الماتىدا رەسپۋبليكا كۇنى قالاي مەرەكەلەنەدى؟
وڭىرلىك كوممۋنيكاسيالار قىزمەتىنىڭ الاڭىندا وتكەن بريفينگكە قاتىسقان الماتى قالالىق قوعامدىق دامۋ باسقارماسىنىڭ باسشىسى ايدار ەسەنبەكوۆ رەسپۋبليكا كۇنىنە وراي قانداي شارالار وتەتىنى تۋرالى ايتىپ بەردى، دەپ حابارلايدى Almaty-akshamy.kz.
ايدار ەسەنبەكوۆ ءسوزىن مەملەكەت باسشىسىنىڭ تاپسىرماسىمەن بيىلعى جىلى «قازاقستان رەسپۋبليكاسىنداعى مەرەكەلەر تۋرالى» زاڭعا وزگەرىستەر مەن تولىقتىرۋلار ەنگىزىلگەنىن ەسكە سالۋدان باستادى. زاڭعا سايكەس، 25 قازان – رەسپۋبليكا كۇنى ۇلتتىق مەرەكە بولىپ بەلگىلەندى.
بيىل بۇل مەرەكە الماتىدا كەڭىنەن اتالىپ وتىلمەك، ءىس-شارالار جوسپارى ازىرلەنىپ، بەكىتىلدى. بۇل - ءارتۇرلى سالتاناتتى جيىندار، كونسەرتتەر، مەملەكەتتىك ناگرادالار تابىستالادى، سپورتتىق جارىستار، عىلىمي كونفەرەنسيالار، دوڭگەلەك ۇستەلدەر، شىعارماشىلىق بايقاۋلار، تاقىرىپتىق كورمەلەر، ەكولوگيالىق ءىس-شارالار، جارمەڭكەلەر جانە ت.ب.
« ءىس-شارالاردىڭ ءبىر بولىگى ءوتتى، مىسالى، 7 قازاندا قازاقستان حالقى اسسامبلەياسى رەسپۋبليكالىق انالار كەڭەسىنىڭ كەڭەيتىلگەن وتىرىسى ءوتتى. ال 15 قازان كۇنى جەلتوقسان ساياباعىندا جەلتوقساندىقتاردىڭ، ۆولونتەرلەردىڭ جانە «اسسامبلەيا جاستارى» الماتى قالاسى وكىلدىگى مۇشەلەرىنىڭ قاتىسۋىمەن سەنبىلىك ءوتتى. 1000-نان استام اعاش وتىرعىزىلىپ، ساياباقتىڭ ىرگەلەس اۋماعىنا سانيتارلىق تازالاۋ جۇمىستارى جۇرگىزىلدى»، — دەدى ا.ەسەنبەكوۆ.
شارا قوناقتارىنا قىزىقتى كونسەرتتىك باعدارلاما ۇسىنىلىپ، ۇلتتىق سپورت تۇرلەرىنەن جارىستار وتكىزىلدى. تاعامدار دا ازىرلەندى.
15-16 قازاندا ش.ءۋاليحانوۆ اتىنداعى الاڭدا شىعىس قازاقستان جانە اباي وبلىستارىنىڭ اۋىل شارۋاشىلىعى تاۋار وندىرۋشىلەرىنىڭ جارمەڭكەسى ءوتتى. 17 قازاندا ورتا ءبىلىم بەرۋ ۇيىمدارىنىڭ 8-11 سىنىپ وقۋشىلارى اراسىندا «اتامەكەن» جالپىرەسپۋبليكالىق پاتريوتتىق ديكتانت بايقاۋى ءوتتى. ونى جازۋعا 210 ءبىلىم بەرۋ ورىندارىنىڭ ستۋدەنتتەرى قاتىستى.
سونىمەن قاتار، قالانىڭ بارلىق مۇراجايلارى مەن كىتاپحانالارىندا رەسپۋبليكا كۇنى تاقىرىبىنا ارنالعان كورمەلەر ۇيىمداستىرىلدى. رەسپۋبليكا كۇنىن مەرەكەلەۋ اياسىندا قالانى كورنەكى بەزەندىرۋ جۇمىستارى جۇرگىزىلدى. تاقىرىپتىق قۇتتىقتاۋلار قالانىڭ LED-ەكراندارى مەن بيلبوردتارىندا ورنالاستىرىلعان.
«مەرەكە قارساڭىنداعى كۇندەرى رەسپۋبليكا كۇنىنە ارنالعان «تۋعان قازاقستانىمدى ماقتان تۇتامىن» چەللەندجى باستالدى. بارلىعى 25 بەينەروليك دايىندالدى، وندا قحا جاستارىنىڭ 25 وكىلى قالانىڭ كورىكتى جەرلەرى فونىندا ەلگە، قالاعا دەگەن پاتريوتتىق سەزىمدەرىن ايتتى»، - دەپ جالعاستىردى ا.ەسەنبەكوۆ.
بۇگىن، 21 قازاندا جۇمىسپەن قامتۋ جانە الەۋمەتتىك باعدارلامالار، جاستار ساياساتى جانە كاسىپكەرلىك جانە ينۆەستيسيا باسقارمالارى دەمەۋشىلەر مەن جاناشىر جاندارمەن بىرلەسە وتىرىپ، «جاناشىر جۇرەك» قايىرىمدىلىق اكسياسى باستالدى.
سونداي-اق وكق سپيكەرى ۇلى وتان سوعىسى ارداگەرلەرىن قولداۋ اكسياسىنا الماتى قالالىق «اسسامبلەيا جاستارى» وكىلدەرى قاتىسقانىن ايتتى. اسسامبلەيا جاستارى «ۇوس ارداگەرلەرى، تىل ەڭبەككەرلەرى جانە سوعىس بالالارى كەڭەسى» قوعامدىق قورىمەن بىرلەسە وتىرىپ، ارداگەرلەرگە ازىق-تۇلىك پاكەتتەرىن جەتكىزۋدى ۇيىمداستىردى.
بۇگىن قبتۋ زالىندا رەسپۋبليكا كۇنىنە ارنالعان عىلىمي-تاجىريبەلىك كونفەرەنسيا ءوتتى. شاراعا قازاق كسر جوعارعى كەڭەسىنىڭ ءحىى شاقىرىلىمىندا سايلانعان دەپۋتاتتارى، كورنەكتى عالىمدار مەن ساراپشىلار قاتىستى.
الماتى قالالىق مادەنيەت باسقارماسى باسشىسىنىڭ ورىنباسارى نايليا مۋليۋكوۆا رەسپۋبليكا كۇنىنە ارنالعان الداعى شارالارعا توقتالدى.
ماسەلەن، 22 قازان كۇنى ساعات 12.00-دە قبتۋ-دىڭ ۇلكەن زالىندا قالا اكىمىنىڭ قاتىسۋىمەن الماتى قالاسىنىڭ تۇرعىندارىنىڭ مەملەكەتتىك ناگرادالارىن، العىس حاتتارىن تاپسىرۋ سالتاناتتى ءراسىمى جوسپارلانعان. ال كەشكى ساعات 17.00-دە قازاق ەسترادا جۇلدىزدارىنىڭ قاتىسۋىمەن ۇلكەن كونسەرت جوسپارلانعان. ءاربىر نومىردە قازاقستان تاريحىنان سىر شەرتەتىن تەاترلاندىرىلعان قويىلىمدار كورسەتىلەدى. تولىق كونسەرتتى 25 قازاندا «الماتى» تەلەارناسىنان كورۋگە بولادى.
«25 قازاندا ساعات 11:30-دا «مەدەۋ» سك الاڭىندا مەملەكەتتىك تۋدىڭ سالتاناتتى كوتەرىلۋى وتەدى جانە قازاقستان رەسپۋبليكاسىنىڭ ءانۇرانى جاپپاي ورىندالادى. ءدال وسى كۇنى استانا الاڭىندا جاپپاي كەشكى مەرەكەلەر مەن مەرەكەلىك كونسەرت وتەدى»، - دەدى ن.مۋليۋكوۆا.
سونىمەن بىرگە، رەسپۋبليكا كۇنىن مەرەكەلەۋ اياسىندا قالانىڭ بارلىق اۋداندارىندا سالتاناتتى جيىندار، قازاقستان رەسپۋبليكاسىنىڭ ءانۇرانى ورىندالادى، جاپپاي مەرەكەلىك شارالار ءىس-شارالار،، دوڭگەلەك ۇستەلدەر، ت.ب. وتەدى. رەسپۋبليكا كۇنىن مەرەكەلەۋ اياسىندا قالادا بارلىعى 400-دەن استام ءتۇرلى ءىس-شارا وتەدى.
ۇلكەن ءىس-شارا 25 قازان كۇنى ساعات 17:00-دە «استانا» الاڭىندا قازاق ەسترادا جۇلدىزدارىنىڭ قاتىسۋىمەن وتەدى. حەدلاينەرلەردىڭ قاتارىندا الاش ۇلى، ۇلىتاۋ، ءمادينا ءسادۋاقاسوۆا، بۇركىت پەن ايشا، دينايا، لۋينا، الىشەر كارىموۆ، اسحات تارعىنوۆ، ت.ب. بار. كونسەرت ساعات 21.00-گە دەيىن جالعاسادى، ودان كەيىن الماتىلىقتار وتشاشۋدى تاماشالاي الادى.