ءقازىر رەسەي تاراپى بانان وسىرەتىن قازاقستاندىق كومپانيانىڭ تاجىريبەسىنە قىزىعۋشىلىق تانىتىپ وتىر. بۇل تۋرالى اۋىل شارۋاشىلىعى ۆيسە-مينيسترى ازات سۇلتانوۆ ايتتى، دەپ حابارلايدى aqshamnews.kz.
سەنات كۋلۋارىندا ءمينيستردىڭ ورىنباسارىنا «ينتەرفاكستە» «رەسەي قازاقستاننىڭ بانان ءوسىرۋ تاجىريبەسىنە قىزىعۋشىلىق تانىتتى» دەگەن اقپارات جاريالانعانىن سۇراعان. وسىعان قاتىستى تۇسىنىك بەرە الاسىز با؟ ەلىمىزدە وسىرىلگەن بانان ەكۆادوردان جەتكىزىلەتىن ونىمنەن ارزان با؟» دەگەن سۇراق قويىلدى.
ازات سۇلتانوۆ قازىرگى ۋاقىتتا تۇركىستان وبلىسىندا بانان ءوسىرىلىپ جاتقانىن حابارلادى.
بۇل ينۆەستيسيالىق جوبا جىلىنا 1 مىڭ توننا بانان وسىرۋگە مۇمكىندىك بەرەدى، بۇل جالپى بانان يمپورتىنىڭ شامامەن 1%-ىن قۇرايدى. ءقازىر باعا كونيۋنكتۋراسى مەن جەتكىزۋ شىعىنىنا بايلانىستى بۇل باناننىڭ قۇنى ىشكى نارىقتا باسەكەگە قابىلەتتى بولىپ تۇر. سەبەبى، قازىرگى تاڭدا بانان ءوسىرىپ جاتقان كومپانيا بارلىق پارتيانى قايدا جەتكىزەتىنىن انىقتاپ قويعان. حالىققا ءونىم جەتەدى مە، جەتپەي مە؟ ويتكەنى ءىرى دۇكەندەر جەلىسى ءونىمدى ءىرى كولەمدە ساتىپ الۋعا قىزىعۋشىلىق تانىتۋدا، – دەدى ۆيسە-مينيستر.
ول سونداي-اق، مۇنداي ءونىمدى ءوندىرۋ ءۇشىن شىعىندى دا ەسەپتەۋ كەرەكتىگىن اتاپ ءوتتى.
«ارىپتەستەرىڭىز ءبىز اپەلسين، بانان جانە ءمانداريندى قاشان وسىرەمىز؟» دەپ سۇراق قويعان. مۇنداعى ماسەلە – ءوندىرىستىڭ رەنتابەلدىلىگىنە بايلانىستى. ەكۆادور مەن برازيلياداعى كليمات ءونىمدى شىعىنسىز وندىرۋگە مۇمكىندىك بەرەدى. ال جىلىجايدا ەلەكتر، جىلۋ، تىڭايتقىش شىعىنى بار. وسىمدىكتى قورعاۋ ءۇشىن ارنايى قۇرالدار قاجەت. بۇل دا شىعىندى تالاپ ەتەدى. ءقازىر بۇل جوبا رەنتابەلدىلىككە شىعا الادى. سوندىقتان رەسەي فەدەراسياسى ەلىمىزدەگى جەكە كومپانيانىڭ بانان ءوسىرۋ تاجىريبەسىنە قىزىعۋشىلىق تانىتتى. بۇل ءونىم نارىقتا باسەكەگە قابىلەتتى بولىپ تۇر، – دەدى ازات سۇلتانوۆ.
سونداي-اق ءمينيستردىڭ ورىنباسارى تۇركىستان وبلىسى مەن باتىستا ءزايتۇن اعاشتارىن ءوسىرۋ جوسپارلارى بارىن ايتتى.
«ءبىز تاجىريبە جۇرگىزدىك. ناتيجە جاقسى. سوندىقتان بىرتىندەپ وسىنداي بىرەگەي جوبالاردى ىسكە اسىرامىز. وتاندىق وندىرۋشىلەر ءداستۇرلى جەتكىزۋشىلەرمەن باسەكەگە تۇسە الاتىن بولادى»، – دەدى ول.