«اۋىل» حدپپ
ورتالىق سايلاۋ كوميسسياسى «اۋىل» حالىقتىق-دەموكراتيالىق پاتريوتتىق پارتياسىنان ق ر پرەزيدەنتتىگىنە ۇسىنىلعان ۇمىتكەر جيگۋلي دايرابايەۆتىڭ تالاپقا سايكەستىگى تۋرالى قاۋلى قابىلدادى، دەپ حابارلايدى Almaty-akshamy.kz.
ج.دايرابايەۆتىڭ سايكەستىگى تۋرالى وسك مۇشەسى اسىلبەك سماعۇلوۆ بايانداما جاساعان.
«قۇزىرەتتى مەملەكەتتىك ورگانداردان كەلگەن مالىمەتتەرگە ساي ازامات جيگۋلي مولداقالىق ۇلى دايرابايەۆقا قاتىستى قازاقستان رەسپۋبليكاسى پرەزيدەنتتىگىنە كانديدات رەتىندە تىركەلۋگە كەدەرگىلەر جوق ەكەنى انىقتالدى.
ماسەلەن، ق ر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ مالىمەتىنە ساي جيگۋلي مولداقالىق ۇلى دايرابايەۆ قازاقستان رەسپۋبليكاسىنىڭ پرەزيدەنتتىگىنە كانديداتتارعا قويىلاتىن كونستيتۋسيالىق جانە «ق ر سايلاۋ تۋرالى» كونستيتۋسيالىق زاڭى تالاپتارىنا سايكەس كەلەدى.
ىشكى ىستەر مينيسترلىگى ۇسىنعان مالىمەتكە ساي، جيگۋلي مولداقالىق ۇلى دايرابايەۆ تۋمىسىنان قازاقستان رەسپۋبليكاسىنىڭ ازاماتى بولىپ تابىلادى، قازاقستاندا سوڭعى 67 جىل بويى تۇرادى»، - دەدى اسىلبەك سماعۇلوۆ.
سونداي-اق ول لينگۆيستيكا كوميسسياسى كەشە اتالعان ۇمىتكەردىڭ مەملەكەتتىك ءتىلدى ەركىن مەڭگەرگەنى تۋرالى قورىتىندى شىعارعانىن ەسكە سالدى.
«ق ر مەملەكەتتىك قىزمەت ىستەرى اگەنتتىگى ۇسىنعان مالىمەتكە ساي، ج.دايرابايەۆتىڭ مەملەكەتتىك قىزمەتتەگى جانە سايلانبالى مەملەكەتتىك لاۋازىمدارداعى جۇمىس تاجىريبەسى – 7 جىل.
ق ر ادىلەت مينيسترلىگى ۇسىنعان مالىمەتكە ساي، ق ر پرەزيدەنتتىگىنە كانديدات ۇسىنعان «اۋىل» حالىقتىق-دەموكراتيالىق پاتريوتتىق پارتياسى» قب ادىلەت مينيسترلىگىندە تىركەلگەنى تۋرالى قۇجاتى بار»، - دەدى وسك مۇشەسى.
وسىعان بايلانىستى ورتالىق سايلاۋ كوميسسياسى قاۋلى قابىلدادى:
1. قازاقستان رەسپۋبليكاسىنىڭ پرەزيدەنتتىگىنە كانديدات جيگۋلي مولداقالىق ۇلى دايرابايەۆ قازاقستان رەسپۋبليكاسىنىڭ كونستيتۋسياسىندا جانە «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ 1995 جىلعى 28 قىركۇيەكتەگى كونستيتۋسيالىق زاڭىندا وعان قويىلاتىن تالاپتارعا سايكەس ەكەنى انىقتالسىن.
2. قازاقستان رەسپۋبليكاسىنىڭ پرەزيدەنتتىگىنە كانديداتتى قولدايتىن قولداردى جيناۋ ءۇشىن قول قويۋ پاراقتارى قاجەتتى مولشەردە بەرىلسىن.
قول جيناۋدى كانديداتتىڭ سەنىم بىلدىرىلگەن ادامدارى جۇزەگە اسىرادى. سەنىم بىلدىرىلگەن ادامداردى تىركەۋدى اۋماقتىق سايلاۋ كوميسسيالارى ورتسايلاۋكومنىڭ 2011 جىلعى 21 قاراشاداعى № 62/108 قاۋلىسىمەن بەكىتىلگەن نۇسقاۋلىق نەگىزىندە جۇزەگە اسىراتىن بولادى.
كەشە ورتالىق سايلاۋ كوميسسياسى حالىق كواليسياسى ۇسىنعان قاسىم-جومارت توقايەۆ پەن «امانات» قازاقستان كاسىپوداقتار دوستاستىعى» رەسپۋبليكالىق بىرلەستىگى ۇسىنعان مەيرام قاجىكەننىڭ ق ر پرەزيدەنتتىگىنە كانديدات رەتىندە سايكەستىگىن بەلگىلەۋ تۋرالى قاۋلى قابىلداعان بولاتىن.
سونداي-اق كەشە «كاسىبي الەۋمەتتىك جۇمىسكەرلەر ۇلتتىق اليانسى» رەسپۋبليكالىق قوعامدىق بىرلەستىگىنەن پرەزيدەنتتىككە ۇسىنىلعان قاراقات ابدەن وسك-عا قۇجاتتارىن تاپسىردى.
ال «اۋىل» پارتياسىنان پرەزيدەنتتىككە ۇمىتكەر جيگۋلي دايرابايەۆ لينگۆيستيكا ەمتيحانىنان ءوتتى.