رەسەي ترامپ اكىمشىلىگىنىڭ كومەگىمەن ءوزىنىڭ قارجى سەكتورىن باتىس سانكسيالارىنان كەزەڭ-كەزەڭىمەن قۇتقارۋعا دايىن. كەشە اقش پەن رەسەي اراسىنداعى قارا تەڭىزدەگى اتىستى توقتاتۋ جونىندەگى كەلىسىم اياسىندا رەسەيلىك بانكتەردىڭ SWIFT جۇيەسىنە قوسىلۋ ماسەلەسى شەشىلدى، دەپ حابارلايدى aqshamnews.kz.
كرەملدىڭ مالىمەتى بويىنشا، العاشقى بولىپ روسسەلحوزبانك جۇيەگە قوسىلادى
"روسسەلحوزبانكتەن كەيىن سبەر توبى دا SWIFT جۇيەسىنە قوسىلاتىن بولادى. ءقازىر سبەر بارلىق سانكسيالاردى الىپ تاستاۋ بويىنشا كرەملمەن بىرلەسىپ قادامداردى پىسىقتاپ جاتىر. ءبىر سوزبەن ايتقاندا، رەسەي ترامپپەن جاقىندىعىن پايدالانىپ، سبەر ءۇشىن تولىق جول اشۋدى كوزدەپ وتىر"، - دەپ حابارلايدى DALA INSIDE دەرەككوزى.
وسى ورايدا، سبەر ءوزىنىڭ حالىقارالىق نارىقتاعى جوعالتىپ العان پوزيسيالارىن قايتا قالپىنا كەلتىرۋ ءۇشىن قادامدار جاساۋدا. سانكسيالاردىڭ قىسىمىمەن قازاقستاندا ساتىلعان بانكىن قايتا ساتىپ الۋ جوسپارى قاراستىرىلۋدا. قازىرگى كەزدە ونىڭ اتى Bereke بولىپ وزگەرگەن قازاقستانداعى بۇرىنعى ەنشىلەس بانكى كاتاردىڭ Lesha Bank توبىنىڭ قولىندا. ارابتار Bereke بانكىن باعاسىن كوتەرىپ، وزدەرىنە ءتيىمدى شارتتارمەن قايتا ساتۋعا قارسى ەمەس ەكەندەرىن ءبىلدىردى.
"Lesha Berekeء-نى قازاقستان ۇكىمەتىنەن نومينالدى تۇردە 65 ميلليارد تەڭگەگە ساتىپ العان بولاتىن. ەندى ونى كەمىندە 200 ميلليارد تەڭگەگە ساتادى. سبەربانكتە ونداي اقشا بار. رەسەيلىكتەر تەك سانكسيالاردىڭ بارلىعىنان شىعۋىن كۇتۋدە. سوندىقتان بۇگىن بە، ەرتەڭ بە، سبەر قازاقستان نارىعىنا ورالادى"، - دەيدى دەرەككوز.
Bereke ارابتار ءۇشىن تابىستى بولۋدا. 2024 جىلى بانك كەمىندە 15 ميلليارد تەڭگە تازا كىرىس العان. الايدا، Lesha قازاقستانداعى بانكتى ۇزاق ۋاقىت ۇستاۋعا نيەتتى ەمەس. جاھاندىق ينۆەستيسيالىق ساياسات شەڭبەرىندە پايداسىن بارىنشا الۋ جانە بانكتى قىمباتقا ساتۋ جوسپارى بار.
ال سبەر ءۇشىن قازاقستانعا ورالۋ تەك بيزنەس ەمەس، سونىمەن قاتار گەوساياساتتىڭ ماڭىزدى بولىگى بولىپ تۇر. وسىلايشا، ەكى تاراپتىڭ مۇددەلەرى بىر-بىرىمەن ۇشتاسۋدا.