بۇگىنگى رامىزدەر كۇنىنە وراي الماتىلىقتار مەملەكەتتىك ءانۇراندى ساياباقتاردا، ساۋدا ورتالىقتارى مەن قوعامدىق كەڭىستىكتەردە تىڭداي الادى.
4 ماۋسىمدا الماتى اكىمدىگىنىڭ باستاماسىمەن ساعات 13.00-دە مەملەكەتتىك ءانۇراندى قوسۋ جانە ورىنداۋ فلەشموبى وتەدى، دەپ حابارلايدى Almaty-akshamy.kz.
مەگاپوليس تۇرعىندارى مەن قوناقتارىن وسى اكسياعا قوسىلىپ، ءانۇران شىرقالعان كەزدە بارلىق ءتارتىپ ەرەجەلەرىن ساقتاي وتىرىپ، مەملەكەتتىك ءانۇراندى ورىنداۋعا شاقىرادى.
قالا تۇرعىندارى مەملەكەتتىك ءانۇراندى ساياباقتار مەن سكۆەرلەردە، كوشەلەردە، مەترو ستانسيالارى مەن ۆاگوندار اۋماعىندا، سوسو، «مەدەۋ» بيىك تاۋلى كەشەنى مەن «شىمبۇلاق» كۋرورتى، سونداي-اق «كوك توبە» ساياباعىندا تىڭداي الادى.
اكسيانىڭ ماقساتى — ازاماتتىق پەن پاتريوتتىققا، ءوز وتانى — قازاقستان رەسپۋبليكاسىنا دەگەن سۇيىسپەنشىلىككە تاربيەلەۋ، ەلدىڭ مەملەكەتتىك رامىزدەرىنە دەگەن قۇرمەتتى قالىپتاستىرۋ، سونداي-اق ولاردىڭ ءمانى مەن ماڭىزىن ءتۇسىنۋ.
ەسكە سالساق، مەملەكەتتىك ءانۇراندى كوپشىلىك الدىندا ورىنداۋ كەزىندە جينالعاندار تۇرىپ ءان ايتادى (تىڭدايدى)، ال قازاقستان رەسپۋبليكاسىنىڭ ازاماتتارى وڭ قولىن جۇرەك تۇسىنا قويادى. مەملەكەتتىك ءانۇران ءماتىنى مەن مۋزىكالىق باسىلىمعا سايكەس مەملەكەتتىك تىلدە ورىندالادى.