جابىق ۋچاسكەلەردىڭ جالپى ۇزىندىعى 1236 شاقىرىمدى قۇرايدى
3 ناۋرىز ساعات 19:00 اقپاراتقا سايكەس، ەلىمىزدىڭ 9 وڭىرىندە اۋا رايىنىڭ قولايسىزدىعىنا وراي رەسپۋبليكالىق ماڭىزى بار اۆتوجولداردىڭ 18 ۋچاسكەسىندە جول قوزعالىسىنا ۋاقىتشا شەكتەۋ ەنگىزىلدى، دەپ حابارلايدى Almaty-akshamy.kz.
رەسپۋبليكالىق ماڭىزى بار اۆتوموبيل جولدارىنىڭ ۇلتتىق وپەراتورىنىڭ مالىمەتىنشە، اباي، اقمولا، اقتوبە، شىعىس قازاقستان، قاراعاندى، قوستاناي، سولتۇستىك قازاقستان، ۇلىتاۋ جانە پاۆلودار وڭىرلەرىندە رەسپۋبليكالىق تاسجولدار جابىلدى. قىسقى كۇتىپ-ۇستاۋ جۇمىستارىنا 400 ارنايى تەحنيكا مەن 500 ادام جۇمىلدىرىلدى.
جابىق ۋچاسكەلەردىڭ جالپى ۇزىندىعى 1236 شاقىرىمدى قۇرايدى. بۇل رەسپۋبليكالىق جولدار جەلىسىنىڭ شامامەن 5%-ى.
«كۇن رايى جاقسارعانشا الىس ساپارعا، جابىق تاسجول ۋچاسكەلەرىنە شىقپاڭىزدار. اۋا رايى بولجامىن مۇقيات قاداعالاۋلارىڭىزدى سۇرايمىز! شتاتتان تىس جاعداي تۋىنداسا، 1403 قىسقا نومىرىنە قوڭىراۋ شالۋ كەرەك. ءبىزدىڭ بايلانىس ورتالىعىمىز تاۋلىك بويى جۇمىس ىستەيدى»، - دەلىنگەن حابارلامادا.