ءماجىلىس دەپۋتاتى اناس باققوجايەۆ بيىلعى جۇمىس بويىنشا ۇكىمەتتىڭ جۇمىسىن قالاي باعالايتىنىن ايتتى، - دەپ حابارلايدى aqshamnews.kz ءتىلشىسى.
بۇل سۇراقتى وعان ءماجىلىس كۋلۋارىندا جۋرناليستەر قويعان. دەپۋتات مينيسترلەر كابينەتىنىڭ جۇمىسىنا "3+" دەگەن باعا بەرەتىنىن ايتتى. ونىڭ ايتۋىنشا، پرەزيدەنتتىڭ بيۋدجەت شىعىندارىن وڭتايلاندىرۋ جونىندەگى تاپسىرماسى تولىق ورىندالماعان.
"پليۋس ءۇش. قاراجات وڭتايلاندىرىلماعان. پرەمەر-مينيستر ون كۇن ىشىندە بيۋدجەت شىعىندارىن وڭتايلاندىرۋ بويىنشا شارالار قابىلدايمىن دەدى. ەندى قارايىق، وڭتايلاندىرىلدى ما؟! جوق، ءالى جوق. بۇل ماسەلەنى وتكەن جولى دا كوتەرگەنمىن. ءبىر عانا "پامپەرس" ماسەلەسىن الايىق. بۇكىل قازاقستان بويىنشا "پامپەرس" جەتكىزەتىن ءبىر عانا تاسىمالداۋشى بار. مۇمكىندىگى شەكتەۋلى ازاماتتار ماعان رەنجىمەسىن، مەن تەك مىسال رەتىندە ايتىپ وتىرمىن. ءبىر عانا "پامپەرسكە" سەگىز ميلليارد تەڭگە كەتەدى، باعا قولدان كوتەرىلگەن جوق پا، ارتىق شىعىندار قاراستىرىلماعان با؟! بۇل - تەك ءبىر مىسال. قالعان مينيسترلىكتەردىڭ ءبارىن تەكسەرسە، قىرۋار قارجىنى ۇنەمدەۋگە بولار ەدى. سوندىقتان بۇل باعىتتاعى جۇمىس ءسال اقساپ تۇر"، - دەدى ول.