سايلاۋشىلار ءوز ۋچاسكەسىنىڭ مەكەنجايىن بىرنەشە ءتاسىل ارقىلى انىقتاي الادى

داۋىس بەرۋشىلەر ءوز سايلاۋ ۋچاسكەلەرىن قالاي تابا الادى؟

بىرىنشىدەن، سايلاۋ ۋچاسكەلەرىن «جسن بويىنشا سايلاۋ ۋچاسكەسىن ىزدەۋ» اقپاراتتىق سەرۆيسى ارقىلى تابۋعا بولادى، دەپ حابارلايدى Almaty-akshamy.kz.

ول ءۇشىن جوعارىدا كورسەتىلگەن سىلتەمە بويىنشا ءوتىپ، تۇرىپ جاتقان ايماعىڭىزدى تاڭدايسىز. سودان سوڭ  جسن ەنگىزىپ، «تابۋ» باتىرماسىن باساسىز. بىرەر سەكۋندتان كەيىن قاجەتتى اقپاراتتى الا الاسىز.

ەكىنشى ءتاسىل بايلانىس وپەراتورلارىنىڭ كومەگىمەن جۇزەگە اسىرىلادى. اتاپ ايتقاندا، ۇيالى تەلەفونعا سمس ارقىلى اقپاراتتىق سەرۆيستىڭ سىلتەمەسى جىبەرىلەدى.

سونداي-اق سايلاۋ ۋچاسكەسىن «1414»، «109» call-ورتالىعىنا حابارلاسىپ بىلۋگە بولادى.

ەگەر سايلاۋ كۇنى باسقا ەلدى مەكەندە بولۋدى جوسپارلاساڭىز، وندا ءوز سايلاۋ ۋچاسكەڭىزگە حابارلاسىپ، داۋىس بەرۋ قۇقىعىنا سىرتتاي كۋالىك الۋىڭىز كەرەك. وسى قۇجاتپەن ءسىز باسقا ەلدى مەكەندە داۋىس بەرە الاسىز.

ايتا كەتسەك، سايلاۋ ۋچاسكەسىنە جەكە كۋالىكتى الىپ بارۋ قاجەت. سونداي-اق eGov، Kaspi قوسىمشاسىنداعى سيفرلىق جەكە كۋالىكتى كورسەتۋگە بولادى.

ەسكە سالايىق، قازاقستاندا كەزەكتەن تىس پرەزيدەنت سايلاۋى 20 قاراشادا ساعات 07:00-20:00 ارالىعىندا وتەدى.