ەلوردادا قازاقستان رەسپۋبليكاسى پرەزيدەنتىنىڭ اتىنان بالالارعا ارنالعان «جاڭا جىل رەسپۋبليكا تورىندە» رەسپۋبليكالىق شىرشا تويى ءوتتى.
وعان ەلىمىزدىڭ بارلىق وڭىرلەرىنەن 100-دەن استام بالا قاتىستى، دەپ حابارلايدى Almaty-akshamy.kz
شىرشا سالتاناتىنا قاتىسۋشىلاردىڭ ىشىندە ون جاسار ماليكا مۇحامەدجانوۆا دا بار. سولتۇستىك قازاقستان وبلىسى اققايىن اۋدانى سميرنوۆو اۋىلىنداعى №2 مەكتەپ-گيمنازياسىنىڭ وقۋشىسى بۇل شارا ءۇشىن ارنايى ءوز قولىمەن 100 ءتىرى راۋشان گۇلىنەن ءساندى كويلەك تىگىپتى.
«بۇگىن ءبارى ەرتەگىدەي. مەنى بۇل كورىنىس اسا تاڭ قالدىردى. بارلىعى سونداي ءساندى، مەن دە بۇگىنگى سالتاناتقا وراي وزىمە ادەمى كويلەك تىكتىم. مەرەكە ءۇشىن راحمەت!»، - دەيدى ماليكا.
وتباسى ۇلگىسىندەگى بالالاردى قولداۋ ورتالىعىنىڭ تاريەلەنۋشىسى، ماڭعىستاۋ وبلىسىنان كەلگەن ۆيكتور بوياركين پرەزيدەنتتەن شاقىرتۋ العانى ءۇشىن العىسىن ءبىلدىردى. ءۇشىنشى سىنىپ وقۋشىسى كاراتەمەن اينالىسادى جانە دومبىرادا وينايدى.
«شىرشا تويىنا قاتىسقانىم ءۇشىن اسا قۋانىشتىمىن. ونىڭ ۇستىنە بىزگە كوپتەگەن سىيلىقتار بەرىلدى. وسىنداي شەكسىز قۋانىش سىيلاعان پرەزيدەنتكە جانە بارشا قاتىسۋشىلارعا راحمەت ايتامىن»، - دەيدى ول.
شىرشاعا شاقىرىلعان بالالارعا مەملەكەت باسشىسى قاسىم-جومارت توقايەۆتىڭ اتىنان قۇتتىقتاۋ حات تابىس ەتىلدى.
«اينالايىن بالاقاي! سەنى جاڭا جىل مەرەكەسىمەن قۇتتىقتايمىن! وسى تاماشا مەيرام ءوزىڭدى قۋانىش پەن شاتتىققا بولەسىن! ءومىرىڭ جارقىن ساتتەرگە تولى بولسىن! كىتاپ وقى، سپورتپەن شۇعىلدان، تابيعاتتى ايالا جانە جاقسىلىق جاساۋعا ۇمتىل! ءبىلىمپاز، ەڭبەكقور، ادال ازامات بول! اسقاق ارماندارىڭ اقيقاتقا اينالسىن! ساعان زور دەنساۋلىق، تولاعاي تابىس تىلەيمىن!»، - دەپ جازدى پرەزيدەنت بالالارعا ارنالعان قۇتتىقتاۋىندا.
بالالارمەن بىرگە شىرشا شامىن ەلىمىزدىڭ باس پەداگوگى عاني بەيسەمبايەۆ جاقتى.
«بۇگىن وزدەرىڭىز سىندى 6 ميلليوننان استام بالا جاڭا جىل مەرەكەسىن تويلاۋدا جانە رەسپۋبليكامىزدىڭ 20 وڭىرىنەن جۇزدەگەن بالا وسى پرەزيدەنت شىرشاسىنا قاتىسىپ، ۇلكەن مەرەكەلى تويدى بىرگە وتكىزۋدەمىز. جالپى سىزدەر وسى ءۇش كۇن بويى اسەم قالامىز استانانىڭ ەڭ كورىكتى جەرلەرىن ارالادىڭىزدار. ونىڭ ىشىندە تاۋەلسىزدىك سيمۆولىنا اينالعان بايتەرەككە دە باردىڭىزدار. مەملەكەت سىزدەردىڭ باقىتتى بالالىق شاقتارىڭىز ءۇشىن بارلىق مۇمكىندىكتەردى جاساۋدا. ەندىگى جەردە، قۇرمەتتى جاس دوستار، سىزدەر دە ساباقتارىڭىزدى بەسكە وقىپ، سانالى تاربيە الىپ، وسى ەلدىڭ بەدەلدى، مىقتى ازاماتى بولىپ وسۋلەرىڭىزگە بارلىق ماقسات-مۇراتتارىڭىزدى ارناۋعا تيىسسىزدەر»، — دەدى وقۋ-اعارتۋ ءمينيسترى.
بالالار ءۇشىن ەلوردانىڭ ۇزدىك شىعارماشىلىق ۇجىمدارىنىڭ 400 ءارتىسى مەرەكەلىك كوڭىل-كۇي سىيلادى، «استانا وپەرا» مەملەكەتتىك وپەرا جانە بالەت تەاترىنىڭ سوليستەرى «كۇلبيكەش» سپەكتاكلىنىڭ قويىلىمىن تارتۋ ەتتى. بالالار قازاقستاندىق اتاقتى ارتىستەر مارجان اراپبايەۆا، قاراقات ءابىلدينا، ەرجان ماكسيممەن شىرشانى اينالىپ ءان ايتىپ، بي بيلەدى.
شارا سوڭىندا بارلىق قوناقتارعا قازاقستان رەسپۋبليكاسى پرەزيدەنتىنىڭ اتىنان جاڭا جىلدىق سىيلىقتار تابىس ەتىلدى.