2024 جىلدىڭ قورىتىندىسى بويىنشا قازاقستاندىق وقۋشىلار 80 زياتكەرلىك ءىس-شاراعا قاتىستى.
بارلىعى 1،5 ميلليوننان استام (40%) وقۋشى قامتىلدى. بۇل تۋرالى ورتالىق كوممۋنيكاسيالار قىزمەتىندە وتكەن دوڭگەلەك ۇستەل بارىسىندا بەلگىلى بولدى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
ەكىنشى جىل قاتارىنان اۋىل مەكتەپتەرىنىڭ وقۋشىلارىنا ارنالعان رەسپۋبليكالىق پاندىك وليمپيادا وتكىزىلىپ كەلەدى. 2024 جىلى ونىڭ مەكتەپىشىلىك كەزەڭىنە 113 مىڭنان استام وقۋشى تىركەلدى، بۇل 2023 جىلمەن سالىستىرعاندا 35 مىڭعا ارتىق.
«ناتيجەسىندە، رەسپۋبليكالىق وليمپيادالاردا جۇلدەلى ورىن العان اۋىل وقۋشىلارىنىڭ سانى 10 ەسەگە جۋىق ءوستى. بۇل مىڭداعان بالا ءۇشىن جاڭا مۇمكىندىكتەرگە جول اشتى. اۋىل مەكتەپتەرى وقۋشىلارىن زياتكەرلىك وليمپيادالار مەن بايقاۋلارعا دايىنداۋ ماقساتىندا «دارىن» سىرتتاي مەكتەبى جۇمىسىن باستادى. وندا II رەسپۋبليكالىق اۋىل وليمپياداسىنىڭ مىڭعا جۋىق ءفيناليستى ءبىلىمىن جەتىلدىردى»، – دەپ اتاپ ءوتتى «دارىن» رعپو ديرەكتورى عاجدەمبەكتۇرسىنوۆ.
«دارىن» سىرتتاي مەكتەبىندە تاجىريبەلى ۇستازدار – رەسپۋبليكالىق جانە حالىقارالىق وليمپيادالاردىڭ بىرنەشە دۇركىن جەڭىمپازدارى ءدارىس بەرەدى. ولار پاندەردى تەرەڭدەتىپ وقىتۋمەن قاتار، وليمپياداعا دايىندىقتىڭ ستراتەگيالارى مەن ادىستەرىن ۇيرەتەدى، سونداي-اق پايدالى رەسۋرستاردى ءتيىمدى پايدالانۋدىڭ جولدارىن تۇسىندىرەدى.
جالپى، 2024 جىلى 27 رەسپۋبليكالىق جانە 5 حالىقارالىق وقۋ-جاتتىعۋ جيىنى ۇيىمداستىرىلىپ، وقۋشىلار حالىقارالىق وليمپيادالارعا دايىندالدى. ناتيجەسىندە، قازاقستاندىق وقۋشىلار الەمدىك وليمپيادالار مەن كونكۋرستاردا 563 مەدال جەڭىپ الدى.