكەرتەدى. ويتكەنى، اۋىر سالماقتى ءسابيدى بوسانۋ – نارەستە مەن انا ءۇشىن قوسىمشا ءقاۋىپ.