الەۋمەتتىك جەلىدە قانت ديابەتىمەن اۋىراتىنداردى دارى-دارمەكپەن قامتاماسىز ەتۋگە قاتىستى نەشە ءتۇرلى قاۋەسەت تاراپ جاتىر. الماتىنىڭ باس شتاتتان تىس ەندوكرينولوگى سۆەتلانا بولشاكوۆا وسى جاعدايعا بايلانىستى تۇسىنىكتەمە بەرىپ، تۇرعىنداردى سابىر ساقتاۋعا شاقىردى.
ونىڭ ايتۋىنشا، قانت ديابەتىمەن اۋىراتىن ناۋقاستارعا ارنالعان دارى-دارمەكتەر قالانىڭ بارلىق مەديسينالىق ۇيىمدارىندا جەتكىلىكتى ەكەن. دارى-دارمەكپەن، ونىڭ ىشىندە ينسۋلينمەن قامتاماسىز ەتۋدە ەشقانداي ىركىلىس بولماپتى.
سونىمەن قاتار، العاش رەت قانت ديابەتى دياگنوزى قويىلعان پاسيەنتتەر ءۇشىن قالاداعى مەديسينالىق ۇيىمدار قوسىمشا ءوتىنىم قالىپتاستىرىپ، ولاردى ءبىرىڭعاي ديستريبيۋتور — «سك-فارماسيا» جشس-نە جولداعانى اتاپ ءوتىلدى.
بۇدان بولەك، 2025 جىلعى 20 قاراشادا الەۋمەتتىك ماڭىزى بار اۋرۋلار، سونىڭ ىشىندە قانت ديابەتى بويىنشا دارى-دارمەكپەن ۇزدىكسىز قامتاماسىز ەتۋ ماقساتىندا قوسىمشا وتىنىشتەر جينالدى. ءقازىردىڭ وزىندە الماتىنىڭ مەديسينالىق ۇيىمدارىن وسى دارى-دارمەكپەن تولىق قامتىپ جاتىر، جەتكىزىپ بەرۋ جۇمىسىن بيىلعى 26 جەلتوقسانعا دەيىن اياقتاماقشى.
دارى-دارمەك الۋ بارىسىندا سۇراق تۋىپ، الدەبىر قيىندىقتار بولىپ جاتسا ناۋقاستار ەڭ الدىمەن وزدەرىنىڭ مەديسينالىق ۇيىمىنا — پاسيەنتتەردى قولداۋ قىزمەتىنە جۇگىنۋى كەرەك. ولاردىڭ مەكەنجايى مەن بايلانىس ءنومىرى الماتى قالاسى قوعامدىق دەنساۋلىق ساقتاۋ باسقارماسىنىڭ رەسمي سايتىندا جازىلعان.
ەگەر ماسەلە وندا دا شەشىلمەي جاتسا، الماتى قالاسى قوعامدىق دەنساۋلىق ساقتاۋ باسقارماسىنا 1312 قىسقا ءنومىرى ارقىلى تىكەلەي حابارلاسا الاسىز.