بيىل الماتىداعى ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى ازاماتتاردان تۇسكەن 15،1 مىڭنان استام ءوتىنىشتى قاراپ، تۇتىنۋشىلارعا قايتارىلعان قاراجاتتىڭ جالپى سوماسى 721،7 ملن تەڭگەدەن اسىپ ءتۇستى. بۇل تۋرالى الماتى قالاسىنىڭ وڭىرلىك كوممۋنيكاسيالار قىزمەتى الاڭىندا وتكەن جىلدىڭ قورىتىندىسىنا ارنالعان بريفينگتە دەپارتامەنت باسشىسىنىڭ ورىنباسارى نۇرلان ابدييەۆ حابارلادى.
سپيكەردىڭ ايتۋىنشا، دەپارتامەنت جۇمىسىنىڭ نەگىزگى باعىتىنىڭ ءبىرى – تۇتىنۋشىلاردىڭ قۇقىقتارىن قورعاۋ، ساۋدا سالاسىنداعى مەملەكەتتىك باقىلاۋ، سونداي-اق حالىقتى كەڭەس بەرىپ، قۇقىقتىق اعارتۋ بولىپ قالا بەرەدى.
2025 جىلدىڭ قورىتىندىسى بويىنشا الماتى قالاسىندا شامامەن 300 اكىمشىلىك جازا قولدانىلعان. ەڭ ءجيى كەزدەسەتىن زاڭ بۇزۋشىلىق – تاۋاردى ايىرباستاۋدان نەمەسە قايتارۋدان باس تارتۋ، تۇتىنۋشىلاردىڭ شاعىمىنا ۋاقىتىلى جاۋاپ بەرمەۋ، سونداي-اق الەۋمەتتىك ماڭىزى بار ازىق-تۇلىك تاۋارلارىنا بەلگىلەنگەن ساۋدا ۇستەمەسىن اسىرىپ جىبەرۋ ەكەن.
وتىنىشتەردىڭ نەگىزگى بولىگى بولشەك جانە ەلەكتروندىق ساۋدا سالاسىنا تيەسىلى. تۇرعىن ۇي-كوممۋنالدىق قىزمەتتەر ماسەلەلەرى بويىنشا دەپارتامەنت قالاداعى جەرگىلىكتى اتقارۋشى ورگاندارمەن بىرلەسىپ جۇيەلى جۇمىس جۇرگىزىپ جاتىر. ءبىلىم بەرۋ، مەديسينالىق قىزمەتتەر مەن كوپشىلىك تاماقتاناتىن سالالاردان كوبىنە تاۋارلار مەن قىزمەتتەردىڭ ساپاسى تۋرالى تۇتىنۋشىلاردى جاڭىلىستىرۋعا بايلانىستى ءوتىنىش تۇسەدى.
الەۋمەتتىك ماڭىزى بار ازىق-تۇلىك تاۋارلارىنىڭ باعا قالىپتاستىرۋىنا باقىلاۋ جۇرگىزۋگە ەرەكشە كوڭىل ءبولىنىپ وتىر.
«2025 جىلى قالادا دەلدالدىقتى تەرگەپ-تەكسەرۋ جونىندەگى كوميسسيانىڭ 24 وتىرىسى وتكىزىلدى. ناتيجەسىندە 523 قۇقىقبۇزۋشىلىق انىقتالىپ، جويىلدى، 485 اكىمشىلىك حاتتاما تولتىرىلدى. بۇلار حالىق ءۇشىن ءونىمنىڭ تۇپكىلىكتى قۇنىن تومەندەتۋگە مۇمكىندىك بەردى»، – دەپ اتاپ ءوتتى نۇرلان ابدييەۆ.
سونىمەن قاتار دەپارتامەنت قالاداعى قوعامدىق ۇيىمدارمەن بەلسەندى تۇردە ىنتىماقتاستىق ورناتا وتىرىپ، بۇقارالىق اقپارات قۇرالدارى مەن الەۋمەتتىك جەلىلەردە تۇتىنۋشىلاردىڭ قۇقىقتارى مەن كاسىپكەرلەردىڭ مىندەتىن جان-جاقتى تۇسىندىرەتىن جۇمىستاردى دا ۇزبەي جۇرگىزىپ كەلەدى.
سپيكەردىڭ ايتۋىنشا، وسى جۇمىستاردىڭ ناتيجەسىنەن كەيىن الماتىلىقتاردىڭ قۇقىقتىق ساۋاتتىلىعى ارتىپ، جاۋاپسىز كاسىپكەرلىك قىزمەتكە باقىلاۋدى ودان ءارى كۇشەيتۋ ءتۇسۋ قاجەت دەگەن توقتامعا كەلگەن.