رەفەرەندۋمدا الماتى تۇرعىندارىنىڭ داۋىس بەرۋ بارىسى تۋرالى «ازاماتتىق باستامالار ورتالىعى» قب ۇكىمەتتىك ەمەس ۇيىمى شتابىنىڭ باسشىسى قۇدىشيەۆا بوتاگوز قينايات قىزى، سونداي-اق شتاب مۇشەلەرى – الپىسوۆا ساۋلە مۇرات قىزى، تاجىبايەۆ جاسۇلان باكىر ۇلى ايتىپ بەردى.
- «ازاماتتىق باسقارما ورتالىعى» قب مەن «قوعامدىق جوبا» قب رەفەرەندۋم دايىندىعىنا ءوز ۇلەسىن قوستى. ەكى ۇيىم بىرىگە وتىرىپ 1500-داي تاۋەلسىز باقىلاۋشى دايىنداپ شىعاردى. ءبىزدىڭ دايىندىقتان وتكەن باقىلاۋشىلار رەفەرەندۋمنىڭ ساپالى ءارى اشىق وتۋىنە بارىنشا كومەك جاسايدى دەپ ويلايمىن، – دەدى «ازاماتتىق باستامالار ورتالىعى» قب شتابىنىڭ باسشىسى بوتاگوز قۇدىشيەۆا.
- الماتىلىقتار رەفەرەندۋمعا بۇكىل وتباسىمەن كەلىپ جاتىر، ەگدە جاستاعى ادامدار مەن جاستاردىڭ دا اياق الىسى جامان ەمەس. ءبىزدىڭ باقىلاۋشىلارىمىز بارىنشا كاسىبي ءارى جىلدام جۇمىس ىستەپ جاتىر. بارلىق قۇقىقبۇزۋشىلىقتاردى تىركەۋگە تىرىسۋدا. باقىلاۋ ناتيجەلەرىنىڭ وڭ تۇستارىن دا، تەرىس جاقتارىن دا ەشكىمنەن جاسىرماي الەۋمەتتىك جەلىلەردە جاريالاپ جاتىرمىز. قانداي دا ءبىر كۇماندى جاعدايلار بويىنشا الماتى سايلاۋ كوميسسياسىمەن بايلانىستامىز. جالپى سوڭعى جىلدارى باقىلاۋشىلاردىڭ كاسىبي بىلىكتىلىگى وسكەنى بايقالادى، – دەدى ساۋلە الپىسوۆا.
- الماتى سايلاۋشىلارىنىڭ ءبىر ەرەكشەلىگى – ءبىزدىڭ قالامىزدىڭ تۇرعىندارى تاڭەرتەڭ اسقان بەلسەندىلىك تانىتپايدى. الايدا، تۇستەن كەيىن ادامدار بەلسەندىلىگى كۇرت كوبەيەدى. ءبىز وسىنداي جاعدايعا كۋا بولىپ وتىرمىز. سوڭعى 1-2 ساعاتتىڭ وزىندە ورتالىق اۋدانداردا سايلاۋشىلار سانى 10 ەسەگە ارتتى. سونداي-اق، قالا بويىنشا سايلاۋ ۋچاسكىسىنە العاش كەلگەن داۋىس بەرۋشىگە جانە 100ء-شى كەلگەن ادامعا ارنايى سىيلىقتار بەرىلگەنىن ايتا الامىز. داۋىس بەرۋ بارىسىندا قۇجاتتارىن ۇمىتىپ كەتكەن، مۇنداي شاراعا العاش رەت كەلگەن ادامداردىڭ بارلىعىنا ءتيىستى كومەك كورسەتىلىپ جاتىر – دەدى جاسۇلان تاجىبايەۆا.