سەنات ءتوراعاسى ماۋلەن اشىمبايەۆ الماتى قالاسىندا ساراپشىلارمەن، قوعامدىق ۇيىمداردىڭ كوشباسشىلارىمەن جانە زيالى قاۋىم وكىلدەرىمەن كەزدەستى، دەپ حابارلايدى Almaty-akshamy.kz.
كەزدەسۋلەر بارىسىندا «جاڭا قازاقستان» باعدارى، ەلىمىزدە جۇرگىزىلىپ جاتقان ساياسي جانە الەۋمەتتىك رەفورمالار، سونداي-اق، كونستيتۋسياعا وزگەرىستەر مەن تولىقتىرۋلار ەنگىزۋ جونىندە وتكىزىلەتىن رەسپۋبليكالىق رەفەرەندۋمگە دايىندىق ماسەلەلەرى كەڭىنەن تالقىلاندى.
كونستيتۋسياعا ەنگىزىلەتىن تۇزەتۋلەر، ەڭ الدىمەن، ادام قۇقىقتارىن قورعاۋدىڭ بارىنشا ءتيىمدى جۇيەسىن قالىپتاستىرۋدى كوزدەيدى. ەلىمىزدىڭ ءار ازاماتى جۇگىنە الاتىن كونستيتۋسيالىق سوت قۇرۋ، ءولىم جازاسىنىڭ كۇشىن جويۋ جانە ادام قۇقىقتارى جونىندەگى ۋاكىلدىڭ ءرولىن ارتتىرۋ سياقتى ناقتى شارالار وسى باعىتتاعى ماڭىزدى قادامدار.
كەزدەسۋ بارىسىندا قاراگوز سۇلەيمەنوۆا، كەنجەحان ماتىجانوۆ، مۇراتحان شوقان، ۇلىقبەك ەسداۋلەت، باقىتجان بۇقارباي، رينات زايىتوۆ، بولات ءابدىلمانوۆ، جانار ايجانوۆا، ومىربەك جۇبانيازوۆ، انار فازىلجان، ۇلجان بايبوسىنوۆا، ءجۇرسىن ەرمان، ايگۇل جانسەرىكوۆا، ساۋلە جيرەنشينا، ءسادۋاقاس اعىتايەۆ، ارمان جۇدەبايەۆ قوعامدىق جۇرتشىلىقتى تولعاندىرعان ءبىرقاتار وزەكتى ماسەلەنى ورتاعا سالدى.
ماۋلەن اشىمبايەۆ ەنگىزىلەتىن وزگەرىستەر پارلامەنتتىڭ ساياسي جۇيەدەگى ءرولىن جانە ونىڭ سايلاۋشىلار الدىنداعى جاۋاپكەرشىلىگىن ارتتىراتىنىن دا اتاپ ءوتتى.
«پارلامەنت سايلاۋىندا ارالاس ماجوريتارلىق-پروپورسيونالدى جۇيە ەنگىزىلەدى. ءماجىلىس قۇرامىنىڭ 30 پايىزى كەيىن ءبىر مانداتتى وكرۋگتەر بويىنشا سايلانا الادى. بۇل دەپۋتاتتاردىڭ ءوز سايلاۋشىلارى الدىنداعى جەكە جاۋاپكەرشىلىگىن ارتتىرادى. سايلاۋشىلار ءۇشىن سايلاۋ الدىنداعى ۋادەلەرىن ورىنداماعان دەپۋتاتتى كەرى قايتارىپ الۋ مۇمكىندىگى تۋادى. سەنات وڭىرلەردىڭ مۇددەلەرىن قورعايتىن پالاتاعا اينالۋعا ءتيىس. قولعا الىنعان وزگەرىستەرگە بايلانىستى سەناتتىڭ وكىلەتتىگى كەڭەيتىلەدى. پالاتا ەل پرەزيدەنتىنىڭ كونستيتۋسيالىق سوتتىڭ جانە جوعارى سوت كەڭەسىنىڭ ءتوراعالارىن تاعايىنداۋىنا كەلىسىم بەرەدى»، – دەدى ماۋلەن ساعاتحان ۇلى.
سونداي-اق كونستيتۋسياعا ەنگىزىلگەن وزگەرىستەردىڭ ناتيجەسىندە وڭىرلەردىڭ دەربەستىگى دە ارتا تۇسەتىنى ايتىلدى.
جوعارى پالاتا ءتوراعاسى جيىندى تۇيىندەي كەلىپ، اتا زاڭعا ەنگىزۋ ءۇشىن ۇسىنىلعان وزگەرىستەر ساياسي باسەكەلەستىكتى كۇشەيتۋگە جانە بيلىك مونوپولياسىن جويۋعا ارنالعانىن ايتتى. ايتىلعان ۇسىنىستار زەردەلەنىپ، الداعى ۋاقىتتا ەسكەرىلەتىنىن نازارعا سالدى.