پرەزيدەنت ق.ج.توقايەۆتىڭ ەكى اپتا بۇرىنعى جولداۋىنداعى ءبىرىنشى تارماق پاندەميادان كەيىنگى كەزەڭدەگى ەكونوميكالىق دامۋعا ارنالعان ەدى. ەكى جىلدان بەرى ەكى وكپەدەن قىسىپ تۇرعان پاندەميادا الدىمەن ەكونوميكا سالاسى ايتارلىقتاي زارداپ شەككەنى راس. مەملەكەت باسشىسى جولداۋدا تىعىرىقتان شىعۋدىڭ جولىن كورسەتتى.
مەنىڭ ويىمشا، ءدال ءقازىر اۋىل شارۋاشىلىعىنا ايتارلىقتاي نازار اۋدارىپ، شاعىن قالالار مەن مەگاپوليستىڭ شەتكى ايماقتارىن دامىتۋعا كۇش جۇمساۋ كەرەك. الىسقا بارماي-اق ءبىر مىسال كەلتىرسەم، 1 ميللياردتان استام تۇرعىنى بار كورشى ەل جاساندى، ساپاسىز تاماقتان شارشادى. ولار وزدەرىنىڭ تاماعىنان شىعىپ، تابيعي ونىمگە دەن قويا باستادى. ءبىزدىڭ شىعىس وڭىردەن ولار قازاقستاندا وندىرىلگەن ساپالى ونىمدەردى ساتىپ الاتىنىن جاقسى بىلەمىز. كەڭ-بايتاق جەرىمىزدە ءوزىمىز اۋىل شارۋاشىلىعىنا باسىمدىق بەرۋدىڭ ورنىنا ءبىز ساپاسىز ءارى قۇنارسىز شەتەلدىك ونىمدەردى ساتىپ الىپ وتىرمىز. اۋىل شارۋاشىلىعىنان كەيىن بىزگە ەل ىشىندە لوگيستيكانى دامىتۋ قاجەت. سەبەبى، ءبىزدىڭ ەلىمىزدە ايماقىشىلىك ساۋدا وتە ناشار. ماڭعىستاۋدا ازىق-تۇلىك قىمبات. نەگە؟ سەبەبى، الماتىدان جەتكىزۋ ول جاققا ايتارلىقتاي قىمباتقا تۇسەدى. سول ءۇشىن قازاقستاننىڭ ءار بۇرىشىنان باسقا ءبىر نۇكتەسىنە دەيىن ءبىز ءوز ونىمدەرىمىزدى ارزان ءارى جاقسى كۇيدە جەتكىزە الۋىمىز كەرەك. وسى جەردە وبلىستار اراسىنداعى لوگيستيكانى دامىتۋ ءوزى-اق سۇرانىپ تۇر.
ءقازىر «ونەركاسىپ تۋرالى زاڭ» دايىندالۋدا. سوعان قاتىستى مىناداي ۇسىنىسىم بار. بۇرىن ەكونوميكالىق گەوگرافيا دەگەن ءپان وقىتىلاتىن. سول بىزگە ءقازىر اۋاداي قاجەت دەر ەدىم. ۇكىمەت ءقازىر قاي وڭىردە قاي سالانى دامىتۋ كەرەكتىگىن جاقسى ءبىلۋ كەرەك. بىر-بىرىمەن بايلانىستى 3–5 يندۋستريانىڭ دامۋىنا باسىمدىق بەرۋ قاجەت.
ماسەلەن، ول قويمالار جۇيەسى نە ايماقتىق لوگيستيكالىق كومپانيالار بولۋى مۇمكىن. ياعني قانداي كاسىپورىندى قاي وڭىردە اشىپ، ونى قاي ايماقتارعا جەتكىزۋ ءتيىمدى دەگەنگە ماڭىز بەرۋىمىز كەرەك.