ەۋروپاعا جۇكتەردى ۇزدىكسىز تاسىمالداۋدى قامتاماسىز ەتۋ ءۇشىن ترانسكاسپيي حالىقارالىق كولىك مارشرۋتى ارقىلى تاسىمالداۋ كولەمىن ۇلعايتۋ جۇمىسى ءجۇرىپ جاتىر - ۇكىمەت باسشىسى
ق ر پرەمەر-مينيسترى ءاليحان سمايىلوۆ ءماجىلىس وكىلدەرىنىڭ دەپۋتاتتىق ساۋالىنا جولداعان جاۋابىندا رەسەيدە قالىپ قويعان تاۋارلار ەۋروپاعا قالاي شىعارىلاتىنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قالىپتاسىپ وتىرعان گەوساياسي شيەلەنىس جاھاندىق جەتكىزىلىم تىزبەگىنە اسەر ەتىپ، شيكىزات پەن تاۋارلار باعاسىنىڭ ءوسۋىن، وڭىردەگى تاسىمال دالىزدەرىنىڭ وزگەرۋىن قامتيتىن كوپتەگەن پروبلەمالاردى تۋعىزادى. ەكونوميكا مەن بيزنەستە تۋىندايتىن پروبلەمالاردى شەشۋ ماقساتىندا ۇكىمەت داعدارىسقا قارسى شارالار جونىندەگى جەدەل شتاب قۇردى. ونىڭ وتىرىستارى اياسىندا شەت ەلدەرگە جۇكتەردى تاسىمالداۋ ماسەلەلەرى قارالدى. قازاقستاننىڭ كولىك لوگيستيكاسىن ءارتاراپتاندىرۋعا قاتىستى ەۋروپاعا جۇكتەردى ۇزدىكسىز تاسىمالداۋدى قامتاماسىز ەتۋ ءۇشىن ترانسكاسپيي حالىقارالىق كولىك مارشرۋتى ارقىلى تاسىمالداۋ كولەمىن ۇلعايتۋ جۇمىسى ءجۇرىپ جاتىر»، - دەپ جازادى ۇكىمەت باسشىسى.
ياعني، اقتاۋ، قۇرىق، باكۋ، باتۋمي، پوتي ارالىعىن جالعايتىن تەڭىز پورتتارىنىڭ قۋاتى وسى باعىتتا شامامەن 7 ملن توننا جۇك وتكىزۋگە مۇمكىندىك بەرمەك.
«سونىمەن قاتار قازاقستان مەن لاتۆيانىڭ كولىك ۆەدومستۆولارى اراسىندا رەسەي اۋماعىندا قالىپ قويعان قازاقستاندىق جۇكتى ريگا جانە ۆەنتسپيلس پورتتارى ارقىلى ەۋروپاعا تاسىمالداۋ تۋرالى كەلىسسوز جۇرگىزىلدى. بۇل رەتتە لاتۆيا تاراپى الداعى ۋاقىتتا ءوز پورتتارىنىڭ قازاقستاندىق ترانزيتتىك جۇكتەردى قابىلداپ، وتكىزۋ قابىلەتى ايتارلىقتاي جوعارى دەڭگەيدە ەكەنىن حابارلادى»، - دەپ جازىلعان جاۋاپتا.
ايتا كەتەيىك، گرۋزيا، ءازىربايجان، تۇركيا جانە قازاقستان اراسىنداعى Middle Corridor بىرلەسكەن كاسىپورنى ازىرلەنىپ جاتىر. ول 2023 جىلدىڭ باسىندا نەمەسە ورتاسىندا رەسمي دايىن بولۋى مۇمكىن.