قايتا جاڭعىرعان رەسپۋبليكا كۇنى بيىل ەلىمىزدە ەكىنشى رەت تويلانادى.
بىلتىر مەرەكەلەر تىزىمىنە ەنگەن بۇل داتا – ەلدەگى جالعىز ۇلتتىق مەيرام. ۇزاق جىلدار بويى ۇمىت قالعان رەسپۋبليكا كۇنى قالاي قايتا جاڭعىرعانىن ەسكە الىپ وتسەك.
رەسپۋبليكا كۇنىنىڭ تاريحى سوناۋ توقسانىنشى جىلداردان باستالادى. 1990 جىلى 25 قازاندا قازاقستاننىڭ تاۋەلسىزدىك الۋىنا جول اشقان ماڭىزدى قۇجات قابىلدانعان بولاتىن. بۇل دەكلاراسيادا قازاقستاننىڭ تاۋەلسىز مەملەكەت رەتىندەگى ساياسي-قۇقىقتىق نەگىزدەرى جاريالاندى. العاش رەت ەل اۋماعىنىڭ تۇتاستىعى، قازاق حالقىنىڭ جانە باسقا دا ۇلت وكىلدەرىنىڭ مادەنيەتىن، ءداستۇرىن، ءتىلىن قايتا تۇلەتۋ، ۇلتتىق بولمىستى قالىپتاستىرۋ ءارى نىعايتۋ سياقتى مەملەكەتتىك قاعيداتتار بەكىتىلدى. وسى دەكلاراسيانىڭ ارقاسىندا قازكسر ءوز ىشكى اسكەرىن، مەملەكەتتىك قاۋىپسىزدىك پەن ىشكى ىستەر ورگاندارىن قۇرۋ قۇقىعىنا يە بولدى. ال پرەزيدەنت ەلدىڭ باسشىسىنا اينالدى.
قازاقستان تاۋەلسىزدىك العاننان كەيىن رەسپۋبليكا كۇنى جىل سايىن 25 قازاندا اتالىپ وتە باستادى. 1995 جىلى 18 قازاندا العاش رەت «ۇلتتىق مەرەكە» بولىپ جاريالاندى. الايدا 2001 جىلى بۇل مارتەبەدەن ايىرىلىپ، «مەملەكەتتىك مەرەكە» ساناتىنا ءوتتى. ال 2009 جىلى ساۋىردە مەرەكەلەر قاتارىنان مۇلدە الىنىپ تاستالعان ەدى.
وسىلايشا ون جىلدان استام ۋاقىت بويى رەسپۋبليكا كۇنى ەلىمىزدە تويلانعان جوق. 2022 جىلى پرەزيدەنت قاسىم-جومارت توقايەۆ رەسپۋبليكا كۇنىن قايتارۋدى ۇسىندى. مەملەكەت باسشىسى وعان «ۇلتتىق مەرەكە» مارتەبەسىن بەرىپ، قازاقستاننىڭ باستى مەيرامى رەتىندە اتاپ ءوتۋ تۋرالى باستاما كوتەردى. توقايەۆتىڭ باستاماسى حالىقتىڭ قولداۋىنا يە بولىپ، ءدال سول جىلى زاڭعا ءتيىستى وزگەرىس ەنگىزىلدى. ءسويتىپ بىلتىر قازاقستان حالقى ۇزاق جىلدار بويى اتاۋسىز قالعان رەسپۋبليكا كۇنىن العاش رەت دۇركىرەتىپ اتاپ ءوتتى.
«ەندى بۇل مەيرامدى كۇللى ەل بولىپ جاڭا مازمۇندا اتاپ وتەتىن بولامىز. قايتا جاڭعىرعان رەسپۋبليكا كۇنى – بۇل حالقىمىزدىڭ رۋحىن كوتەرىپ، ەلدىگىمىزدى نىعايتا تۇسەتىن اسا ماڭىزدى تاريحي قادام»، - دەدى بىلتىر پرەزيدەنت رەسپۋبليكا كۇنىنە وراي اقوردادا وتكەن سالتاناتتى جيىندا.
ايتا كەتەلىك، «رەسپۋبليكا» ءسوزى لاتىن تىلىندە «ورتاق ءىس» دەگەن ماعىنا بەرەدى.