سالدەن كەيىن «قازاقستان» تەلەراديوكورپوراسياسىنىڭ ۇيىمداستىرۋىمەن «سايلاۋ-2023» ونلاين مارافونى باستالادى.
اۋقىمدى شارا تەلەارنالار مەن اقپارات اگەنتتىكتەرىنىڭ سايتتارىندا، Facebook جانە You Tube جەلىسىندەگى رەسمي پاراقشالارىندا 16 ساعات بويى ۇزدىكسىز كورسەتىلەدى، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
"قازمەديا" ورتالىعىنىڭ كينوكونسەرت زالىندا وتەتىن مارافونعا كەلەم دەۋشىلەرگە ەسىك اشىق.
مارافونعا اقپارات قۇرالدارىنىڭ وكىلدەرى، دەپۋتاتتار، ساياساتتانۋشىلار، مينيسترلەر، ءتۇرلى سالا قىزمەتكەرلەرى، قوعام بەلسەندىلەرى مەن ونەر جۇلدىزدارى قاتىسادى دەپ جوسپارلانعان. ال ءقازىر مارافوندى ۇيىمداستىرۋشىلار ازىرلىكتى پىسىقتاپ جاتىر.
ال بريفينگ الاڭىندا سايلاۋشىلاردىڭ ساياسي بەلسەندىلىگى بويىنشا ءار ساعاتتىڭ باسىندا جەدەل باسپا ءسوز كونفەرەنسيالارى ۇيىمداستىرىلىپ، حالىقارالىق بايقاۋشىلار، باس پروكۋراتۋرا، ىشكى ىستەر مينيسترلىگىنىڭ وكىلدەرى داۋىس بەرۋ بارىسىنا قاتىستى اقپارات بەرەدى.
توك-شوۋ فورماتىندا ءتۇرلى ساياسي-قوعامدىق تاقىرىپتاردا ديسكۋسسيا وتەدى. ال وسى جولعى ونلاين-مارافوننىڭ ەرەكشەلىگى - دەبات الاڭى. قاتىسۋشىلار جاساندى ينتەللەكت، بالا تاربيەسى، ينتەرنەت كونتەنتتى باقىلاۋ، مەملەكەتتىك تاپسىرىسپەن كىتاپ شىعارۋ ماسەلەلەرى، اۋىلداردى دامىتۋ، الەمدىك ميگراسيا، مەديسينالىق ساقتاندىرۋ تاقىرىپتارى بويىنشا ءوز پوزيسياسىن قورعايدى.
سونداي-اق، مارافون قوناقتارى ساياسي ناۋقان جايىنداعى ازاماتتىق پىكىرىن ەكسپرەسس-كامەرا ارقىلى بىلدىرە الادى. ال تۇنگى 00:00-دە مارافون الاڭىندا داۋىس بەرۋدىڭ الدىن الا ناتيجەلەرى بويىنشا Exit-poll قورىتىندىسى جاريالانادى.