تاعى ءبىر جىل اياقتالۋعا جاقىن. جىل سوڭىندا وتكەن كەزەڭگە قورىتىندى جاساپ، بولاشاققا جوسپار قۇرۋ قاي سالادا دا داستۇرگە اينالعان. وسى ورايدا كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ باسقارما ءتوراعاسى رۇستەم تولەۋتايەۆ ينستيتۋتتىڭ اتقارعان جۇمىستارى تۋرالى ايتىپ بەردى.
“عىلىمي قىزمەت ءبىزدىڭ ينستيتۋت ءۇشىن باسىم باعىت بولعاندىقتان، 2025 جىلعى نەگىزگى جەتىستىكتەرىمىزدىڭ قاتارىندا ءتيىستى فارماسيەۆتيكالىق پراكتيكا تالاپتارىنا سايكەستىك (GPP) مارتەبەسىنىڭ بەرىلۋىن، سونداي-اق بيوەتيكا جونىندەگى جەرگىلىكتى كوميسسيانىڭ سەرتيفيكاتتالۋىن اتاپ وتۋگە بولادى.
حالىقارالىق ۇردىستەرگە ساي بولۋ جانە پاسيەنتتەرىمىزگە دياگنوستيكا مەن ەمدەۋدىڭ ەڭ جوعارى دەڭگەيىن قامتاماسىز ەتۋ ماقساتىندا ءبىلىم بەرۋ ۇدەرىسىنە ەرەكشە كوڭىل ءبولىندى: دارىگەرلەر قازاقستاننىڭ، تۇركيانىڭ، قىتايدىڭ، رەسەيدىڭ جانە باسقا دا ەلدەردىڭ جەتەكشى كلينيكالارىندا تاعىلىمدامادان ءوتىپ، زاماناۋي ادىستەردى مەڭگەردى جانە شەتەلدىك ارىپتەستەرىمەن تاجىريبە الماستى”، - دەيدى ر.تولەۋتايەۆ.
ءبىلىم مەن تاجىريبە الماسۋ، كاسىبي بايلانىستاردى نىعايتۋ ماقساتىندا بيىل شەتەلدىك جەتەكشى مامانداردىڭ قاتىسۋىمەن 10-نان استام ماستەر-كلاسس وتكىزىلىپ، اريتمولوگيا جانە ينتەرۆەنسيالىق ارالاسۋلار جاسالعان. اتاپ ايتقاندا: يسپانيا، اۆستريا، رەسەي، شۆەسيا، جۇڭگو، پولشا جانە باسقا دا جاقىن جانە الىس شەتەلدەردىڭ جەتەكشى ينتەرۆەنسيالىق كارديولوگتارى مەن اريتمولوگتارىنىڭ قاتىسۋىمەن Farapulse Ablation تەحنولوگياسىن قولدانا وتىرىپ جاسالعان بىرەگەي جۇرەك وپەراسياسى، سوڭعى بۋىنداعى يننوۆاسيالىق وزدىگىنەن كەڭەيەتىن كلاپاندى يمپلانتاسيالاۋ ارقىلى ورىندالعان ءبىرقاتار TAVI وپەراسيالارى (الماتى قالاسىندا العاش رەت)، دارىلىك جابىنى بار باللونداردى قولدانۋمەن كۇردەلى ارالاسۋلار، جاساندى ينتەللەكتتى پايدالانا وتىرىپ جاڭا بۋىننىڭ تامىرىشىلىك ۋلترادىبىستىق زەرتتەۋلەرى، سونداي-اق CRT-P Amvia Sky قۇرىلعىسىن ورناتۋ ارقىلى جۇرەكتىڭ فيزيولوگيالىق ستيمۋلياسياسى جۇزەگە اسىرىلدى.
“ءبىز كارديوحيرۋرگيا سالاسىندا جۇرەككە جاسالاتىن ءمينيينۆازيۆتى وپەراسيالار مەن گيبريدتى تەحنولوگيالاردى – از ءينۆازيۆتى ارالاسۋلار، جۇرەك ترانسپلانتاسياسى جانە سول جاق قارىنشانىڭ جاساندى قۇرىلعىسىن (LVAD) يمپلانتاسيالاۋ وتالارىن جاساۋدى جالعاستىرىپ كەلەمىز. بيىل 5 جۇرەك ترانسپلانتاسياسى جاسالدى.
ق ر دەنساۋلىق ساقتاۋ ءمينيسترى اقمارال ءشارىپباي قىزىنىڭ تاپسىرماسىمەن حالىقارالىق ستاندارتتارعا ساي، اسقىنۋلاردىڭ الدىن الۋ مەن ەرتە دياگنوستيكالاۋعا ەرەكشە كوڭىل بولىنەتىن، زاماناۋي جابدىقتارمەن قامتىلعان رەسپۋبليكالىق ەندوكرينولوگيا جانە ديابەت ورتالىعى اشىلدى.
سونىمەن قاتار زاماناۋي ەندوسكوپيالىق وقۋ ورتالىعى قۇرىلدى. مۇندا تەك قازاقستاننان عانا ەمەس، ورتالىق ازيا ەلدەرىنىڭ دە ەندوسكوپيست-دارىگەرلەر دە بىلىكتىلىگىن ارتتىرا الادى. گاستروينتەستينالدىق ەندوسكوپيا سالاسىنداعى ەڭ وزىق جابدىقتارمەن جاراقتاندىرىلۋى ورتالىقتى نەوپلازيالاردى جانە قولجەتىمدىلىگى قيىن ىسىكتەردى، سونىڭ ىشىندە پانكرەاتوبيليارلىق ايماقتاعى تۇزىلىستەردى دياگنوستيكالاۋدىڭ جاڭا دەڭگەيىنە شىعاردى”، - دەيدى باسقارما ءتوراعاسى.
مەديسينا سالاسىنداعى حالىقارالىق ىنتىماقتاستىق دەنساۋلىق ساقتاۋدى دامىتۋدا، ءبىلىم مەن تەحنولوگيا الماسۋدا ماڭىزدى ءرول اتقارادى. وزبەكستاندا وتكەن قازاقستان مەديسيناسى كۇندەرى اياسىندا ينستيتۋتتىڭ جەتەكشى ماماندارى – ينتەرۆەنسيالىق اريتمولوگتار مەن كارديولوگتار، كارديوحيرۋرگتار، ەندوكرينولوگتار جانە ەندوسكوپيستەر فەرعانا، نۇكىس جانە تاشكەنت قالالارىنداعى مەديسينالىق ورتالىقتاردا ماستەر-كلاستار، وپەراسيالار، سەمينارلار مەن كونسۋلتاسيالار وتكىزدى. وزبەكستان رەسپۋبليكاسى دەنساۋلىق ساقتاۋ مينيسترلىگىنىڭ ۇلتتىق عىلىمي مەديسينالىق ورتالىعىمەن، رەسپۋبليكالىق مامانداندىرىلعان كارديولوگيا عىلىمي-پراكتيكالىق مەديسينالىق ورتالىعىمەن، ەندوكرينولوگيالىق ورتالىقتارمەن ءبىرقاتار ىنتىماقتاستىق مەموراندۋمىنا قول قويىلدى. وزبەكستانداعى ميسسيا ينستيتۋتتىڭ ورتالىق ازياداعى ۇلتتىق دەڭگەيدەگى رەفەرەنستىك مەكەمە رەتىندەگى پوزيسياسىن نىعايتتى.
“ءبىز پاسيەنتتەردىڭ دەنساۋلىعىن جاقسارتۋ، ەڭبەككە قابىلەتتىلىگىن ساقتاۋ، اۋرۋ اسقىنۋلارىنىڭ الدىن الۋ جانە ولاردى قوعامنىڭ قالىپتى ومىرىنە بەيىمدەۋ ءۇشىن بار كۇش-جىگەرىمىزدى سالامىز. ينستيتۋتتا پاسيەنتتەردىڭ دەنساۋلىعىن قولداۋ مەن اۋرۋدىڭ الدىن الۋ ماقساتىندا تۇز شاحتاسى جۇمىس ىستەيدى. كەيىنگى جىلدارى ينستيتۋت تەراپيالىق بەيىندەگى پاسيەنتتەرگە ارنالعان مامانداندىرىلعان كومەكتى بەلسەندى دامىتىپ، ەنگىزىپ كەلەدى. تەراپيالىق باعىتتار بويىنشا مامانداندىرىلعان كومەكتىڭ قولجەتىمدىلىگىن كەڭەيتۋ ماقساتىندا ينستيتۋتتا ريەۆماتولوگيا ورتالىعى، ىشەكتىڭ قابىنۋ اۋرۋلارى مەن قىسقا ىشەك سيندرومى ورتالىعى، ەرەسەك پاسيەنتتەرگە ارنالعان ورفاندىق پاتولوگيالار ورتالىعى، ليپيدولوگيا ورتالىعى، سوزىلمالى جۇرەك قىزمەتىنىڭ جەتكىلىكسىزدىگى كابينەتى جانە رەسپۋبليكالىق اللەرگولوگيا ورتالىعى جۇمىس ىستەيدى. گاستروەنتەرولوگيا، ريەۆماتولوگيا جانە ەندوكرينولوگيا سالالارىندا وزىق ادىستەر ەنگىزىلدى. بيىل كەشەندى دياگنوستيكاعا كت-دەنسيتومەتريا جانە ۆيسەرالدى مايدى كت ارقىلى باعالاۋ قوسىلدى”، - دەپ اتاپ ءوتتى ر.تولەۋتايەۆ.
تەلەمەديسينانى ەنگىزۋ - حالىققا كورسەتىلەتىن مەديسينالىق كومەكتىڭ ساپالى دەڭگەيىنە قول جەتكىزۋدەگى ماڭىزدى فاكتورلاردىڭ ءبىرى. جىل بويى كلينيكانىڭ جەتەكشى ماماندارى تەلەمەديسينا ارقىلى ەلىمىزدىڭ بارلىق وڭىرىندەگى مەديسينا قىزمەتكەرلەرىنە، اۋىر جاعدايداعى پاسيەنتتەرگە، ونىڭ ىشىندە جۇكتى ايەلدەرگە قاشىقتان كونسۋلتاسيالار بەردى. ءپانارالىق بەيىندەگى جەتەكشى ساراپشىلاردىڭ كەڭەستەرى وڭىرلەردەگى ارىپتەستەرگە اۋىر ناۋقاستاردى ومىرىنە ءقاۋىپ توندىرمەي ينستيتۋتقا جەتكىزۋگە، دۇرىس دياگنوز قويۋعا، ەمدەۋ تاكتيكاسىن انىقتاۋعا، بارلىق دەڭگەيدە مەديسينالىق كومەك كورسەتۋ تراەكتورياسىن بەلگىلەۋگە، سونداي-اق جۇكتىلىكتى ۇزارتۋعا مۇمكىندىك بەردى.
كاسىبي مامانداردان قۇرالعان كوماندا، تاجىريبە، عىلىم جانە تەحنولوگيانى قاتار الىپ جۇرە وتىرىپ، ادام ءۇشىن ەڭ باستى قۇندىلىق بولىپ تابىلاتىن - ءومىر مەن پاسيەنتتەردىڭ ساپالى ءومىر ءسۇرۋى باعىتىنداعى جۇمىسىن الداعى جىلى دا جالعاستىرا بەرەتىن بولادى.