الماتىنىڭ 2040 جىلعا دەيىنگى باس جوسپارىن تۇزەتۋ بويىنشا قوعامدىق تالقىلاۋلار اياسىندا مۇنداي ءىس-شارالاردى وتكىزبەستەن بۇرىن زاڭمەن بەلگىلەنگەن راسىمدەردىڭ ساقتالۋى تۋرالى ماسەلە كوتەرىلدى.
الماتى قالاسى ساۋلەت، قالا قۇرىلىسى باسقارماسىنىڭ باسشىسى الماس جاڭبىرشىنىڭ ايتۋىنشا، قوعامدىق تالقىلاۋلار قازاقستان رەسپۋبليكاسى يندۋستريا جانە ينفراقۇرىلىمدىق دامۋ ءمينيسترىنىڭ 2020 جىلى 30 قىركۇيەكتەگى №505 بۇيرىعىمەن بەكىتىلگەن «قالا قۇرىلىسى جوبالارىن (ەلدى مەكەندەردىڭ باس جوسپارلارى، ەگجەي-تەگجەيلى جوسپارلاۋ جوبالارى جانە قۇرىلىس جوبالارى) ازىرلەۋ، كەلىسۋ جانە بەكىتۋ قاعيدالارىنا» (بۇدان ءارى – قاعيدالار) سايكەس وتكىزىلەدى.
«قاعيدالارعا سايكەس، قوعامدىق تالقىلاۋلار وتكىزۋ كۇنى اشىق جينالىس تۇرىندە بۇقارالىق اقپارات قۇرالدارىندا حابارلاندىرۋ جاريالانعان كۇننەن باستاپ كەمىندە جيىرما كۇنتىزبەلىك كۇننەن كەيىن بەلگىلەنۋگە ءتيىس. ءبىز 25 قاراشادا الماتى قالاسىنىڭ باس جوسپارىن تۇزەتۋ جوباسى بويىنشا قوعامدىق تالقىلاۋلاردىڭ 24-26 جەلتوقسان ارالىعىندا وتەتىنى تۋرالى رەسمي تۇردە جاريالادىق. سونىمەن قاتار، باسقارمانىڭ سايتىندا تۇزەتۋ جوباسى جاريالاندى، ونىمەن كەز كەلگەن ادام تانىسا الدى. ايتا كەتۋ كەرەك، جوبانىڭ ءوزى قانشا ۋاقىتقا جاريالانۋعا ءتيىس ەكەنى قاعيدالارمەن ناقتى رەتتەلمەگەن»، – دەدى ول.
باس ساۋلەتشى قوعامدىق تالقىلاۋلار تۋرالى حابارلاندىرۋدا بارلىق قاجەتتى اقپارات كورسەتىلگەنىن ايتتى. اتاپ ايتقاندا، قوسىمشا مالىمەت الۋعا، جوسپارلانعان تالقىلاۋعا قاتىستى قۇجاتتاردىڭ كوشىرمەسىن سۇراتۋعا بولاتىن ەلەكتروندى پوشتا مەن تەلەفون ءنومىرى بار.
«راسىمدەردىڭ ساقتالۋىنا قاتىستى ەسكەرتۋلەردەن كەيىن بارلىق قاعيدانى قايتا قاراپ، زاڭ تالاپتارىنىڭ تولىق ساقتالعانىنا كوز جەتكىزدىك. سول سەبەپتى، قازىرگى تاڭدا قوعامدىق تالقىلاۋلاردى بۇرىن بەلگىلەنگەن مەرزىمدە وتكىزىپ جاتىرمىز»، – دەدى الماس جاڭبىرشى.