الماتى اكىمى دارحان ساتىبالدى جۇمىس ساپارى بارىسىندا مەدەۋ اۋدانىنداعى سۇلۋcاي شاعىناۋدانىنىڭ دامۋىن، ينجەنەرلىك جەلىلەردىڭ قۇرىلىسىن، سونداي-اق №197 نەگىزگى ورتا مەكتەپتەگى وقۋ جاعدايىن تەكسەردى.
اكىم سۇلۋساي شاعىناۋدانىندا سۋ ۇڭعىمالارىن بۇرعىلاۋ ارقىلى جۇرگىزىلىپ جاتقان سۋ قۇبىرى مەن كارىز جۇيەسىنىڭ تاراتۋ جەلىلەرىنىڭ قۇرىلىسىنىڭ بارىسىن تەكسەردى. اتالعان اۋماق 2014 جىلى الماتى قالاسىنىڭ قۇرامىنا قوسىلعانىمەن، وسى ۋاقىتقا دەيىن ورتالىقتاندىرىلعان ينجەنەرلىك جەلىلەرمەن تولىق قامتاماسىز ەتىلمەگەن. جوبانى ىسكە اسىرۋ تۇرعىنداردى تۇراقتى سۋمەن جابدىقتاۋ جانە سۋ بۇرۋ جۇيەسىنە كەزەڭ-كەزەڭىمەن قوسۋعا مۇمكىندىك بەرەدى.
تەكسەرۋ بارىسىندا اكىمگە جۇمىستاردىڭ اياقتالۋ ساتىسىندا ەكەنى باياندالدى. قازىرگى ۋاقىتتا ىسكە قوسۋ-رەتتەۋ ءىس-شارالارى جۇرگىزىلىپ، نىساندى پايدالانۋعا بەرۋ جۇمىستارى اتقارىلۋدا. دارحان ساتىبالدى ساپانى قاتاڭ باقىلاۋ قاجەت ەكەنىن اتاپ ءوتىپ، شاعىناۋداننىڭ ودان ءارى دامۋىن ەسكەرە وتىرىپ، جوبانى بەلگىلەنگەن مەرزىمدە اياقتاۋدى تاپسىردى.
جۇمىس ساپارى اياسىندا سۇلۋcاي شاعىناۋدانىنىڭ الەۋمەتتىك ينفراقۇرىلىمىنا قاتىستى ماسەلەلەر دە قارالدى. دارحان ساتىبالدى «№197 نەگىزگى ورتا مەكتەپ» كمم-نىڭ قازىرگى جاعدايىمەن تانىستى. جوبالىق قۋاتى 60 ورىنعا ەسەپتەلگەن مەكتەپتە وقۋشىلار سانى ودان جوعارى، ساباق قازاق جانە ورىس تىلدەرىندە ەكى اۋىسىمدا ۇيىمداستىرىلعان. ءبىلىم بەرۋ ۇيىمىنىڭ قاجەتتى جابدىقتارمەن قامتىلعانى، سونداي-اق قوزعالىسى شەكتەۋلى بالالار ءۇشىن قاۋىپسىزدىك پەن قولجەتىمدىلىك جاعدايلارىنىڭ جاسالعانى اتاپ ءوتىلدى.
سونىمەن قاتار، سۇلۋcاي شاعىناۋدانىندا الەۋمەتتىك نىسانداردى ورنالاستىرۋ ءۇشىن ساتىپ الىنعان اكىمشىلىك عيماراتقا ەرەكشە نازار اۋدارىلدى. الداعى ۋاقىتتا مۇندا مەكتەپ وقۋشىلارىنا ارنالعان سپورت جانە ءماجىلىس زالدارىن، سونداي-اق فەلدشەرلىك-امبۋلاتوريالىق پۋنكت ۇيىمداستىرۋ جوسپارلانىپ وتىر. الايدا عيماراتتىڭ قۇرىلىمدىق ەلەمەنتتەرى مەن ينجەنەرلىك جەلىلەرىنىڭ توزۋ دەڭگەيى جوعارى ەكەنى انىقتالدى. وسىعان بايلانىستى ءتيىستى باسقارمالارعا قارجىلاندىرۋ ماسەلەسىن پىسىقتاپ، جوندەۋ جۇمىستارىن كەزەڭ-كەزەڭىمەن جۇرگىزۋ تاپسىرىلدى.
جۇمىس ساپارىنىڭ قورىتىندىسى بويىنشا قالا اكىمى اۋماقتاردى دامىتۋ كەشەندى تۇردە، ياعني ينجەنەرلىك جانە الەۋمەتتىك ينفراقۇرىلىم ماسەلەلەرىن الدىن الا شەشۋ ارقىلى جۇرگىزىلۋگە ءتيىس ەكەنىن اتاپ ءوتتى. بەرىلگەن تاپسىرمالاردىڭ ورىندالۋىن باقىلاۋ جانە تۇرعىندارمەن كەرى بايلانىس اۋدان اكىمدىگى مەن ءتيىستى باسقارمالار ارقىلى قامتاماسىز ەتىلەدى.