«قاندى قاڭتار» وقيعاسى ويلانباعاننىڭ وپىق جەپ، دۇربەلەڭنىڭ دۇرمەككە ۇلاساتىنىن، ارانداتۋدىڭ اياعى قاقپانعا تۇسىرەتىنىن تالايعا ءتۇسىندىرىپ بەرگەندەي. وسى ءبىر اششى ساباقتان وي تۇيگەن زامانداستارىمىز «جاۋ جوق دەمە – جار استىندا، ءبورى جوق دەمە – بورىك استىندا» دەگەن قازاقتىڭ دانالىق ءسوزىن تۇيسىنگەندەي. ايدىڭ-كۇننىڭ امانىندا تاتۋلىق پەن بەيبىت ءومىرىمىزدىڭ شىرقىن بۇزعان قاندى وقيعا قايتالانباسىن دەيمىز. مەملەكەتتىك توڭكەرىسكە ارەكەت ەتكەن، دۇنيەنى ءدۇر سىلكىنتكەندەي وقىس وقيعانىڭ سەبەپ-سالدارى تالدانىپ، ءادىل باعاسىنىڭ بەرىلەتىنىنە سەنىمدىمىز.
قارالى قاڭتار مەملەكەتىمىزدى قىرۋار قارجىعا شىعىندار قىلدى، قانشاما عيمارات قيرادى، دۇكەندەر تونالدى. مورودەرلىك، ۆانداليزم ارەكەتتەرى كورىنىس بەردى. ادال ەڭبەكپەن ءناپاقاسىن تاۋىپ جۇرگەن قانشاما كاسىپكەر شىعىنعا باتتى. مەملەكەت قانشاما ارىز-شاعىمدى قاراپ، تيىسىنشە قارجىلاي جاردەمىن جاساپ جاتسا دا، ءالى دە قارالىپ جاتقان شاعىمدار بار كورىنەدى. سالىعىن تولەپ، ەل قورجىنىنىڭ جىرتىعىن بۇتىندەپ جۇرگەن كاسىپكەرلەرگە مەملەكەت قولدان كەلگەن كومەگىن اياپ قالماس.
مەملەكەتىمىز ماتەريالدىق شىعىندى تۇگەندەپ قانا قويماي، سارابدال ساياساتىمەن ەل ىشىندە بايقالىپ قالعان رۋحاني جۇتاڭدىقتى دا بۇتىندەۋى كەرەك دەپ ويلايمىن. ويتكەنى، بۇقارا اراسىندا تاۋەلسىزدىكتىڭ ءقادىرىن تۇسىنە بىلمەگەن تەرىس پيعىلدىلار ءالى دە بار بوپ شىقتى. بۇرق ەتكەن كوتەرىلىس مەملەكەتتى كۇيرەتۋگە ىقپال ەتكەن ەكسترەميستىك پيعىلدى ءبىلدىردى.
لاڭكەستىك پەن ەكسترەميزم – جانكەشتىلىككە ۇندەيتىن جاھاندىق ماسەلە. دەگەنمەن، جاننان بەزگەن قارۋلى قاقتىعىسقا يتەرمەلەيتىن مۇنداي تۇرپايى توپتىق قىلمىس قانداي جاعدايدان تۋىندايدى؟ ونى ابدەن زەرتتەپ، زەردەلەۋ كەرەك. راسىمەن، ەكسترەميزم ءبىر كۇندە پايدا بولا سالمايدى عوي. ول قاي زاماندا دا تۇرلىشە پىشىندە بولعان. تەررورلىق ارەكەت ساياسي نە الەۋمەتتىك سەبەپكە بايلانىستى جەكە ادامنىڭ وزىنە، كوپشىلىككە، ءتىپتى مەملەكەتكە قىسىم جاساۋ، ولاردى قورقىتۋ ماقساتىندا جاسالاتىن قاساقانا قىلمىس ەكەنى بەلگىلى. ارىدەن ويلاساق، ەل ىشىندە ءالى دە ءادىل شەشىمىن تاپپاعان الەۋمەتتىك ماسەلەلەر بار. سوعان دەن قويعان ابزال.
ەكسترەميستىك ارەكەت كوبىنە-كوپ باسقا اعىمنىڭ جەتەگىنە كەتىپ، ءدىني سەنىمدى بەتكە ۇستاپ، الدانىپ، اربالىپ جۇرگەن ادامداردىڭ قاپەرىندەگى ويدان تۋىنداۋى مۇمكىن. «جاندى جۇمىس ارقىلى جانسىزدار تابىلادى» دەمەكشى، تاپ وسى ورايدا قاۋىپسىزدىك ورگاندارىنىڭ دا قاپى قالىپ جاتقان سىڭايى بايقالادى. الىس-جاقىن سوعىستان كوز اشپاعان ءبىرقاتار شەت ەلدە «باس اۋرۋعا» اينالعان بۇل پروبلەمانى شەشۋ جولى تابىلار ەمەس. قۇدايعا ءتاۋبا، قازاقستان ولاردىڭ قاتارىندا ەمەس. «اداسقاننىڭ الدى ءجون، ارتى سوقپاق» دەگەن، باعىتىنان جاڭىلعانداردىڭ باسىم بولىگىنىڭ نيەتى وڭعارىلىپ، ءۇيىرىن تابارىنا سەنىمدىمىز.
.