سايلاۋدا زاڭ بۇزۋشىلىق انىقتالعان جوق - بايقاۋشىلار

 ەلدە ءوتىپ جاتقان سايلاۋ بارىسىن حالىقارالىق بايقاۋشىلار باقىلاۋدا.

استانا قالاسىنداعى №111 سايلاۋ ۋچاسكەسىندەگى داۋىس بەرۋ بارىسىن تاۋەلسىزدىك مەملەكەتتەر دوستاستىعىنا مۇشە ەلدەردىڭ پارلامەنتارالىق اسسامبلەياسىنىڭ بايقاۋشىلارى قاداعالاپ جاتىر، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«ءبىزدىڭ ساراپشىلار سايلاۋ پروسەسىن رەتتەيتىن بارلىق زاڭنامانى قارادى، ەشقانداي زاڭ بۇزۋشىلىق انىقتالعان جوق. ءبىز زاڭنامالىق قورىتىندىنى پارلامەنتتىڭ ەكى پالاتاسى مەن ورتالىق سايلاۋ كوميسسياسىنا الدىن الا جىبەردىك. سايلاۋدى رەتتەۋگە قاتىستى بارلىق تالاپ پەن ەرەجە زاڭ اياسىندا ناقتىلانعان. ءبىزدىڭ بايقاۋشىلار قازاقستان اۋماعىندا جانە 13 ەلدىڭ سايلاۋ ۋچاسكەسىندەگى جاعدايدى سوڭىنا دەيىن باقىلايدى. قورىتىندى بەيتاراپ تۇردە شىعارىلادى. ءبىز ونىڭ ناتيجەسىن ورتالىق سايلاۋ كوميسسياسىنىڭ وتىرىسىندا جاريالايمىز»، - دەدى تمد-عا مۇشە مەملەكەتتەردىڭ پارلامەنتارالىق اسسامبلەياسىنىڭ حالىقارالىق بايقاۋشى دميتريي كوبيسكيي.

بۇگىنگى سايلاۋ بارىسىن تمد پارلامەنتارالىق اسسامبلەياسى تاراپىنان 67 بايقاۋشى قاداعالاپ جاتىر.

«ونىڭ ىشىندە 15 بايقاۋشى قازاقستاندا جۇمىس ىستەۋدە. قالعانى شەتەلدەگى سايلاۋ ۋچاسكەلەرىندە جاعدايدى باقىلاپ جاتىر»، - دەدى تمد-عا مۇشە مەملەكەتتەردىڭ پارلامەنتارالىق اسسامبلەياسىنىڭ حالىقارالىق بايقاۋشى ديلرابو مانسۋري.