مەملەكەت باسشىسى قاسىم-جومارت توقايەۆ قازاقستان حالقىن رەسپۋبليكا كۇنىمەن قۇتتىقتادى، دەپ حابارلايدى Almaty-akshamy.kz Inform.kz-كە سىلتەمە جاساپ.
«قۇرمەتتى وتانداستار!
بارشاڭىزدى رەسپۋبليكا كۇنىمەن شىن جۇرەكتەن قۇتتىقتايمىن!
قازاقستاننىڭ مەملەكەتتىك ەگەمەندىگى تۋرالى دەكلاراسيا قاستەرلى تاۋەلسىزدىگىمىزگە جول اشتى. سوندىقتان بۇل تاريحي قۇجاتتىڭ ءمان-ماڭىزى زور.
ءبىز بيىلدان باستاپ رەسپۋبليكا كۇنىن ۇلتتىق مەرەكە رەتىندە جاڭا مازمۇندا اتاپ وتەمىز. وسى باستاما جۇرتتىڭ كەڭ قولداۋىنا يە بولىپ، داستۇرگە اينالارىنا سەنىمدىمىن. رەسپۋبليكا كۇنى – حالقىمىزدىڭ رۋحىن كوتەرىپ، ەلدىگىمىزدى نىعايتاتىن، بىرلىگىمىزدى بەكەمدەپ، ىنتىماعىمىزدى ارتتىراتىن ايشىقتى مەرەكە.
ءبىز ادىلەتتى قازاقستاندى قۇرۋعا كىرىستىك. بارشا قازاقستاندىقتار بەلسەنە اتسالىسقاندا عانا وسى يگى ماقساتقا قول جەتكىزە الامىز. سەبەبى، مەملەكەتتىڭ تىرەگى دە، باستى بايلىعى دا – ازاماتتار! جاڭعىرعان ۇلتتىق مەرەكەمىزگە وراي وڭىرلەردە بىرلىگىمىزدىڭ سيمۆولى – كوك بايراعىمىزدى كوتەرۋگە ارنالعان سالتاناتتى ءراسىم وتەدى. بۇل – ۇرپاق ساناسىندا وتانسۇيگىشتىك قاسيەتتى، ەلدىك رۋح پەن ۇلتتىق ۇستانىمدى بەكەمدەي تۇسەتىن ماڭىزدى شارا. كوك تۋىمىز – ەگەمەندىك، ازاتتىق، بىرلىك، بەيبىتشىلىك سىندى ىزگى قۇندىلىقتاردى ۇشتاستىراتىن قاستەرلى ءرامىز.
ءبىز – بايراعىن بيىك ۇستاعان بابالاردىڭ ۇرپاعىمىز. سوندىقتان تۋ كوتەرۋ ءراسىمى ۇلتتىق مەرەكەنىڭ ماڭىزىن ارتتىرادى. قازاقستاننان باسقا وتانىمىز جوق. باعدارىمىز – ايقىن، ماقساتىمىز – ورتاق. ءبىز تاۋەلسىزدىك تۇعىرىن بيىك ۇستاپ، مەملەكەتتىگىمىزدى نىعايتا بەرەمىز. ويتكەنى وتانىمىز – ءبىر، مەملەكەتىمىز – ءبىر، حالقىمىز – ءبىر.
ەندەشە ادىلەتتى قازاقستاندى بىرگە قۇرايىق! بارشاڭىزعا زور دەنساۋلىق، باق-بەرەكە تىلەيمىن!ەلىمىزدىڭ ەگەمەندىگى باياندى بولسىن!»، - دەلىنگەن مەملەكەت باسشىسىنىڭ قۇتتىقتاۋىندا.