سايلاۋعا تۇسۋگە ءوتىنىش بەرگەن 3 كانديدات سوڭعى 10 جىلدا قازاقستان اۋماعىندا تۇرعانىن دالەلدەي الماعان.
سەبەبى ورتالىق سايلاۋ كوميسسياسى ولارعا كەي جىلدارى «شەتەل اسىپ كەتتى» دەپ كۇمان كەلتىرگەن. الايدا تىركەۋدەن شىعىپ قالعاندار سوتقا ارىزدانىپ، ساياسي دوداعا قاتىسۋعا جارامدى دەپ تانىلعان، دەپ حابارلايدى Almaty-akshamy.kz. Qazaqstan.tv-عا سىلتەمە جاساپ.
«قازاقستان زاڭگەرلەر وداعى» قۇرعان ارنايى شتاب وسى ىسپەتتەس ماسەلەلەردە كانديداتتار ءوز قۇقىعىن قورعاي ءبىلۋى كەرەك دەيدى. سونداي-اق شتاب مۇشەلەرى ناسيحات ناۋقانى باستالماي جاتىپ، ۇگىت جۇرگىزۋشىلەردىڭ دە كوبەيگەنىن ايتادى.
بۇل بويىنشا كانديداتتاردىڭ ۇستىنەن تۇسكەن ارىز بىردەن ورتالىق سايلاۋ كوميسسياسى مەن پروكۋراتۋراعا جولدانادى.
«قازىرگى ۋاقىتتا تەك تىركەۋ پروسەسى ءجۇرىپ جاتىر. ال ۇگىتتەۋ، ۇگىت-ناسيحات پروسەسى 18-نەن كەيىن بولادى. وعان دەيىن ونداي اڭگىمەلەر بولماۋى كەرەك. تەك زاڭنىڭ دەڭگەيىندە جۇمىس ىستەۋ كەرەك. ەگەر شىنىندا دا سونداي نارسە ءورشىپ، بىر-بىرىنە دەگەن تالاپ-ارىز جازىپ، سايلاۋ كوميسسيالارىنا بەرىپ جاتسا، كىنالى جاقتى الىپ تاستاۋى مۇمكىن سايلاۋدان»، - دەيدى «قازاقستان زاڭگەرلەر وداعى» رقب ءتوراعاسى سەرىك اقىلباي.