قازاقستان-رەسەي شەكاراسىندا قازاقستانعا رەسەي ازاماتتارى اعىنى ايتارلىقتاي وسكەنى بايقالادى.
شەتەلدىكتەردىڭ قازاقستانعا كەلۋ ەرەجەسىن «حالىقتىڭ كوشى-قونى تۋرالى» زاڭى جانە ۇكىمەتتىڭ «كوشىپ كەلۋشىلەردىڭ قازاقستانعا كەلۋىنىڭ جانە بولۋىنىڭ، سونداي-اق ولاردىڭ قازاقستاننان كەتۋىنىڭ قاعيدالارىن جانە كوشى-قون باقىلاۋىن جۇزەگە اسىرۋ قاعيدالارىن بەكىتۋ تۋرالى» قاۋلىسى رەتتەيدى، دەپ حابارلايدى Almaty-akshamy.kz
وسى ەرەجەلەرگە سايكەس، ەلدە 30 كۇنگە دەيىن بولاتىن شەتەلدىكتەرگە ۋاقىتشا تىركەۋ مىندەتتى ەمەس.
رەسەيدىڭ قازاقستانداعى ەلشىلىگى مالىمەتىنشە، رەسەي ازاماتى قازاقستاندا 30 كۇننەن ارتىق قالعىسى كەلسە، مىندەتتى تۇردە كوشى-قون قىزمەتىنە تىركەلۋى كەرەك.
وسىدان كەيىن ەلدە بولۋ مەرزىمى 90 كۇنتىزبەلىك كۇنگە دەيىن ۇلعايتىلۋى مۇمكىن (30+60). بۇل مەرزىم وتكەننەن كەيىن ازامات قازاقستاننان كەتۋگە مىندەتتى. قازاقستانعا قايتا كەلۋ ەلدەن كەتكەن كۇننەن باستاپ 90 كۇنتىزبەلىك كۇننەن كەيىن عانا مۇمكىن بولادى.
ەگەر رەسەيلىكتەر قازاقستانعا جۇمىس ىستەۋ ءۇشىن كەلسە، وندا مۇنداي ازاماتتاردىڭ جانە ولاردىڭ وتباسى مۇشەلەرىنىڭ ۋاقىتشا ەلدە بولۋ مەرزىمى رەسەي ازاماتىنىڭ قازاقستانداعى جۇمىس بەرۋشىمەن نەمەسە جۇمىسقا تاپسىرىس بەرۋشىمەن جاساسقان ەڭبەك نەمەسە ازاماتتىق-قۇقىقتىق شارتىنىڭ ۇزاقتىعىمەن شەكتەلەدى.
مۇنداي ازاماتتار قازاقستاندا ءبىر ايدان اسا بولۋدى جوسپارلاسا، كوشى-قون پوليسياسىنا تىركەلىپ، ەڭبەك شارتىن ۇسىنۋى قاجەت.
قازاقستان اۋماعىنا كىرگەن كۇننەن باستاپ 90 تاۋلىك وتكەننەن كەيىن شارت مەرزىمىنەن بۇرىن بۇزىلعان جاعدايدا، رەسەيدىڭ جۇمىسشى-ازاماتى قازاقستان اۋماعىنان شىقپاي 15 كۇن ىشىندە جاڭا ەڭبەك نەمەسە ازاماتتىق-قۇقىقتىق شارت جاساسۋعا قۇقىلى.
ەۋرازيالىق ەكونوميكالىق وداق تۋرالى شارتتىڭ 97-بابىنا سايكەس، رەسەي ازاماتتارىنان قازاقستاندا جۇمىس ىستەۋگە رۇقسات الۋى تالاپ ەتىلمەيدى. رەسەي جۇمىسشى-ازاماتىنىڭ قازاقستان اۋماعىنداعى ەڭبەك قىزمەتى ەاەو تۋرالى شارتتىڭ ەرەجەلەرىن ەسكەرە وتىرىپ، قازاقستان زاڭناماسىمەن رەتتەلەدى.
سونداي-اق، قازاقستاندا شەتەلدىكتى ەلگە كىرگىزۋگە بولمايتىن پۋنكتتەر ءتىزىمى بار. ولاردىڭ ىشىندە:
ۇلتتىق قاۋىپسىزدىكتى قامتاماسىز ەتۋ، قوعامدىق ءتارتىپ پەن حالىقتىڭ دەنساۋلىعىن قورعاۋ مۇددەسىندە؛
ەگەر ونىڭ ارەكەتى كونستيتۋسيالىق قۇرىلىستى كۇشتەپ وزگەرتۋگە باعىتتالعان بولسا؛
قازاقستاننىڭ ەگەمەندىگى مەن تاۋەلسىزدىگىنە قارسى شىقسا، ونىڭ تەرريتورياسىنىڭ بىرلىگى مەن تۇتاستىعىن بۇزۋعا شاقىرسا؛
ۇلتارالىق، كونفەسسياارالىق جانە ءدىني ارازدىقتى قوزدىرسا؛
قازاقستان ازاماتتارىنىڭ جانە باسقا ادامداردىڭ قۇقىقتارى مەن زاڭدى مۇددەلەرىن قورعاۋ قاجەت بولعان جاعدايدا.