باس جۇلدەنى مەيىربەك سۇلتانحان يەلەندى
استانادا «تاۋەلسىز ەلىم – تىرەگىم» اتتى رەسپۋبليكالىق اقىندار ايتىسى ءوتتى، دەپ حابارلايدى Almaty-akshamy.kz قالا اكىمدىگىنىڭ رەسمي سايتىنا سىلتەمە جاساپ.
ءسوز سايىسىنا تالاي بايگەدە توپ جارىپ، جۇرتشىلىقتىڭ ريزاشىلىعىنا بولەنىپ جۇرگەن ايبەك قالييەۆ، بەكارىس شويبەكوۆ، تولەگەن جامانوۆ، ءبىرجان بايتۋوۆ، رۇستەم اقىلبەكوۆ باستاعان 14 اقىن قاتىستى.
ءادىل قازىلار القاسىنىڭ قۇرامىندا قازاقستاننىڭ ەڭبەك سىڭىرگەن قايراتكەرى عالىم جايلىباي، اقىن ءاسيا بەركەنوۆا، فيلولوگيا عىلىمدارىنىڭ دوكتورى قويلىباي اسانوۆ، سەنات دەپۋتاتى نۇرتورە ءجۇسىپ، ءماجىلىس دەپۋتاتى جاناربەك ءاشىمجان، حالىقارالىق «الاش» سىيلىعىنىڭ لاۋرەاتى داۋلەتكەرەي كاپ ۇلى مەن «حابار اگەنتتىگى» اكسيونەرلىك قوعامىنىڭ باسقارما ءتوراعاسى بەرىك ءۋالي بولدى.
«مەنىڭ كوتەرگەن ماسەلەم جاڭا قازاقستانعا بايلانىستى بولدى. ەلدە ءبىرقاتار وزگەرىس ورىن الدى. وسى توڭىرەكتە نەگىزگى ايتپاعىم «كوپ دۇنيەنىڭ اتىنا ەمەس، زاتىنا ءمان بەرەيىك» دەگەن تاقىرىپتا وزەكتى بولىپ تۇرعان ۇلىتاۋ، جاڭاارقا اۋدانىنداعى الەۋمەتتىك ماسەلەلەرگە نازار اۋدارايىق، جاڭعىرايىق دەگەن وي بولدى. وزدەرىڭىز بىلەتىندەي، بيىل ۇلت كوسەمى احمەت بايتۇرسىن ۇلىنىڭ مەرەيتويى اتالىپ ءوتىپ جاتىر. الاش ارىسى، ادەبيەتتىڭ اتاسى دەپ ايتىلعانىمەن، كوسەمنىڭ ساياسي قايراتكەرلىك قىرىن دا كورسەتۋگە تىرىستىم»، – دەدى ۇلىتاۋ وبلىسىنان كەلگەن اقىن تولەگەن جامانوۆ.
ناتيجەسىندە باس جۇلدە – 3 ميلليون تەڭگەنى مەيىربەك سۇلتانحان يەلەندى.
I ورىندى (2 ملن تەڭگە جۇلدە) بەكارىس شويبەكوۆ، II ورىندى (1،5 ملن تەڭگە) تولەگەن جامانوۆ، III ورىندى (1 ملن تەڭگە) ايبەك قالييەۆ، رۇستەم قايىرتاي، نۇربول جاۋىنباي، نۇرماحان جاقىپبەك جەڭىپ الدى.