قازۇپۋ رەكتورى بولات تلەپوۆ ءوتىپ جاتقان رەفەرەندۋمعا قاتىسىپ، ءوز تاڭداۋىن جاسادى.
– رەفەرەندۋم – حالقىمىز ءۇشىن تاعدىرلى ساياسي شەشىم قابىلدايتىن وتە ماڭىزدى ناۋقان ەكەنى بەلگىلى. اەس سالۋ ماسەلەسى، ەكونوميكالىق سيپاتقا يە بولسا دا، ءدال وسىنداي شەشىمدەردىڭ قاتارىنا جاتادى دەپ سانايمىن. بۇل جوبا ەلىمىزدىڭ بولاشاعىنا، ونىڭ ءال-اۋقاتىنا تۇبەگەيلى اسەر ەتۋى مۇمكىن. سوندىقتان ءاربىر ازامات وسىنداي ماڭىزدى شەشىمدەر قابىلداۋعا قاتىسۋى كەرەك. بۇل – قوعامنىڭ كۇتكەنىنە ادىلدىكپەن جاۋاپ بەرۋ، ءبىزدىڭ پرەزيدەنتىمىز ۇنەمى ايتىپ كەلە جاتقان اشىقتىق پەن ادىلەتتىلىك، - دەپ اتاپ ءوتتى بولات تلەپوۆ.
2024 جىلدىڭ 6 قازانىندا قازاقستاندا اتوم ەلەكتر ستانسياسىن سالۋ ماسەلەسىنە ارنالعان رەسپۋبليكالىق رەفەرەندۋم باستالدى. بۇگىن 10 323 سايلاۋ ۋچاسكەسى جۇمىس ىستەيدى، ونىڭ ىشىندە 74ء-ى شەتەلدەگى 59 ەلدە ورنالاسقان. داۋىس بەرۋ تىزىمىنە 12 ملن 244 مىڭ 683 ازامات ەنگىزىلگەن. رەفەرەندۋمدى 30 شەت مەملەكەتتەن جانە 4 حالىقارالىق ۇيىمنان كەلگەن 177 باقىلاۋشى قاداعالاۋدا.