10 قازان دۇنيەجۇزىلىك پسيحيكالىق دەنساۋلىق كۇنى - بۇكىل جەر شارىنىڭ ماماندارى پسيحيكالىق دەنساۋلىق ماسەلەلەرى، پسيحيكالىق دەنساۋلىقتى نىعايتۋعا كۇش سالۋ جانە اقپاراتتاردى تاراتىپ، جۇرتشىلىقتى حابارلاندىرادى.
ەلىمىزدە پسيحيكالىق دەرت دىڭكەلەتكەن جانداردى ەمدەيتىن 20 پسيحيكالىق دەنساۋلىق ورتالىعى، قالالىق ەمحانالاردا 77 العاشقى پسيحيكالىق كومەك كورسەتەتىن ورتالىق، اۋداندىق ەمحانالاردا 205 پسيحيكالىق دەنساۋلىق كابينەتى جۇمىس ىستەيدى، دەپ حابارلايدى اlmaty-akshamy.kz.
قالالىق، وبلىستىق پسيحيكالىق دەنساۋلىق ورتالىقتارىندا 303 284 ادام ديناميكالىق باقىلاۋدا تۇر. 200 مىڭعا جۋىق (195299) ادام پسيحيكالىق كەسەلدىڭ شىرماۋىندا. باقىلاۋعا ىلىنگەن ناۋقاستاردىڭ 35،6% (107985) ناركولوگيالىق دەرتكە شالدىققان. رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىنىڭ باس ديرەكتورى قۋانىش التىنبەكوۆ ەلىمىزدە تۇرعىندارعا پسيحيكالىق كومەك، ەم-دوم تەگىن دەيدى.
- ەلىمىزدە رەسپۋبليكا تۇرعىندارىنا ەم تەگىن جانە بارلىق پسيحيكالىق دەنساۋلىق ورتالىقتارىندا ەمدەلۋشى جايلى اقپارات-دەرەكتەر قۇپيا ساقتالادى. 2017 جىلى پسيحيكالىق جانە مىنەز-قۇلىقتارىندا اۋىتقۋى بار ادامدارعا مامانداندىرىلعان مەديسينالىق كومەكتىڭ قولجەتىمدىلىگىن جاقسارتۋ، ماتەريالدىق-تەحنيكالىق جانە قارجىلىق رەسۋرستاردى وڭتايلاندىرۋ، كادر تاپشىلىعىن ازايتۋ ماقساتىندا پسيحياتريالىق قىزمەتتە وزگەرىستەر باستالدى. بۇرىنعى ناركولوگيالىق جانە پسيحيكالىق دەنساۋلىق ورتالىقتارىنىڭ قىزمەتى بىرىكتى. بۇگىنگى تاڭدا وڭتايلاندىرۋ شاراسىنىڭ ناتيجەسى دە بار. شالعايداعى اۋىل، ەلدى -مەكەندە اۋداندار مەن قالالارداعى ەمحانالاردا تۇرعىندارعا العاشقى مەديسينالىق پسيحولوگيا كومەك قولجەتىمدى. سونىمەن بىرگە وسى سالاداعى وزەكتى ماسەلە مەديسينالىق كادرلارمەن قامتۋ كورسەتكىشى 91،4% – عا جەتتى، ونىڭ ىشىندە پسيحياتر دارىگەرلەر – 84،7%، سمج-95%، - دەدى ورتالىقتىڭ باس ديرەكتورى.
ورتالىق باسشىسىنىڭ ايتۋىنشا رەسپۋبليكالىق جانە وبلىستىق، قالالىق پسيحيكالىق دەنساۋلىق ورتالىقتارىنىڭ ماتەريالدىق-تەحنيكالىق بازاسى ەسكىرگەن. مەديسينالىق ۇيىمداردىڭ كوپشىلىگى بۇرىنعى ءۇي-جايلار مەن عيماراتتاردا ورنالاسقان. استانا قالاسىنداعى ورتالىق قانا ەلىمىزدەگى جالعىز زاماناۋي ۇلگىدەگى نىسان. سوندىقتان ورتالىقتاردى كۇردەلى جوندەۋدەن وتكىزۋ، قايتا سالۋ ، جاڭعىرتۋ كەشەندى جوسپارلاردىڭ باستى ماقساتى بولىپ تۇر.
رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىقتىڭ پاۆلودارداعى فيليالى، ماڭعىستاۋ وبلىستىق پدو جاڭعىرتۋ جانە كۇردەلى جوندەۋ جۇمىستارى جۇرگىزىلەدى. 2018 جىلى پسيحياتريا سالاسىندا كادر تاپشىلىعى شامامەن 40% قۇراعان. بۇگىندە 15% - دان ءسال ارتىق. ءارى اعىمداعى جىلى اقىلى نەگىزدە تۇسكەن رەزيدەنتتەر ءۇشىن 98 گرانت بولىنگەن. ەندى ەلىمىزدە پسيحيكالىق دەنساۋلىق ۇيىمدارىندا تاۋلىك بويى جۇمىس ىستەيتىن 10971 توسەك بار. توسەك ورىنداردىڭ پسيحياتريالىق ناۋقاستارعا 65،8% (7216) توسەك جانە ناركولوگيالىق 34،2% (3755) ارنالعان. سولاردىڭ 50% (1884) ناركولوگيالىق اۋرۋلاردى ماجبۇرلەپ ەمدەۋگە ارنالعان. قۋانىش التىنبەكوۆ كەلەشەكتە پسيحيكالىق دەنساۋلىق ورتالىقتارىنىڭ سانىن ودان ءارى ۇلعايتۋ، مەديسينالىق-الەۋمەتتىك وڭالتۋعا ارنالعان توسەك سانىن كوبەيتۋ، اۋىل تۇرعىندارىنا امبۋلاتوريالىق كومەك كورسەتۋ ساپاسىن ارتتىرۋدى جوسپارلاپ وتىرعانىن جەتكىزدى.
دەگەنمەن ەلىمىزدىڭ باس پسيحياترى تۋىستارى نەمەسە ءوزىنىڭ پسيحيكالىق اۋرۋ مازالاپ جۇرگەنىن جاسىرۋ، ءوز تۋىسىنىڭ ماسكۇنەم، ناشاقور ەكەنىن نامىستانىپ، پسيحيكالىق دەرتتىڭ ەمىن باسقا كلينيكالار مەن ەمشىلەردى ارالاپ ىزدەيتىن تۇرعىنداردىڭ بار ەكەنىن جاسىرمايدى. مەملەكەتتىك پسيحيكالىق دەنساۋلىق ورتالىقتارى ناۋقاستاردىڭ دەرتى اسقىنىپ كەلسە دە، قابىلداپ، ەم-دوم كورسەتكەن ەكەن. سوندىقتان پسيحيكالىق اۋرۋلارعا شالدىققان ەمدەلۋشىلەردىڭ سانى رەسمي ستاتيستيكالىق دەرەكتەن كوبىرەك بولۋى مۇمكىن دەيدى رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىقتىڭ ديرەكتورى قۋانىش التىنبەكوۆ.