ۋنيۆەرسيتەت اۋماعىندا وق جاۋدىرعان ستۋدەنت ەكەنى انىقتالدى
رەسەيدىڭ پەرم مەملەكەتتىك ۇلتتىق زەرتتەۋ ۋنيۆەرسيتەتىندە اتىس سالدارىنان قازا بولعاندار سانى 8 ادامعا جەتتى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
«اتىس سالدارىنان سەگىز ادام قازا تاۋىپ، تاعى بىرنەشەۋى زارداپ شەككەن»، - دەپ ناقتىلادى اگەنتتىك سۇيەنگەن دەرەككوز.
ۆەدومستۆو مالىمەتىنشە، ۋنيۆەرسيتەت اۋماعىندا وق جاۋدىرعان – ستۋدەنت. ونىڭ ەسىمى انىقتالدى.
ۇستاۋ كەزىندە ول قارسىلىق تانىتىپ، جاراقاتتانعان. اتىس فاكتىسى بويىنشا ەكى جانە ودان كوپ ادامدى ءولتىرۋ بابىمەن قىلمىستىق ءىس قوزعالدى. ونى تەرگەۋ كوميتەتىنىڭ ورتالىق اپپاراتى تەرگەيتىن بولادى.
ايماق پروكۋراتۋراسىنىڭ حابارلاۋىنشا، وقيعا ورنىنا پەرم ولكەسىنىڭ پروكۋرورى اتتاندى. ول اتىس بولعان جەردە تەكسەرۋ جۇرگىزىپ جاتقان قۇقىق قورعاۋ جانە باسقا ۆەدومستۆولاردىڭ جۇمىسىن ۇيلەستىرىپ، قاداعالايدى.