قازاقستان-بريتان تەحنيكالىق ۋنيۆەرسيتەتىنىڭ ءال-فارابي اتىنداعى كىشى زالىندا رەسپۋبليكا كۇنىنە ارنالعان عىلىمي-پراكتيكالىق كونفەرەنسيا ءوتتى.
رەسپۋبليكا كۇنىنە ارنالعان كونفەرەنسياعا الماتى اكىمىنىڭ ورىنباسارى ارمان قىرىقبايەۆ، الماتى قالالىق ارداگەرلەر كەڭەسىنىڭ ءتوراعاسى احان بيجانوۆ، ءحىى شاقىرىلعان قازاق كسر جوعارى كەڭەسىنىڭ بۇرىنعى دەپۋتاتتارى، الماتى قالالىق ءماسليحات دەپۋتاتتارى جانە وزگە قازاق زيالىلارى قاتىستى. كونفەرەنسيا بارىسىندا 1990 جىلى 25 قازاندا «مەملەكەتتىك ەگەمەندىك تۋرالى» دەكلاراسيانىڭ قالاي قابىلدانعانى ەسكە الىنىپ، الداعى رەسپۋبليكا كۇنىن اتاپ ءوتۋدىڭ ماڭىزى تالقىلاندى.
«1990 جىلى 25 قازاندا قازاقستاننىڭ ەگەمەندىگى تۋرالى دەكلاراسيا قابىلداندى. ول رەسپۋبليكامىزدىڭ تاۋەلسىزدىگىنە جاسالعان العاشقى قادام بولدى، سول ساتتەن ەلىمىزدىڭ جاڭا تاريحى باستالدى. ازاتتىق، تاۋەلسىزدىك، ەگەمەندىك كەز كەلگەن ۇلت ءۇشىن ەڭ قىمبات مۇرا. سول تۇرعىدان دەكلاراسيا ەلىمىزدىڭ ەگەمەندىگى مەن تاۋەلسىز مەملەكەت رەتىندە قازاقستاننىڭ ساياسي-قۇقىقتىق نەگىزدەرىن جاريالادى»، – دەدى الماتى قالالىق ارداگەرلەر كەڭەسىنىڭ ءتوراعاسى احان بيجانوۆ.
كونفەرەنسيادا العى ءسوز ايتىلعان سوڭ، بارلىق جيىن قاتىسۋشىلارىن الماتى اكىمىنىڭ ورىنباسارى ارمان قىرىقبايەۆ الدا كەلە جاتقان رەسپۋبليكا كۇنىمەن قۇتتىقتادى.
«الاتاۋدىڭ باۋرايىنداعى اسەم قالامىز الماتىدا 1990 جىلى قازاقستاننىڭ ەگەمەندىگى تۋرالى دەكلاراسيا قابىلدانىپ، ەلىمىزدىڭ شىنايى تاۋەلسىزدىگىنە جول اشىلادى. اتا-بابالارىمىزعا عاسىرلار بويى ارمان بولعان ەگەمەندىككە قادام باسقان بۇل كۇن ارنايى مەرەكە بولىپ بەلگىلەندى. قاسىم-جومارت توقايەۆتىڭ جارلىعىمەن وعان ۇلتتىق ناقىش بەرىلدى، ارنايى زاڭ قابىلداندى. بارشاڭىزدى كەلە جاتقان رەسپۋبليكا كۇنىمەن شىن جۇرەكتەن قۇتتىقتايمىن»، – دەدى الماتى اكىمىنىڭ ورىنباسارى ارمان قىرىقبايەۆ.
دەكلاراسيانىڭ قابىلدانۋىنا ۇلەس قوسىپ، وسىناۋ تاريحي ءساتتىڭ باستاۋىندا بولعان ءحىى شاقىرىلعان قازاق كسر جوعارى كەڭەسىنىڭ بۇرىنعى دەپۋتاتتارى دا ءوز ەستەلىكتەرىمەن ءبولىستى.
«دەكلاراسيانى قابىلداعاندا 360 دەپۋتات بولدى، وڭاي ەمەس قوي؟ بۇل دەموكراتيالىق پروسەسس باستالعان ۋاقىت. ارينە، كوپشىلىگى ونى قولداپ داۋىس بەرسە دە، ءبىراق 18 ادام قارسى بولدى. مىنە، ول كەزدەرى سونداي تولقۋ بولدى. سوندا دەكلاراسيا قابىلدانعاندا بىر-بىرىمىزگە قاراساق، كوزىمىزدەن جاس شىعىپ تۇر. ەندى اتا-بابانىڭ ارمانى كەلىپ وتىر عوي. تاۋەلسىزدىككە دەگەن ەڭ ۇلكەن قادام وسى ءبىزدىڭ»، – دەدى ءحىى شاقىرىلعان قازاق كسر جوعارى كەڭەسىنىڭ بۇرىنعى دەپۋتاتى سابدەن ورازالى.
سونداي-اق، قازاقستان-بريتان تەحنيكالىق ۋنيۆەرسيتەتىنىڭ ستۋدەنتتەرى كوشەگە تۋ ۇستاپ شىعىپ، رەسپۋبليكا كۇنىنە وراي كوك تۋ اكسياسىن وتكىزدى.
