مونەتالار «ەستە قالاتىن وقيعالار مەن ءبىرتۋار ادامدار» اتتى سەريامەن شىققان.
قازاقستاننىڭ ۇلتتىق بانكى 27 شىلدەدەن باستاپ ROZA BAǴLANOVA. 100 JYL كوللەكسيالىق مونەتالارى ساتىلىمعا شىعارىلاتىنىن ايتتى، دەپ حابارلايدى Almaty-akshamy.kz
نومينالى 100 تەڭگەلىك مەلحيوردان سوعىلعان مونەتالار قازاقتىڭ وپەرا جانە ەسترادا ءانشىسى روزا باعلانوۆانىڭ 100 جىلدىعىنا ارنالعان.
مونەتالار www.kazcoins.nationalbank.kz پلاتفورماسىندا ۇلتتىق بانكتىڭ ينتەرنەت-دۇكەنى ارقىلى ساتىلادى.
مونەتانىڭ سيپاتتاماسى
مونەتا اۆەرسىنىڭ ورتالىق بولىگىندە قازاقستاننىڭ مەملەكەتتىك ەلتاڭباسى بەينەلەنگەن. ەلتاڭبانىڭ وڭ جاعى مەن سول جاعىندا ويۋ-ورنەك ەلەمەنتتەرى ورنالاسقان. QAZAQSTAN ULTTYQ BANKI • NATIONAL BANK OF KAZAKHSTAN دەگەن جازۋ مونەتا جيەگىمەن اينالدىرا جازىلعان. تومەنگى بولىگىنەن مونەتانىڭ نومينالىن بىلدىرەتىن 100 TEŃGE جازۋىن كورۋگە بولادى.
مونەتا ريەۆەرسىندە روزا باعلانوۆانىڭ سۋرەتى، پورترەتتىڭ سول جاعىندا مەرەيتويلىق داتانى بىلدىرەتىن 100 JYL دەگەن جازۋ بار، مونەتا جيەگىندە «اح، سامارا-گورودوك» ءانىنىڭ نوتالارى، ROZA BAǴLANOVA دەگەن جازۋ اينالدىرا باسىلعان، سول جاعىندا – مونەتانىڭ شىققان جىلىن بىلدىرەتىن «2022» دەگەن جازۋ بار.
من25 قوسپاسىنان جاسالعان نومينالى 100 تەڭگەلىك مونەتانىڭ ماسساسى – 15 گرامم، ديامەترى – 33 مم، دايىنداۋ ساپاسى – brilliant uncirculated، تارالىمى – 15 000 دانا.
مونەتا كوللەكسيالىق قۇنى تۇرعىسىنان ساتۋعا ارنالعان. ونى بەلگىلەنگەن قۇنىنا ساي قازاقستاننىڭ بۇكىل اۋماعىندا بارلىق تولەم ءتۇرى بويىنشا، سونداي-اق بانك شوتتارىنا اۋدارۋعا، قازاقستاننىڭ بارلىق بانكىندە اۋدارۋ، ۇساقتاۋ جانە ايىرباستاۋ ءۇشىن پايدالانۋعا بولادى.
كوللەكسيالىق مونەتا قازاقستاننىڭ تەڭگە سارايىندا جاسالعان.